¹ "Hegiorok no waraga to anjilo le ikelesia ne Efisa: ' Hirorita hunnaŋ inno lia ilo ottoŋita haher hunna hattarik ta hani nohonyie ne inyiet. To lia ilo olot to hiji ho lomosien hattarik inno yeli, ojo hijo,"' ² Ayyen naŋ hijo nyo nia legem itai no ogol to hadihu nahatai, hijo ebe iso itai ebusak lia haruwok, ati eciem itai lia ojo ara isia to wati illohosie heruhok, ati obe isia ara a heruhok, ati ara isia atelerok. ³ Ayyen naŋ hijo ewuon itai iko dihan ta taji nohoi, ojo hirro hunna edihu itai to fure nanaŋ to biaŋan no hilafuho iko halani. ⁴ Ati awuon nayya iko hirro to hoi nobotie hijo ebe iyye emuno nayya iyyania iyya nafa emunori iyye nayya to hitieri. ⁵ Ati iyyania igigile hijo nari doŋe iso nia ewuotori itai holobeŋ itai ahuye iko hiloit na taji nohoi to ehumari higiemita hunna egiama itai. Ojio le ebe iyye eloit taji nohoi, attu iso nayya eyari lomo nohoi ade ta mai no honyie. ⁶ Ati ewuon iyye iko hiram nobotie no olibo tohoi nia eliwari iyye higiemita inne egiama hiyyo illo Nikalao ajo hidofe nayya aliwari isia daŋ. ⁷ To tuŋani lo owuon iko yohe isiara inyia hetiru hirro hunna ero Oyirihien te ikelesiaha. Te iyye ille eyyale esio iso nayya to honyie hadahari yani no wuaran no owuon to doŋe ho Hollum. ⁸ Higiorita to anjelo lo kelsia nyia to doŋe no Semuruna, to hiro no lia ilo ara hitieri iko to lia ara hicuŋi iko to lia lafa oye ati edas wuaran: ⁹ Ati amijak nayya hitigiemita iko hilociaŋ nohoi, ati ara iyye habarani. Ayyen naŋ hijo iteleriti inno hiyyo ilia ojo ara isie illo Yudea, ati arasa isia ta haji no sitan, obe isia ara illo Yudea. ¹⁰ Baŋa labaŋ hitigiemita hunna afanu. Hetiriŋe, ottu iso hetisiahani ebirok ilamuk illahatai to kijan hijo anyar aciamari itai, ojo hidofe owuon iso hitigemita ta hatai to holoŋitek tomon. Todihu no olibo man to ye, esio iso naŋ to hoi tamu no wuaran inna elahaman leticiofohini to hoo. ¹¹ Iyye ille ewuon iko yohe isiara inyia hetiru hikenita hunna ero Oyiri te ikelesiaha. Ati iyye ille eyyale, obe iso iyye orrumek diahai to ye hitarihi.'''' ¹² ''Ta anjilo lia te ikelesia to doŋe ho Perugamona, ero lia ewuon iko demi no lofi binono, ojo: Amijak nayya doŋe nia emanyari iyye, ara inyia doŋe no Sitan hitoloji. ¹³ ''Ati egocie iyye fure nanaŋ to golon hidofe ebe iyye ebusak hiruk nohoi ta hanaŋ to holoŋitek innafa ottohori Antipas to hiji hatai to doŋe nafa emanyari Sitan. Ara Antipas heruhoni iko mote hanaŋ lolibo bi no. ¹⁴ Ati awuon naŋ iko illak hirro kai hullo orru ta hatai: Ewuon itai iko ilamuk hiyyo hullo ottoŋita hitiyenita inno Balam lafa etiyenik Balak hijo hebire tubutiti no loru to hosiere ho durre inno Isarail, ofu isia daha ŋiria no hisiorita inno rijorihien iko hirro hunna ehuhuma hasomok. ¹⁵ To koi inia, owuon hidofe illak ta hatai hullo eruk hitiyenita inno hiyyo illo Nikalao. ¹⁶ Ati iyyania iloyito taji nohoi. Kuyya ebe iyye eyito attu iso naŋ to hoi kuak anyar ariomori nayya iko'hoi to fere no hutuk nanaŋ. Le ewuon iyye iko hiyok, itira hiro inia ero Oyiri te ikelesiaha. ¹⁷ To lia le eyyale, esio iso naŋ to honyie hadahari mana inna eŋ ofo, esio iso naŋ to honyie moru inna obuor no eciafahini fure a ŋejuk. Fure inna obe lobo tuŋani oyyen ati to lia omoju tara honyie.'''' ¹⁸ Ta anjilo le ikelesia nyia to doŋe no Tiatira hijo: Hirro hunnaŋ inno Lonyi Hollum, iyye lia eyyita honyiehite iyya ŋadief no hima ojo hejek inno hoi owuon iyya bileta inna onito. ¹⁹ Ayyen naŋ hiro ino egem iyye--mune iko hiruk ojo higiama nohoi iko dihan na taji ojo hirro hunna heletek iyye higem agalik higiemita innafa ho hosiere. ²⁰ Ati awuon naŋ iko lobo hiram to hoi hijo adihu iyye hiito noŋoruo Jesebele, nia ellilloŋo wan nohonyie hijo hekikilani. To hitiyenita inno honyie iko to hususuta nohonyie, efwotu inyia hegiamani lalaŋ hehumari he inyia hirro inno somon hidofe adahari idahiti inno hisiorita to rijorihien. ²¹ Esio naŋ to honyie holoŋ hijo anyar eruk hijo ara inyia hepalani, ati obe inyia awak hiloit hihuma nohonyie hirro inno somon. ²² Itiriŋe, ebirok iso nayya inyia te ijotit no ŋuwai, hitigiemita to hiyyo hullo ehuhuma hirro inno somon, leloit isia tajia to hiyyata inno hosie iko inyia. ²³ Attohe iso nayya durre innohonyie hidofe omijak iso ikelesiaha daŋ hijo nayya lia etufa naŋ higigilita iko tajia inno hiyyo. Esio nayya ta hatai daŋ abotie abotie idumiti ino higiemita innahatai. ²⁴ Ati ta hatai hiyyo illo Tiatira iko to hiyyo hullo obe wati ottoŋita hitiyenita, abe naŋ esio to hosie lobo hifahi te isia nyo obe isia ejufuta hirro hunna ogol tara inno Sitan. ²⁵ Ati itigolik to hirro hunna owuon ta hatai man attuni nayya. ²⁶ Te ilia ille eyyale hihuma higemita inno eti man to hicuŋi, esio iso nayya to honyie duaran no hilohitok no hiyyo daŋ hunna ta fau. ²⁷ Elehitohori iso inya isia to golon no etattur isia iyya hayyani lo obuor mocio inno honyie. Hidofe ara duaran nohonyie iyya duaran no esio Monye hanaŋ. ²⁸ Esio iso nayya to honyie haheri inna haŋati ho motie. ²⁹ Isiara tuŋani lo owuon iko hiyyok isiara hetiru, to hirorita hunna ero Oyiri te ikeleisaha.