¹ Egigilo naŋ hijo lo owuon hitigolo to Kristo. Egigilo naŋ hijo owuon hititana tara mune nohonyie. Egigilo naŋ hijo owuon tubai no Loyiri, owon hamehini ojo mune. ² Itufutak mune nanaŋ iyya ara higigillo nahatai nobotie, iyya owuon mune nahatai nobotie, to tubai ta nahatai to oyiri iyya etuba itai te igem nobotie. ³ Ibaŋa egiem innamuk hirro to hirrute ojo to hinyiaba. Ati inyiaha wati innahatai anyar eruk itai illak agalik wati innahatai. ⁴ Ibaŋa osiaha iwahiti innahatai hame ati itigilu hidofe daŋ iwahiti inno illak. ⁵ Anyar owoun iye iko hegigilori iyya nafa owun to Kristo Yesu. ⁶ Ara ifa inyia a Hollum, ati obe ifa inyia etirijik wan nohonyie iko Hollum ne esio iyyohoi ofioroho inno eremik iyyohoi etiyenu. ⁷ Nyo esio inyia wan nohonyie te iyyohoi. Odumu inyia wan iya hegiamani. Oliew inyia iyya hiyyo. Oliew inyia iyya tuŋani. ⁸ Enyiak inyia wan nohonyie atta huruk ye, ye no kuruce. ⁹ Nia, atta Hollum hihaf inyia ahide. Esio Hollum to honyie fure nalagalik fureta. ¹⁰ Egiem inyia nia hijo anyar origoŋo huŋuta to fure no Yesu, huŋuta inno ilia te ido ojo hunna owuon ta fau. ¹¹ Egiem inyia nia hijo oyito ŋadiefa hijo ara Yesu Kristo Habu, to lohuo no Hollum Monye. ¹² Halasira hanaŋ, iyya edule itai baŋi to holoŋi, obe ara to hosiere ha naŋ ati no lalitai nayya, itidule higiama hitilaha nahatai ta baŋi ojo hilafuho. ¹³ Nyo Hollum lia odule higiama ta hatai daŋ wahan nohonyie no olibo. ¹⁴ Igiamai hirro daŋ obe hilahana ojo rija. ¹⁵ Igiamai daŋ to hikoi nia anyar honyie ewuon obe nobo hipali etiborori adurre illo Hollum obe nobo hibwoti. Itimanyai tohikoi na anyar honyie ewulo iyya cialai ta fau, to hiji ho hilahaji na harwok. ¹⁶ Ihuma hinief hiram no wuaran anyar etukwata naa tafar no Kristo. Anyar ayyen nayya hijo obe ifa nayya anyieta assai kuyya hidofe araa hafa igem nanaŋ assai. ¹⁷ Ara ida hido hijo ejuhori nayya ade iyya hisiori he igem to huruk ta nahatai, adule nayya mune he itai daŋ. ¹⁸ To hikoi nia, emuno hidofe itai kanaŋ ¹⁹ Ati eyik nayya ta Habu Yesu hijo efahu iso nayya Timoteo ta hatai kwak anyar agol nayya letiru naŋ hirro innahatai tara honyie. ²⁰ Abe naŋ awuon ho lobo lerri he inyia, lawak dede huluak itai. ²¹ Osiaha isia daŋ iwahiti innohose, obe ara hirro inno Kristo. ²² Ati le eyyen itai libe nohonyie, nyo iyya nia egiamari hiito to monye honyie, egiama ifa inyia ikanaŋ to hiram no Hollum. ²³ Awak iso nayya efahu inyia kwak legonyu nayya hirro ofwo nanyar ta hanaŋ. ²⁴ Eruk nayya ta Habu hijo attu iso naŋ to wan kwak. ²⁵ Ati awak ida nayya efahak Epaprodito a halu ta hatai. Ara inyia ilasi ha naŋ ojo hidofe ara hegiamani lalanyar, ara hidofe lo oseŋer, hefahani lo hirro inna awak naŋ. ²⁶ Awak ifa inyia luŋa egonyu itai binno, nyo etiru ifa itai hijo oŋwai ifa inyia. ²⁷ Oŋwai ifa inyia binno man opwany ye. Ati omehini ifa Hollum to honyie, obe ara to honyie hame, ati ojo hidofe daŋ ta hanaŋ, hijo hotobiaŋa nayya awuon to run ho nobo. ²⁸ Efahak nayya inyia ta hatai, itimune lewolo itai inyia, baŋi nohonyei owuon ta hatai. Ifwotu ²⁹ Epaprodito ta Habu la hatai daŋ. Itibaŋ hiyyo illa ara ania. Awak ifa inyia ye te igem no Kristo. ³⁰ Esio ifa inyia wan hegiamari ta hanaŋ man etufutak igem nafa ebe itai eremik higem ta hanaŋ.