¹ Hiram nafa inna etiliek Yesu Kristo nafa esio Hollum to honyie hetigonyok to hegiamak ilo honye nyo iso edoŋ kwak. Ehumak inyia inna to hefahu nohonyie Anjilo to hegiamani lohonyie Yoani. ² Odihu Yoani hirorita to hirro daŋ innafa egonyu inyia to higigilita inno rori inno Hollum ojo hidofe to hirro nafa esio Yesu Kristo. ³ Orumu iso tuŋani le ehiana woŋ woŋ jaha iko lia le etiru hitiyana no hikila atta baŋi hiro ino egioro dia, nyo eliaha holoŋ. ⁴ Hirorita inno Yoani te iklesiaha hatarik inno Asia; Isiara hamehini hotowuana ta hatai iko himwara to hiji hatai iko lafa iko lia ottu wan tara honye, inyia ille, inyia lafa iko lia ottu iso ojo to oyirihien hattarik ille ettole to hosiere ho hittoloji no honyie, ⁵ ojo Yesu Kristo anyalam lo suti, hitieri la hayok, hekumoni la habwok illo fau. To honyie ille omuno iyyohoi, ille etilahu iyyohoi to ye to hoto nohonyie, ⁶ ehumak inyia iyyohoi ahabwe, hetimojok illo Hollum iko to Monye honyie - hotowuana kuatan iko golon to honye mak. Amen. ⁷ Itiwolo, awoŋ inyia iko itiran, egonyu iso hiyyo inyia daŋ iko illafa ocuk inyia, ojo oyyo iso woyyojin to fau daŋ inyia dede. Amen. ⁸ Ojo Habu Hollum hijo, ''Ara nayya hitieri ara hidofe hucuŋi, lia lo owuon, lafa owuon, iko lia ottu iso hira Lettok.'' ⁹ Nayya Yoani ilasi hatai lafa etaban ikatai hitabanita iko ahabwe to hilik to no tajia iko dihan innafa owuon to Yesu to hiji ha hari nobo na ara fure nohonyie Patmos, nyo, to hiro to no Hollum ojo hidofe to hirorita inno Yesu. ¹⁰ Awuon ifa naŋ to Oyiri to holoŋ to no Habu. Ta halu hanaŋ, etiru nayya nobo hutuk ewuoloŋita iya furuju. ¹¹ Ojo hijo, "Igiorok hiro ino egonyu iyye to buk, atta iyye efahak to ikelesiaha hatarik, te Efisa, to Smirna, to Pagamum, to Tiatira, to Sardis, to Filadelfia iko Laudesia.'' ¹² Atta naŋ yite ahalu hijo awak egonyu hara ŋai lia ero ta hanaŋ, ifa ayite nayya, atta nayya egonyu iwuetiti hattarik inno lomo hunna ara iyya yiel. ¹³ To hiji he iwuetiti hattarik, owueta lobotie iyya Lonyi Tuŋani, eciefita inyia hofito ina esaga man to hejek iko gas inna ara ayel to suhe honyie. ¹⁴ Obwor hoo no honyie iko hofir inno honyie iyya gutun, ojo hidofe obwor iyya itiran, ojo honyehite inno honyie oulo iyya hima. ¹⁵ Oulo hejek inno honyie iyya yel no eharra ho bilet, yiel inna ara muniek, ojio hiyyorro iko hirro nohonyie owuon iyya igura no onyiru to hotwwai wor. ¹⁶ Owuon haher hatarik to hani he inyiet honyie ojio demi no ofi otu to hutuk honyie. Owulo homom no honyie iyya inohit no holoŋ. ¹⁷ Ifa egonyu nayya inyia atta nayya ahuyik to hejek honyie iyya tuŋani hayoni. Atta inyia adumu hani no honyie ne inyiet atanyak ta hanaŋ atta hijio "Baŋa labaŋ, ara nayya hitieri ara hidofe hucuŋi, ¹⁸ ille amanya mak." Aye ifa nayya ati iko to wolo amanya nayya man mak!. Ati awuon nayya iko iŋanyiti ino ye iko ino iferno. ¹⁹ To hiram nia, igiorok hirro inno egonyu iyye ta fau, iko inno iyyania ojio inno afanu hidoŋ motie ta halu ho hunna. ²⁰ Iyya te imanat hattarik inno haher inno egonyu iyye ta hani he inyiet, iko yiel inno iwuetiti inno lomo: Ara haher hattarik anjilohien illo ikelesiaha hattarik, ojio iwuetiti inno lomo hattarik ara hidofe ikelesiaha hattarik.''