¹ Atta isia afanu anobo ŋati na hari, a fau no Gerasenes, ² Nafa hebusak Yesu togoli, awoŋ lobo tuŋani lowuon ho oyiri ne ebwot te ilumioho. ³ Amanyita tuŋani lia ifa te ilumioho. Obe ifa lobo tuŋani oremik etihu inyia, ara ifa hido ta aririk. ⁴ Efita ifa inyia hinyiahita arria to hofii iko ta aririk. Ofut inyia ojio hidofe eguguas aririk nia. Obe ifa lobo tuŋani oremik ariek inyia. ⁵ Odule inyia ta harie iko ta far yio te ilume to doŋiok, ojio hidofe eŋiŋoto wan to moruo inno ofi. ⁶ Ifa egonyu inyia Yesu te iloma, onyior inyia do honye atta rigoŋi ta fau to hosiere honyi. ⁷ Oyyo inyia le eyyorro bino, "Adumu naŋ nyo nohoi, Yesu Lonyi Hollum Lettok? Attana naŋ iyye to fure no Hollum wan nohonye, baŋa etigiama nayya." ⁸ Nyo ero ifa Yesu to honye hijo, "Woŋ ade tara tuŋani, iyye oyiri ne ebwot." ⁹ Atta Yesu hifii inyia hijo, "ŋai fure nohoi?" ojio inyia atta hitirraŋ inyia hijo, "Fure nanaŋ Ligion, ebore iyyohoi." ¹⁰ Attana inyia Yesu adule hijo hotobiaŋa efahak isia adde ta fau nyia. ¹¹ Owuon ifa iluluŋ no bataha inna adaha aŋati to doŋe nyia, ¹² atta isia tana Yesu hijo, "Ifuhak iyyohoi to bataha innia; ewak iyyohoi ajiŋak to hose." ¹³ Atta Yesu ebusak isia; afanu oyirihien inne ebwot adde atta ajiŋak to bataha, ojio bataha niyya atta arruhari agum no doŋe man ahotwe hari nettok, atta bataha alif arik daŋ adiori ahotwe hari. ¹⁴ Atta huwo illafa erribita bataha niyya hurrwata ofwo elimak to bore gala nyia hirro daŋ innafa eduoŋ. Att iluluŋ no hiyyo daŋ efi hiwolo hirro innafa owuon. ¹⁵ Atta isia afanu to Yesu atta arrumu tuŋani lafa eniefita miniaŋa- lafa ottoŋita lijion--lettole ta fau, leciofo, ojo hoo nohonye owuon na anyar, man abaŋ isia. ¹⁶ Atta isia elimak daŋ rori innafa egonyu isia tara tuŋani lafa eniefita miniaŋa iko hajiŋak no miniaŋa to bataha. ¹⁷ Atta isia hitiara tana inyia heno adde to doŋe nohose. ¹⁸ Ta nafa ojiŋahini Yesu ahotwe togoli, atta tuŋani lafa eniefita miniaŋa tana hijo anyar efu isi iko Yesu. ¹⁹ Ati obe ifa inyia awak, ati ojio inyia to honyi hijo, "Ino ahaji hoi to hiyyo illohoi, ilimak to hose hirro inne egiem Habu do hoi, iko hamehini ne esio inyia tohoi." ²⁰ Atta inyia ŋeno ojio hidofe etiara hitiyena hirro hunno hittaha inne egiem Yesu to honye to Dekapolis, man atta hiyyo daŋ hillilliha bino. ²¹ Nafa ellaŋ Yesu hari tololo to togoli, atta iluluŋ no huwo nettok awoŋ akudok inyia, ta nafa owuanari inyie aŋati hari. ²² Ottu ifa lobo eittok lo sinagog lafa ara fure nohonye Jairo, ifa egonyu inyia Yesu, atta inyia ahuyik to hejek innohonye. ²³ Odule ifa inyia tana