¹ To holoŋitek nia, owuon ifa iluluŋ no hiyyo, obe ifa isia owuon he innak hirro inno adaha isia. Ellilloŋ Yesu heyiyanak illohonyie atta hijo," ² Eriria naŋ iluluŋ, nyo owuana isia ikanaŋ holoŋitek hunik obe adaha illak hirro. ³ Lajo naŋ efahak isia ahaŋitek hosie ojo obe adaha kuya ofu huyuta to hikoi. Afanu illak illohosie ta alamarai." ⁴ Etiraŋ heyiyanak illohonyie to honyie, "Errumu iso imuniaha inno oremik hiyyo inia aji to waha inna?" ⁵ Etitif inyia isia, "Ewuon itai ho imuniaha jai?" Ojo isia atta hijo, "Hatarik." ⁶ Atta inyia elimak iluluŋ nya daŋ hotohunyie ta fau. Adumu inyia imuniaha inia hatarik, ati ta halu nafa esio inyia humo, atta inyia hububun imuniaha inia atta hisio to heyiyanak hesiara to hiyyo. Nia atta isia hisio to iluluŋ. ⁷ Owuon ifa hidofe isia iko illak ham illo oduhucio, nafa esio inyia humo to hosie, atta inyia elimak heyiyanak heisiara. ⁸ Nia adaha isia man ofoŋi. Atta isia etutubak nafa ofitini, to gufa hatari. ⁹ Ara ifa hiyyo luŋa kuyya alif aŋwan dia. Nafa attohu daha atta Yesu efahak isia hefie. ¹⁰ Teyya atta inyia arek to togoli iko heyiyanak illohonyie, atta isia efie afau ho Dalmanuta. ¹¹ Nia afau Farisei atta hitirisa iko inyia. Awak isia tara honyie hutuhuti te ido, haciamari inyia. ¹² Egigil inyia liir to oyiri nohonyie atta hijo, "Nyo osiaha hilahaji innaŋ hutuhuti? Dede ajo naŋ ta hatai, obe nobo hutuhuti no oremik naŋ hisio to hilahaji inna." ¹³ Nia atta inyia ebusak isia, atta ajiŋak to togoli atta enno otifor no wor tololo. ¹⁴ Tamai nia agwe heyiyanak heyari imuniaha iko isia. Enyie ifa lobo imune lobotie lo owuon to hotwai ho togoli. ¹⁵ Osor inyia isia atta hijo, "Itudule riŋai ojo itira heririak illo obe awak ahabuok no Farisei iko ahabuok no Erode." ¹⁶ Egigilo heyiyanak to wati inno hosie, "Obe iyyohoi ewuon iko imune." ¹⁷ Oyyen ifa Yesu, inyia hijo to hosie, "Nyo egigilo itai to biaŋan imune? Holobe itai daŋ hiyyen? Holobe itai etiru? Oye tajia innahatai? ¹⁸ Ewuon itai ho honyiehite, obe itai egonyu? ewuon itai ho yohe, obe itai etiru? Obe itai egilu? ¹⁹ Nafa abunyori naŋ imuniaha innafa miyet te illafa alif miyet, ara ifa imuniaha innafa ofitini lur to gufat jai?" Etiraŋ isia to honyie, "Tomon harik." ²⁰ "Ŋai nafa abunyohini naŋ imuniaha innafa hattarik to hiyyo illafa alif aŋwan, hara ifa inno fitini gufat jai?" Ojo isia atta to honyie, "Hattarik." ²¹ Enyiak inyia hijo, "Holobe itai daŋ hiyyen?" ²² Afanu isia a Betsaida. Eyyani hiyyo nia to honyie tuŋani lo oŋodo atta tana Yesu hototir inyia. ²³ Atta Yesu hinief oŋodo lia ta hani, atta arihori inyia oger ahaŋ. Nafa emit inyia honyehite innohonyi ojio hidofe atanyak has innohonyie to honyi, atta hifi inyia, "Egonyu iyye ilak hirro?" ²⁴ Owolo inyia ahide, atta hijo, "Egonyu naŋ tuŋani. Ati owuon iyya yianik inno olot." ²⁵ Atta inyia hinyiak atirok has innohonyie to honyiehite honyie, atta tuŋani lia hiŋa honyiehite innohonyi, enyiak inyia riŋai, atta inyia egonyu hirro bidaŋ teltel. ²⁶ Efahak Yesu inyia ahaŋ honyi atta hijo, "Baŋa ojiŋak abore gala." ²⁷ Atta Yesu eno iko heyiyanak illohonyie adoŋe ho Kesari PFilipi. To hikoi efi inyia heyiyanak illohonyie, "Hojo hiyyo ŋai nayya? ²⁸ Etiraŋ isia inyia hijo, " Yoani he Batisoni. Ojo ilak ojo, Elija, 'ojo hidofe ilak ojo, 'Lobo hekilani.' ²⁹ Efi inyia isia, "Ejo itai ejo ŋai nayya?" Etiraŋ Peturu to honyie, "Iyye Kristo." ³⁰ Atta Yesu elimak isia hotobiaŋa itai elimak lobo tuŋani hiram no honyie. ³¹ Atta inyia hitiara hitiyana isia hijo orrumu iso Onyi Tuŋani hitigiama hirro ariai, ebo so maruak iko letaha illo hetimojok ojo hegiorok, ottohoi hiyyo, ojo ta halu ho holoŋitek hunik ebuhu iso inyia. ³² Ero inyia nia dede. Atta Peturu eyari inyia oger atta hiriŋ inyia. ³³ Ati oyito Yesu atta riŋa to heyiyanak illohonyie atta hiriŋ Peturu atta hijo, " Ino ahalu hanaŋ Sitan! Obe iyye ehumak hoo nohoi to hirro inno Hollum, ati ehumak iyye hirro inno hiyyo." Nia atta inyia hililoŋ iluluŋ no hiyyo iko heyiyanak illohonyie, atta inyia hijo, ³⁴ "Lawak lobo tuŋani ejufak nayya, anyar ebo inyia wan nohonyie, isiara hotodumu kuruce nohonyie, atta ejufak nayya. ³⁵ Tuŋani lo awak hutulwak wuaran nohonyie owu iso etilitai, ojo tuŋani le etilitek manya nohonyie ta nayya to hirro inno Hollum etilohini iso wuaran nohonyie. ³⁶ Hara iso nyo libe no tuŋani, harumuni hirro hunna ta fau daŋ, atta ebusak wuaran nohonyie? ³⁷ Esio iso tuŋani manya nohonyie to nyo? ³⁸ Tuŋani leloriri ta nayya iko hiro nanaŋ ta fau inna orru iko nobolo iyyau no hilahaji inna, owu iso Onyi Tuŋani hidofe hiloriri inyia lawoŋ inyia to obie no monye honyi iko ta anjilohien."