¹ Ottubahini Farisei no botie iko Yesu, ojo illak hegiorok illafa afanu to Yerusalem. ² Egonyu isia heyiyanak illohonyi adaha imune no hosie to hipali, ara hijo, holobe hilla, has. ³ ( Nyo Farisei iko hiyyo illo Yudea daŋ, omohok isia daha inna ohilla has innohosie; ejufuta isia imohiti inno hohonyok hosie. ⁴ Lafanu Farisei to suk, obe adaha man laku isia wati innohosie. ojo owuon hidofe innak imohiti arria inno ejufuta isia, iyya ho hillilla no ikobot, mocio, hudutita iko haji no adahari.) ⁵ Efii Farisei iko hegiorok Yesu, ''Nyo obe heyiyanak illohoi amanya to imanyiti inno hohonyiok, nyo adaha isia imune no hosie ojo isia obe ellilla has? ⁶ Etiraŋ inyia, "Ekilu ifa Isaya hiram nahatai nalanyar, egiorok inyia hijo, ''Abaŋ hiyyo hullo nayya to hutuhe innohosie, ati alama tajia innohosie tara hanaŋ.' ⁷ Ara hitihabuo nohosie ta hanaŋ asai, etiyana isia hifahita innohosie iyya ara inno Hollum.' ⁸ Ebusak itai hifahita inno Hollum atta itai ehumak imohiti inno tuŋani ahosiere." ojo inyia," ⁹ dede ebo itai hifahita inno Hollum hijo anyar itai ejufuta imohiti innahatai! ¹⁰ Nyo ojo ifa Musa, 'Tabaŋa monye hoi iko hotonye hoi,' Ati, tuŋani lo omoro monye iko hotonye honyi, isiara hotoyo.' ¹¹ Ati ejo itai hijo, 'Lejo tuŋani to monye honyie kuya to hotonye honyie, "Tuŋani lo oluak itai omoju tara hanaŋ ara isia korban,"' ( ara nia hijo, 'Hisiorita te Hollum')- ¹² ania obe hetiyenak hijo anyar egiem isia innak hiro to monye honyie iko hotonye. ¹³ Etilita itai hifahita inno Hollum to imohiti ifa hoberen. ojo innak hirro arria inne egiama itai." ¹⁴ Enyiak inyia hillilloŋ iluluŋ atta hijo to hosie, "Itirai ta hanaŋ, itai bidaŋ, ojo itiru. ¹⁵ Obe nobo hiram no ojiŋak tabali to tuŋani oremik hitihar inyia lajiŋak to honyie. Ati hirro inno ojiŋu to hotwai ho tuŋani abali oremik hiturru inyia." ¹⁶ Tuŋani lo owuon hoyohe isiara hetiru. ¹⁷ Nafa ebusak Yesu iluluŋ nia atta ajiŋak ahaji, efii heyiyanak inyia hiram no hiticieli nafa ojo inyia. ¹⁸ Etiraŋ Yesu to hosie, "Obe hidofe itai daŋ eyyen? Obe ati itai egonyu hijo hirro inno ojiŋak to tuŋani ta bali obe etihar inyia, ¹⁹ nyo obe ojiŋak ahotuai ho taji honyi, ati ofu ahosehe honyie atta ajiŋu adde aler." To hiram tonia etilibok Yesu ŋiria daŋ. ²⁰ Ojo inyia, "Ara no lojiŋu to hotuai ho tuŋani oremik hitihar inyia. ²¹ Nyo ta taji ho tuŋani ojiŋu higigilita inno orru, iyya ho, somon, hoho, toho, ²² roto, daya, liwai, hinyaba, haini, mwaŋa, hitidara iko hukwaraŋa. ²³ Iruti huna bidaŋ afanu to hotwai hotuŋani, ara isia innia eturru tuŋani." ²⁴ Odoto inyia atta ebusak mai nia atta eno afau ho Turo iko Sidon. Ojiŋak inyia ahaji ojo inyia obe awak lobo tunŋani hotoyyen hijo awuon inyia dia. Ati obe inyia oremik ŋofe. ²⁵ Ati holojiŋak inyia bii ahotuai haji etiru nobo hiito noŋoruo no owuon hiito nohonyie iko loyiri no orru- hiba no Yesu atta awoŋ atta ahuyik ta fau to hejek honyie. ²⁶ Ara ifa hiito noŋoruo nia no Girik, ojo esie ifa inyia to Surofenisa. Olia inyia to honyie hepitai ade miniaŋa tara hiito nohonyie. ²⁷ Atta inyia hijo to honye , "Isiara durre hatadahai do. Obe olibo hadumuni ŋiria no dure atta iyye hisio to ŋohe." ²⁸ Ati etiraŋ inyia atta hijo to honye, "ee, Habu, adaha ŋohe inia tafau ho teremeja ŋiria no durre letide durre afau." ²⁹ Ojo Yesu to hiito noŋoruo nia hijo, "Iyya ejo iyye ania, ino. Efie miniŋa adde tara ŋani hoi." ³⁰ Aciahari tuŋani nia ahaji honyie atta arrumu hiito no honye ofer to seriri, ojo enyai innak miniaŋa tara honyie. ³¹ Atta inyia ebusak fau no Turo atta agalari Sidon ahari ho Galilea to fau ho Dekapolis. ³² Dia eyyani isia to honye lobo lotuho ojo hidofe obe ero no olibo, atta isia liyya to Yesu hatatanyak has innohonye to lottuho lia. ³³ Atta Yesu eyari inyia adde tohiji ho iluluŋ ho hiyyo, atta atuhok hafiala innohonyie to yohe ho lottuho lia, atta amitak hamilak innohonyi atta hidofe hitir taji no honye ta hamilak. ³⁴ Atta Yesu hibonno ahide ido; atta hijo, "Efata,"Inna ojo, "Taŋa!" ³⁵ Aŋek Yesu yohe innohonye hetirai, ojo hidofe hirro innafa eniefita ŋadief no honye atta ebusak, atta ifa inyia hiro nolibo. ³⁶ Atta Yesu elimak isia hoto biaŋai elimak lobo tuŋani. Ojo hidofe elimak to hosie ho todehini, hotobiaŋa isia ero noo to hiram to nia. ³⁷ Atta hiyyo daŋ hillilliha, atta hijo, "Egiem inyia hiro bidaŋ nalanyar. Oremik inyia aŋek tuhojok hetirai ojo illo obe omijak hiro hotomijak hiro."