to honyie hijo, "Eliaha ŋani hanaŋ yee. Attana naŋ iyye hijo anyar ettu hoi iyye attanyak hass innohoi to honye hatanyarra atta wuaran." ²⁴ Atta Yesu eno he inyia, ojio iluluŋ nettok atta ejufari inyia man etufuda aŋati honyi. ²⁵ Owuon ifa nobo hito noŋorwo nafa odule hoto nohonye woo man ŋasi tomon harik. ²⁶ Orrumu ifa inyia hitigiama binno ta akimi man esahak ibariti innohonye daŋ. Ati obe ifa inyia orrumu nobo luaha, man enyiak ati runn. Etiru ifa inyia hirro innak inno Yesu. ²⁷ Ottu ifa inyia ta halu ho Yesu ojio hiyyo daŋ efut, atta inyia hittir boŋo no Yesu ta halu. ²⁸ Atta inyia hijo, "Le ettir nayya boŋojin innohonye, atta iso nayya libe." ²⁹ Nafa ettir inyia Yesu, atta hoto nyia weta, atta inyia aheru ta wan nohonye hijo alibe inyi tara hitigiama nohonye. ³⁰ Kuak atta Yesu aheru wan nohonye hijo eno nobo golon adde tara honyie. Oyito inyia te iluluŋ atta hifi, "ŋai ottir boŋojin innanaŋ?" ³¹ Atta heyiyenak illohonyie hijo do honye, "Obe iyye egonyu iluluŋ nia aŋati hoi, ejio iyye enyiak hijo, 'ŋai ottir nayya?"' ³² Ati owolo Yesu daŋ hijo ŋai mau ottir inyia. ³³ Ifa eyyien hito noŋorwo nia hirro innafa eba to honyie, abaŋ ifa inyia binno man ekikiro. Ottu inyia ahosiere Yesu atta ahuyik to honye atta elimak inyia hirro hunna dede. ³⁴ Atta Yesu hijo to honye hijo, "Hiito, etinyaru huruk nohoi iyye. Ino bolioŋ ne elibo tara iŋweti innohoi." ³⁵ Halarrasa ifa inyia hiro, afanu illak hiyyo tara eittok lo sinagog, atta hijo, "Oye ŋanni hoi. Baŋa etigiama hetiyanani ija?" ³⁶ Ati ehum ifa Yesu etiru hirro innafa ero isia, atta inyia hijo te eittok lo sinagog, "Baŋa abaŋ. Iruho ania." ³⁷ Obe ifa inyia ebusak lobo tuŋani hejufari inyia, atta inyia ebusak Peturu, Yokobo iko Yoani, ilasi Yokobo. ³⁸ Afanu ifa isia ahaji ho tuŋani lia atta isia egonyu ŋuŋusia no hiyyo, ojio hiyyo daŋ eluluo inno oyyio. ³⁹ Nafa ajiŋai inyia ahotwe haji, atta inyia hijo to hose, "No nyo ejoria itai ejio hidofe ejiriŋa? Obe hiito nia oye ati ojioto inyia bii." ⁴⁰ Ati ellohita ifa isia daŋ to honye, attati inyia efuhak isia daŋ abali, atta eyari monye hiito iko hotonye ojio innafa owuon daŋ he inyia, atta isia afanu man amai nafa owuanari hito. ⁴¹ Odumu inyia hani no hiito atta hijo to honye hijo, " Talita koum," no ojio hijo, "Hiito nettiŋ, ajio naŋ to hoi, te'tte." ⁴² Kokuak, atta hiito diote atta eno (nyo ara ifa ŋasi innohonye tomon harik). Elliliha ifa isia daŋ ta mai binno. ⁴³ Atta inyia elimak isia no ogol hijo hotobiaŋa lobo tuŋani oyyen hiram nia. Atta inyia elimak isia hesiara hiito nyia nobo sihin hatadahai.