¹ To hucuŋi nohonyie, itumune ta Habu. Obe orru ta hanaŋ hegiorohini ta hatai hirro hunna. Eriria iso hirro hunna itai. Ihuma riŋa ŋohe. ² Ihuma riŋa hegiamak illo orru. Ihuma riŋa ta hattohok. Nyo aŋoto iyyohoi. Nyo etihabwo iyyohoi to Loyiri no Hollum. ³ Iyyohoi ille etidara to Kristo Yesu, iyyohoi ille ebe eruk to hirro inno iwahiti inno wan. ⁴ Lara to hirro inno iwahiti inno wan, nayya ara hosiere. Le egigilo lobo tuŋani hijo awuon inyie ahosiere te iwahiti inno wan, agalik innanaŋ binno. ⁵ Agoto ifa naŋ to holoŋ hitahotohunihi. Ara naŋ le Isaraile, woyyo no Bejamin. Ajo hidofe ara le Ebrei. Ajo hidofe ejufuta hifahita, ajo hidofe eruk to hirro inno Farisei. ⁶ Eyyale ifa naŋ ikelesia. Abe ifa naŋ epal innak hirro inno hifahi, awuon ifa nayya lalibo to hosiere ho hifahi. ⁷ Ati era ifa hirro innia ta hanaŋ assai, awolo ifa naŋ isia a hirro assai to hiram no Kristo. ⁸ Dede ariŋa naŋ hirro daŋ assai to libe no wuana ho ofioroho inno Kristo Yesu hanaŋ. Ebo naŋ hirro daŋ tamai te inyia. Ebo naŋ isia hijo anyar ⁹ arrumu naŋ Kristo atta hidofe naŋ arrumuni to honyie. Abe naŋ awuon ho nobo bisan nanaŋ to wan hamai tara hifahi. Ati awuon naŋ ho bisan nottu to huruk to Yesu. Bisan nottu tara Hollum to huruk. ¹⁰ Iyyania, awak nayya hiyyen inyia ojo golon no hebuhu nohonyie, ojo tubai no hitigemita innohonyie. Awak naŋ heloito Kristo nayya to rijori no ye nohonyie, ¹¹ anyar awuon naŋ iko hebuhu to ye. ¹² Holobe naŋ arrumu hirro innia daŋ dede tamai, kuyya hidofe hijo ottubai mahu hirro inia ta hanaŋ. Ati adule naŋ riŋa hosiere hijo anyar eniefu naŋ hiram nafa awak Kristo Yesu etuhutek ta hanaŋ. ¹³ Halasira, abe naŋ ajo to wan hijo eniefu nayya. Ati owuon nobo sihin nobotie: ¹⁴ Aau nayya ahosiere hijo anyar eba naŋ to hucuŋi atta hidofe arrumu hisiori nyia ne ellilloŋori Hollum to Kristo Yesu nayya. ¹⁵ Te iyyohoi hullo hittaha, hegigile to hikoi nia. Ojo le egigilo itai nolufa te innak hirro, etuhutek iso Hollum ta hatai. ¹⁶ Ati leba iyyohoi, itiloto to hikoi no olibo. ¹⁷ Iticelu nayya, halasira. Itiriŋai te ilia illo olot to hitimiyaha ne egonyu itai tara hohoi. ¹⁸ Obore illo olot, liya illafa elimak naŋ ta hatai, ati iyyania, elimak naŋ itai to hidenya. Olot illak amiorok illo kuruce no Kristo. ¹⁹ Ara hucuŋi nohosie run. Ara hosehen innohosie jok losohosie, ojo hitidara nohosie ara irri nohosie. Egigilo isia to hirro inno fau. ²⁰ Ati owuon haŋ nohoi inna dede te ido, mai netilari hidofe iyyohoi hetilahani, Habu Yesu Kristo. ²¹ Eloit iso inyia wati innohoi inne elik hatara wati iyya wan nohonyie no opipiak. Wan no oyyieu inyia to golon ojo to dwaran nohonyie hatara hirro bi daŋ innohonyie.