¹ Ediahari Yesu mai nyia atta acahari a doŋe hosie, ojio lefahat illohonyie atta ŋejufari inyia. ² Nafa ŋawoŋ far na Sabato, etiyena inyia to sinagog. Attati hiyyo arria ŋetiru inyia atta isia daŋ hilliliha. Ojio hidofe isia daŋ, "Jai oyyen inyia hitiyenita hunna daŋ? Jai ehuma inyia idwariti inno obolo iyya hunna?" ³ Obe inyia ara hehumani la bau, onyi Maria ojo ilasira honye ba Yokobo iko Yose ojo Yuda ho Simone? Hidofe, obe ara hanasirak honyie innia amanya aŋati daŋ hohoi?" Atta isia hiloŋojita to Yesu. ⁴ Atta Yesu hijio to hosie, "Owuon hitihabwo to heyani sayye, ati to doŋe hosie ojio hidofe ta haŋ hosie, obe hiyyo abaŋ inyia." ⁵ Obe inyia oremik hihuma innak hirro dia, ati otirok inyia has innohonyie to homom ho tuŋani lo oŋwai atta hitilib isia. ⁶ Elliliha inyia to biaŋan to nohosie owuon ho hiruk. Ati owu inyia amisihi niyya to oger etiyenari. ⁷ Attati inyia hiro to liyya tomon ho lohorik atta ŋefahak isia lohorik lohorik amisihi ojo hidofe esio to hosie golo daŋ anyar efuhai jiohin inno orru, ⁸ elimak inyia isia hijio hotobiaŋa eyari nobo sihin to loton to nohosie, aracie hitethita innohosie hamai: Hotobiaŋa eyari imune, kullo, kuyya hidofe jaf na arobiya te ittoditi innohosie, ⁹ isiara heciofok hamuha, ojio hidofe boŋojin arik. ¹⁰ Atta Yesu hijio te efahat illohonyie, "Letole itai do nobo haji, itolojo dia, ibaŋa lofwo nobo mai. ¹¹ Ojio lobe hiyyo inno mai nyie etira kuyya omoju itai, ibusak mai nyie atta itai etuturok tuduha to hejek innahatai hatara asut do hosie." ¹² Atati hetiyenak hitiyena hiyyo heloito tajia innohosie ojio hidofe eruat adde tara hiyyata innohosie. ¹³ Efuhai ifa isia johin daŋ inno orru, atta hidofe heyalak hiyali to hiyyo illo oŋwai man oliborori isia. ¹⁴ Etiru Habu Erode hiram no Yesu, hijio, 'okwatan fure no Yesu binno. Atta hilak hijio, "Aŋebuhu Yoani Batista to ye, ojio to hiram to nia, egiama golon ne iduwariti do honyie." ¹⁵ Ojio hidofe odule hilak hiro hijio, "Ara inyia Elia." Arasa hilak daŋ hijio, "Hekilani ha sayye illafa ho beren." ¹⁶ Atti nafa etiru Erode atta inyia hijio, "Ebuhu Yoani lafa aŋot naŋ hoo nohonyie, inyeja le ebuhu to ye." ¹⁷ Nyo inyia le Erode lafa eniefu Yoani atta ŋefitak inyia to kijan to hiram to no Erodia.( ilasi honyie Philipo) nyo eyari ifa Erode oŋorwo Erodia. ¹⁸ Nyo elimak ifa Yoani Erode, "Obe osiru tohoi heyari oŋorwo ilasi hoi." ¹⁹ Ati ejoria ifa Erodia do honyie nyo atta hiwak ŋattohe inyia, ati obe ifa inyia oremik higiem, ²⁰ nyo abaŋ ifa Erode Yoani; oyyen ifa inyia hijio odua Yoani bi no, atta ebusak inyia bolioŋ. Letiru Erode hiro no Yoani att inyia hijiriŋa binno. ²¹ Attati hiyyom ŋawoŋ no holoŋ nafa esiuni hiyyo Erode atta inyia ehuhumak daha to dafiti illohonyie, iko ettaha illo Galilea daŋ. ²² Attati ŋanni Erodia ta wan nohonyie cia to hiji hosie ojio hidofe etumuno Erode daŋ ho hiyyo illafa ettole ho inyia. Atta habu lia hijio to hoduoti nia, "Ifia nayya te innak hirro inne lewak iyye, ajo iso naŋ atta hisio to hoi." ²³ Attati Erode ŋawoŋ hinyiak hidas to honyie, "Esio iso naŋ tohoi rori inne efia iyye, ŋara ida hido ŋati no obie hoti." ²⁴ Atta hoduoti ŋajiŋai abali atta hifia hotonye honyie hijio, "Nari sehin iso nia aremik naŋ hifi to honyie?'' Etiraŋ hotonye hijio, Tomoju hoo no Yoani Batista." ²⁵ Attati inyia acahari kwak ta habu Erode, atta hijio to honyie, "Awak naŋ heyyani hiyyo ta hanaŋ hoo no Yoani, hemak hiyyo to hiduti." ²⁶ Attati Habu hijiriŋa binno, ati obe inyia ebo hiram no hoduoti nia nyo ocorok ifa inyia to hittuŋo to nohonyie ojo hatamonok etiru. ²⁷ Tara efahak habu lobo loseŋer heno eyyani hoo no Yoani. ²⁸ Eno heririani lohonyie lia attohoi