¹ Enyiak inyia hitiyena isia to oger ha hari nettok. Atta iluluŋ nettok akudok inyia, atta inyia esurok to togoli ahotwai hari atta ahunyie ta fau. Owuon ifa iluluŋ aŋati otifor ha hari nettok. ² Etiyena ifa inyia isia hirro arria to hitimiyyahita atta inyia hijo to hose to hitiyena nohonye. ³ "Itira, owu ifa hayani ayak. Ta nafa ayari inyia, ohuyik ifa ilak hinyomo te ikoi, ojo cieŋ atta afan ahurru isia daŋ. ⁴ Ojo innak hinyomo ohuyik to moruari nobe huron obore. ⁵ Obolo ŋama nia kuak nyo obe ifa huron obore. ⁶ Ati nafa eduoŋori holoŋ, anorie isia nyo obe ifa isia owuon iko hadde, atta isia attoyi. ⁷ Ojo hinyomo innak ohuyik to hukua. Nafa esuru hukua obolo man atta higor isia enyie ŋama hoŋerik inna ŋama. ⁸ Ojo hidofe innak hinyomo ohuyik to huron inno olibo atta emak ŋama arria, nafa obolo isia man eŋarak innak ŋama hinyahita tomwana hunik ha aŋwan, ojo innak hisihai ile, ojo innak hisihai nobotie." ⁹ Atta inyia hijo, "Isiara tuŋani lowuon ho yohe hetiru!" ¹⁰ Nafa owuanari Yesu hame, efia ifa hiyyo illo owuon aŋati honye iko illafa ho tomon harik hitimiyahita. ¹¹ Atta inyia hijo do hose, "Esiarahini hirro inne eŋofo inno obie no Hollum. Ati to ilia illo owuon da bali, ara iso rori to hose daŋ ahitimiyyahita, ¹² anyar lewolo isia, orriŋa isia ati obe iso oremik egonyu, etira iso isia, ati obe iso oremik hiyyien, man oyitori isia, ojo iso Hollum atta ebusak isia." ¹³ Atta inyia hijo to hose, "Heyyen itai hitimiyyahi inna? Efu iso itai hiyyien hitimiyyahita innamuk jai? ¹⁴ Oyek hayani hiram. ¹⁵ Ara inamuk niya hunno ohuyik aŋati ho hikoi, tamai nafa oyehini hiro. Ati nafa etiru isi inia, ojo Sitan atta awoŋ atta eyari hiro nafa oyehini to hose. ¹⁶ Ojo innak hinyomo innafa oyehini to morwari, nafa etiru isia hiro, atta hidofe efwotu hiram to mune. ¹⁷ Ojo hidofe obe owuon ho hadde innohose, ati odi kai. Ati to hawoŋ no hiram, obolo hitigiama binno, kuak atta isia ahuye. ¹⁸ Ojo innafa oyehini to hiji hukua. Etiru isia hiro, ¹⁹ ati ojo iwahiti inno fau, hinyobita inno ibariti, iko iwahiti inno rori, ajiŋu atta higor hiro atta hiro enyie hegiama na anyar. ²⁰ Owuon hidofe innak inno oyehini to huron inno olibo. Etiru isia hiro atta efwotu, ojo hidofe oŋerik haŋer: Eŋarak inak tomwana hunik, ojo hidofe inak tomwana ile, ojo innak hisihai nobotie." ²¹ Atta Yesu hijo do hose, " Eremik iyye eyyani lomo hidiei ahotwe haji atta iyye eŋofok to hotwai ho gufa kuyya hidofe aŋolon ho seriri? ²² Obe iso nobo sihin ne eŋofo nobe oremik aliew, obe hidofe nobo sihin ne edima nobe iso hiyyo oremik etiliew ecala. ²³ Lowuon lobo iko yohe, isiara hetiru!" ²⁴ Atta inyia hijo do hose, "Ihuma hitira to hirro inne etiru itai, nyo te icemit ne eciamari itai, ociem iso huwo itai daŋ te inyia, ofonihini iso ta hatai. ²⁵ Ofonihini iso to tuŋani lo oyita, ojio to tuŋani lobe owuon, odumuni iso tara honyi ade." ²⁶ Atta inyia hijo, "Ara obie no Hollum iyya tuŋai loyyek hinyomo innohonye ta fau. ²⁷ Ofer inyia ta tari atta diote to motie, ojio hinyomoti atta esuru ojio hido inyi obe oyyien hesuru inyi jai. ²⁸ Etusuru fau haŋer to wan nohonye: To hitieri ogitet, hiyyok, attati emak ŋamari la anyarru to hiyyok. ²⁹ Ati la anyar ŋamari, ojio kuak atta a sutak murut nohonye nyo awoŋ dioŋo." ³⁰ Attati inyia hijo, "Etirrijik iso obie no Hollum iko nyo, kuyya nari hitiriami iso no oremik hirri iko inyia? ³¹ Ara iyya hinyomoti no ŋaboli no oyyek hiyyo, ojio inyi ara hinyomoti lettiŋ ta fau. ³² Ati ledulahini ta fau, odietini atta bolori agalik yanik inno mana, atta hidofe ehumak sana innohonye arria hijo anyar emak cieŋ inne ido hajik innohose ta bali nohonye." ³³ To hitirriamita hunna, atta inyia elimak hiram to hose, to hitira nohose hiram nohonye, ³⁴ odule ifa inyia hiro to hose to hitirriamita. Ati nafa owuanari inyia hame, atta inyia hilima hirro to heyiyenak illohonye. ³⁵ To holoŋ nyia, nafa era iŋalio, atta inyia hijo to hose, "ŋefi to olo." ³⁶ Niyya, atta isia ebusari iluluŋ, owu Yesu he isia, owuon ifa inyia beren to togoli. Owuon ifa innak togolisien daŋ aŋati hose. ³⁷ Atta nobo oyyami ne efiriwa diote man efoliahari hifioŋ atta hifioŋ ajiŋai ahotwai ho togoli atta hufut. ³⁸ Ati oyiri ifa Yesu lo ofer to huluri. Etidiet isia inyia ahide atta hijo, "Hetiyenani, ebe ati iyye luŋa eyyen hijo efu iyyohoi ye?" ³⁹ Odioto inyia kuak atta hiriŋ oyyami atta hijo to hari nettok, "Himwara, iliha." Atta oyyami wueta, aduehini ifa hari na anyalam. ⁴⁰ Atta inyia hijo to hose, "Nyo ebaŋ itai? Obe huruk owuon ta hatai?" ⁴¹ Ottu ifa baŋi no obolo to hose, atta isia hifia wati innohose hijo, "ŋai hidofe ille, labaŋ oyyami ojio hidofe hari nettok etira inyia?"