¹ Etiru nayya hutuk ne ellilloŋo ta haji imojit nolojio ta anjilohien hattarik hijo, "Ino ijuhok tafau hirro inia ta sahani hattarik inno jore no Hollum.'' ² Atta anjilo lobotie ŋeno, atta ejuhok hirro ta sahan honyie afau. Attati horroŋon inno orru ojo hidofe diahai ottu to hiyyo ille owuon iko hituhuti no ciaŋ, iko to hiyyo ille etihabuo rijorihien. ³ Ejuhok anjilo hitarihi hirro innohonyie a hotwe hari, atta hari hiso daŋ ahoto iyya no tuŋani lo oye. Atta ciaŋi inia amanya ta hari ye daŋ. ⁴ Atta anjilo hitahunihi ejuhok hirro innohonyie ahotwe hari atta hari hira ahoto. ⁵ Atta nayya etiru anjilo lo hifioŋ ojio. ''Ebis iyye to hukumi tohoi. Tuŋani ille, ojio hidofe lafa, Haliboroni, nyo eŋot iyye hirro inia na anyar. ⁶ Nyo ejuhok ifa hiyyo hoto no hekilak arik iko no heyak illo sayye, osiru to hosie hamatari hoto ne isio iyye. ⁷ Ajio nayya etiru hitiraŋi to hide ha altari, no ojio hijo, "Dede, Habu Hollum Le ettok, obis iŋotiti innohoi ojio hidofe ara dede." ⁸ Atta anjilo hitaŋwani ejuhok hiro inno honyi to holoŋ, ojio holoŋ atta wuana ho nohon nohonyie no osuak hiyyo iyya hima. ⁹ Etaban hiyyo ho nohon ojio isia atta moro fure no Hollum hadurani le efahu hitigiemita inia, ojio isia etigol tajia innohosie, obe hidofe esio to honyie ohuo nohonyie. ¹⁰ Ejuhok anjilo hitamieti hirro innohonyie to kurus no sitan, ojio idumele atta etiyok obie nohonyi, atta hiyyo hinyahal ŋadiafa innohosie to diahai. ¹¹ To hiram no diahai, atta isia moro fure no Hollum le ido to hiram no diahai nohosie iko horroŋon innohosie, ojio isia arasa hibo yite tara hiyyata innohosie ino egiema isia. ¹² Ejuhok anjilo hitileji hirro innohonyie ahotwai hari nettok nara fure nohonyie Efarite, ojio hifioŋ innohonyie atta tee, ehuhumari hikoi na Habu lo ottu tekoi hiduoŋi no holoŋ. ¹³ Egonyu nayya jiohien hunik hunna eri iyya hidoduohi inno ojiŋu to hutuk ne ettok no sitan, ojio to hutuk ho ciaŋ iko to hutuk ho hekilani ille enyiaba. ¹⁴ Ara isia jiohin inno orru, inne ehuhuma miniaŋa ojio hituhuta hiduariti. Ofu isia daŋ ta Habu lo fau daŋ, nyo ottubari isia to oriomori to holoŋ no Hollum La agalik fau daŋ. ¹⁵ To riŋai, attu nayya iyya lohoho! Hotowuana jaha to lia lo odule riŋai, ojio eriria boŋojin ino honye ŋa iso inya olot aŋatture ta bali ojio irri atta hinief inya. ¹⁶ Ottubahini Habuok daŋ atta eyyani isia amai ne ellilloŋo to hirori ne Iberei hijo Amagedon. ¹⁷ Atta anjilo hitahattarihi elimak hiro innohonyie to oyyami. Teyya teyya atta hiro awoŋ tara haji ne imojit binno no ojio hijo ''Esaha!.'' ¹⁸ Ta halu ho hirro inia owuon himedehita no hila, iko okitik ne ettok binno, ojio hikienita inne etitanari hai, ibahiti inno hila fau, ojio hikikiro no obolo no ottu to okitik_kitik na agal nafa holobe edwoŋ man holobe Hollum ayyeu tuŋani, obolo ifa okitik binno. ¹⁹ Atta Babilonia bore na gala nettok buanya amasik hunik ojio misihi ho borejin inno gala atta hijo isiara Babilonia hatamatai jore no honyie tokos nafa eminu inyia. ²⁰ Ojio sigoŋi arik ho doŋiok obe enyiak aliew to masik hosie. ²¹ Essiaha tele inno ohuyu to hide ido hiyyo, ojio tele no otte odiŋ iyya ara idiŋit nohonyie to mwana miiet. Atta hiyyo moro Hollum, nyo obolo hi tigiama no tele olloŋori no.