¹ Enyiak inyia eno a hotwai ho sinagog atta arrumu tuŋani loye hani. ² Ati orriŋa ifa hiyyo inyia hijo anyar errosok inyia hijo etilibo inyia tuŋani to holoŋ na Sabato. ³ Atta Yesu hijo to tuŋani lo loye hani hijo, "Tette, owueta to hiji ho hiyyo daŋ." ⁴ Atta inyia hijo to hiyyo, "Holibo mahu hegiamari nalanyar to holoŋ no Sabato, kuyya holibo mahu eturuwori; etilibo tuŋani, wele ettohoi?" Ati oduwehini ifa isia ta mai. ⁵ Oriŋa Yesu to hosie le ejoria ojo hidofe oŋuŋusia to golon na tajia innohosie, atta inyia hijo to tuŋani lia hijo, "Itibisak hani nohoi." Atta tuŋani lia etibisak hani nohonyie atta Yesu etilibok inyia. ⁶ Ojio Farisei atta ŋefie etutubak wati innohosie nyo awak ifa isia iko hiyyo illo Erodia ŋatohoi inyia. ⁷ Niya, owu ifa Yesu iko heyiyanak illohonyie ahari nettok atta iluluŋ no hiyyo ta Galileya iko Yudea ejufari inyia. ⁸ Nafa etiru hiyyo hirro innafa egiama inyia, afanu ifa hiyyo daŋ to honyi man to Yerusalem, Idumia, to oger otifor hari no Yordano, Tira iko Sidonia. ⁹ Elimak ifa inyia to heyiyanak illohonyie heyyani to honyie togoli letting nyo obore ifa iluluŋ no hiyyo hijo hotobiaŋa isia eririek inyia. ¹⁰ Etilib ifa inyia huwo arria tara irruti iko itigemita innohosie. Awak ifa isia hittir inyia ¹¹ Lewolo oyirihien inne ebwot inyia, atta isia ahuyek to hosiere honyie atta yio ojo hidofe ero "Era iyye Lonyi Hollum." ¹² Atta inyia elimak isia hijo hotobiaŋa etuhutek inyia. ¹³ Owu inyia ahide doŋe, atta inyia hililoŋ liyya illafa awak inyie atta isia afanu to honyie. ¹⁴ Atta inyia anyimu tara hosie lefahat tomon harik hijo hotowuana he inyia hijo hefie isia etiyenari ¹⁵ anyar owuon ho golon hefuhari miniaŋa adde. ¹⁶ Atta inyia anyimu tomon harik tara hosie: Simone, lafa esio inyia fure nohonyie hatara Peturu; ¹⁷ Yokobo lonyi Sebedeyo, iko Yoani ilasi Yokobo, illafa efurak inyie Bonajes, hijo ara isia lonyirok ho hila, ¹⁸ iko Anereyo, Philipo, Batulumeo, Metteyo, Tomaso, Yokobo lonyi Alifeyo, Tedeo, Simone lafa ara hetirrijani, ojo ¹⁹ Yuda Iskariote, lafa ottu etinyiaŋak inyia. ²⁰ Atta inyia eno a haŋ, ojo iluluŋ no hiyyo atta afanu to honye inyiak, man obiaŋari isia enyiak adahari imune. ²¹ Nafa etiru woyyo nohonye hirro niyya, atta isia efie eyari inyia, nyio ojo isia hijo, "Obe hoo nohonye egiama na anyar." ²² Ati ojo hegiorok illafa afanu to Yerusalem hijo, "Owuon miniaŋa inno Belsebul to honye," "ojo hidofe to golon no miniaŋa, efuhuta inyia miniaŋa." ²³ Elliloŋu Yesu isia to honye atta hiro do hose to hitimiyyahita, "Jai iso horemik Sitan efuhai Sitan? ²⁴ Lobwanya obie hamai to wan nohonye aŋacio arria, obe iso obie nyia enyiak wueta. ²⁵ Lobwanya haji hame to wan nohonye, obe iso haji enyiak wueta nobo. ²⁶ Loliwari Sitan wan nohonye ojo hidofe obwanya, obe iso inyia oremik wueta, ati atta iso hucuŋi nohonye hiliaha kuak. ²⁷ Ati obe iso lobo tuŋani oremik ajiŋak ahaji ho tuŋani lo ogol inna holo be inyia eniefu atta hifit monye haji do, atta ati hahala haji nyia nyia honyie. ²⁸ Dede elimak naŋ itai, ebusahini iso daŋ lonyirok ho hiyyo, daŋ iko imoriti inno odule isi daŋ hirotta, ²⁹ ati lodule lobo moro Oyiri lo Olibo, obe iso inyia oremik arrumu hahohini no hiyyata, ati odule iso iyyau to honye mak." ³⁰ Ero Yesu ania nyo ojo ifa isia hijo, "Owuon oyiri nebwot to honye." ³¹ Niyya atta hotonye honyi iko ilasira honyi daŋ afanu weta da bali. Efahak isia to honyi hiram hijo ewak isi inyia. ³² Ojo iluluŋ atta ahunyie aŋati honyie atta isia daŋ hijo do honyi, "Owuon hotonye hoi iko ilasira hoi ta bali, osiaha iyye." ³³ Atta inyia hitiraŋ isia hijo, "Haba ŋai ara hotonye iko halasira hoti?" ³⁴ Owolo inyia to hiyyo innafa ettole okudok inyia atta hijo, "Ituwolo, hunna hotonyie hanaŋ iko halasira hanaŋ! ³⁵ Ara tuŋani legiama wahan no Hollum da hanaŋ elasi, inasi iko ahotonye."