1 Egonyu nayya nobo hituhuti te idou inna obolo ojio hidofe olibo. Owuon Anjilohien hattarik ojio hitigiemita hattarik hunna ara wati hisidi, nyo tara hosie, esohini iso jore no Hollum. 2 Egonyu nayya nobo sihin inna ara iyya hari inna hittok inna onyieta dee inna eharra ho hima, ojio to oger honyie owueta hiyyo hullo ocialari ho ciaŋ ojio rijori innohonyie ojio nimira no fure nohonyie. owuon isia ho obiliŋi inne esio Hollum tohosie. 3 Edolo isia fureta ino Muse, hegiamani lo Hollum ojio hidofe isia edolo fure no Lonyi Ker, inna ojio, ''Obolo hihumita innohoi ojio hidofe olibo, Habu Hollum Lologol ille agalik wan bi daŋ. Obis ikotia innohoi ojio hidofe ara dede, Iyye Habu lo fau daŋ. 4 Habu, ŋai iso le obe abaŋ iyye , ojio obe awak hitihabuo fure nohoi? To nyo iyye hamai elibo. Afanu iso hiyyo daŋ etihabuori ahosiere hoi, to nyo olieu hihumita innohoi hunna obis wati.'' 5 Ta halu ho hirro hunna ariŋa nayya, atta naŋ egonyu mai no suti, inna odua wan aŋa te ido, ara inyia musiama inna ara hituhuhiti te idou. 6 Ojio hidofe anjilohien hattarik ojiŋu illo lowuon ho hitigiemita hattarik. Eciofok isia boŋojin hunna obwor ojio hidofe opipiak, ojio hidofe elurok suhiana innohosie to boŋojin inna ara ayieli. 7 Atta lobo to hiji ho ciaŋi aŋwan inno owuar wati esio ta anjilohien sahani hattarik hunna ehuhumahini to yiel inne omoju ho jore no Hollum inna owuar man mak. 8 Efut ifa haji ho furo inna ottu wan to kwatan no Hollum arik ho duaran nohonyie, ojio hidofe obe tuŋani oremik ajiŋak ta mai nia man ottuhuni hitigiemita hattarik inna anjilohien hattarik.