atta eyyani hoo no Yoani to hotwai kijan. Attati eyyani hoo nyie to hiduti, attati inyia hisio to hoduoti ojo hoduoti atta hisio to hotonye honyie. ²⁹ Nafa etiru lefahat illo Yoani hiram nia, atta isia afanu ŋeyari wan nohonyie adde atta anuhak te ilume. ³⁰ Ottubahini lefahat daŋ ho Yesu, atta elimak to honyie hirro daŋ inne egiem isia ojo hidofe etiyena. ³¹ Atta Yesu hijio to hosie, "Ifanu efi itai ika naŋ to wati te innahatai efi eyomu do kai ta mai no oyyur." Nyo olot huwo arria illa afanu ojo ilak ofwo, man obiaŋari isia eremik arrumek saa na adahari isia daha nohosie. ³² Niya atta isia arrek a hotwai ho togoli atta ŋefie anobo mai no oyur to wati innohosie. ³³ Ati, egonyu ifa hiyyo isia arria isia attati isia hinyior to hejek to misihi daŋ man ofwo hiba dia to hosiere hosie. ³⁴ Nafa ebarari isia to otifor na hari, egonyu Yesu iluluŋ no hiyyo owueta inno omelehini, atta taji nohonyie amelehini te isia nyo ara ifa isia iyya kioro inno obe heyyohoni. Atta Yesu hitiara hitiyena isia hirro arria. ³⁵ Nafa eliaha holoŋ asuori, atta lefahat afanu to honyie atta hijio, "Ara mai inna amur, hidofe eliaha holoŋ inna ŋasuori. ³⁶ Ifahak hiyyo inne amata kuyya hidofe amisihi anyar ofwo isia enyaŋu nobo daha to hosie." ³⁷ Ati etirraŋ Yesu isia hijio, "Isiara isia nobo daha." Attati isia hijio to honyie, "Ewak ati iyye anyar efi iyyohoi enyiaŋu imuniaha ta arobiya hisihai arik inno oremik enyiaŋu imuniaha anyar esio to hosie hatadahai?" ³⁸ Attati inyia hifia isia, "Hoso imuniaha inne jai? Ifeti itiwolo." Ifa lehien isia, atta isia elimak inyia hijio, "Ara imuniaha miet, ojo ham arik." ³⁹ Attati Yesu elimak hiyyo daŋ hotohunye ta fau te iluluŋi to miyaŋ igara. ⁴⁰ Ohunye hiyyo daŋ te iluluŋi hisihai nobotie ojo hinak tomwana miet. ⁴¹ Attati inyia ŋadumu imuniaha miet ojo ham arik atta hibonno ahide, atta hisio humo to Hollum, atta hibibeny imuniaha atta hisio te efahat illohonyie hesiara to hiyyo. Atta inyia ŋaharak ham lohorik to hosie daŋ. ⁴² Adaha isia daŋ man ofoŋi. ⁴³ Atta isia asuduhak ofitot inne imuniaha inno efut to gufahien tomon harik iko ofitot inno ham. ⁴⁴ Ara ifa hiyyo alif miet illa adaha imuniaha. ⁴⁵ Tara, efahak inyia efahat illohonyie hotorrek to togoli hatalaŋ hari to hosiere adoŋe no Beteseda, ojio inyia atta efahak hiyyo ŋefie adde. ⁴⁶ Nafa efi isia adde, owu inyia ahide doŋe lomojori. ⁴⁷ Nafa era harie, eba ifa togoli do hiji ha hari nettok, ojio Yesu owuon hame to otifor. ⁴⁸ Ewolo Yesu hijio etigiama hiharuto na hari isia binno, nyo ohut ifa oyyami binno. Nafa eliaha ŋati no motie, atta inyia awoŋ to hosie, lo olot to hide ha hari, awak ifa inyia agalari isia. ⁴⁹ Ati nafa egonyu isia Yesu olot to hifioŋ, egigilo ifa isia hijio kuyya ara mahu inyia ahiito no jiok lorru, ⁵⁰ atta isia daŋ baŋi ojio hidofe oyyio. Egonyu ifa isia inyia atta baŋi. Ati ojio inyia to hosie, "Itigolo tajia innahatai! Nayya le ! Hebaŋ!" ⁵¹ Owu Yesu to hosie, atta oyyami nolohut aduehini, atta isia daŋ mune tohonyie binno. Ati obe ifa isia oyyen hiram ne imuniaha, ⁵² nyo ogol ifa tajia innohosie ojio hidofe higigilita innohosie alama binno. ⁵³ Nafa ellaŋ isia ŋati na hari tololo afau no Geneseret, attati isia ŋefitak togoli. ⁵⁴ Nafa afanu isia adde nobotie tara togoli, atta isia ŋagilu hijio, ara hada inyia Yesu lia. ⁵⁵ Attati hiyyo daŋ hinyior ahaŋitek innohosie heyyani haŋwak to honyie, nafa etiru isia hijio ottu inyia. ⁵⁶ Ojiŋak ifa Yesu ahotwai misihi iko doŋiok daŋ, attati hiyyo daŋ eyyani haŋuak atta efiyak isia de ikatin inne etinyiaŋari hiyyo hirro, atti efia ifa hiyyo hijio ewak isia hittir hiyyok no boŋo nohonyie. Olibe ifa innafa etir boŋo nohonyie.