¹ Ta halu ho holoŋitek nomuk atta Yesu ŋacohini a Kapernaum, atta hiyyo niyya tara ŋetiru hijio owuon Yesu to hotwai haji. ² Atta hiyyo arriai ŋatubahini to honyie ara nobotie te man obiaŋari mai to hiyyo atta illak weta to oger ha haji. Etiyana ifa inyia hitiyenita innohonyie to hosie. ³ Atta illak hiyyo oŋwa ŋafanu hullo akafini tuŋani ille ŋagole wan. ⁴ To luŋai no hiyyo obe isia oremik ŋeyari tuŋani lia man to Yesu tara atta isia ŋatulok itulit to hide ha haji, to hide ha mai lafa etolojori Yesu, atta isia ŋeliliofok hikafit nafa ofiorori tuŋani lia lo ogole wan. ⁵ ŋegonyu no Yesu hiruk nohosie, atta inyia hijio to tuŋani le eyyokie wan hijo, "Hiito, ahohini hiyyata innohoi. ⁶ Owuon ifa hidofe lomuk hegiorok dia ille egigilo to tajia innohosie hijio, ⁷ Nyo nia ero hallaŋ lia ania? Omoro inyia Hollum. Obe lobo tuŋani oremik ŋahek hiyyata aracie Hollum ofe lobotie.'' ⁸ Tara atta Yesu hiyyen higigilita innohosie atta hifia isia hijo, ''Nyo ne igigilo itai ania ta tajia innahatai? ⁹ Nari nia eliaha wan, hijio nanaŋ to tuŋani ille eyyokie wan hijio ŋahoni hiyyata innohoi, kuya hidofe hijio nanaŋ, 'Tote, obibinak ijotit nohoi, toloto'? ¹⁰ Ati anyar eyyen itai hijio owuon dwaran to Lonyi Tuŋani to ŋahou no hiyyata inno hiyyo daŋ ta fau. ¹¹ Atta inyia hiro to tuŋani le eyyokie wan, ati ajio naŋ ta hoi totte, obibinak ijiotiti innohoi inno ahaŋ. ¹² Tara atta inyia diote kwak atta abibinak ijiotit nohonyie atta ŋeno to hosiere hosie adde. Atta isia daŋ hililiha, atta isia daŋ hitihabuo Hollum hijio, ''Holobe iyyohoi egonyu innak hirro iyya huna.'' ¹³ Atta inyia ŋacahari adde alotifor ha hari na Galilea, atta iluluŋ no hiyyo afanu adde to honyie atta inyia hityana isia. ¹⁴ Ho olot inyia atta inyia ŋegonyu Levi lonyi Alifeyo. Ettole inyia ta haji inna odumari hiyyo musuru atta Yesu hijio to honyie, "Ijufini nayya.'' Atta inyia diote atta ejufari inyia. ¹⁵ Ta halu ha daha no Yesu ho hetiyanak illohonyie ta haji ho Levi. owuon ifa hatamonok ariai arik ha hamojok ho musuru iko heyyak hullo ejufuta inyia. ¹⁶ Nafa egonyu hegiorok illo Farisei Yesu adaha arik ho heyyak ojio hidofe ha hamojok ho musuru atta isia hijio to hetiyanak ho Yesu hijio, "No nyo adaha inyia iko hamojok ho musuru ojio iko heyyak?'' ¹⁷ Nafa etiru Yesu atta hijio to hosie, ''Hiyyo hullo olibo wati obe awak ŋefi ta akim, hiyyo hullo oŋwai hamai isia ofu ta akim, abe nayya attu eliloŋori hiyyo illo olibo, ati attu naŋ ellilloŋori hiyyo hullo heyyak.'' ¹⁸ Ofieruta ifa heyiyanak illo Yoani arik ha Farisei. Atta hilak hiyyo ŋefi hifia Yesu, 'Nyo nia ofieruta heyiyanak illo Yoani arik ha Farisei ojio illohoi obe ofieru? ¹⁹ Ojio Yesu tohosie'' Ofieruta motirak ha hayamani he etole isia daŋ honyie? Obe isia ofieruta le ettole isia ha hayamani, obe isia ofieru nobo. ²⁰ Afanu iso holoŋitek inna ŋeyari hiyyo hayamani to hiji hosie adde, ojio ta far to nyia, atta iso isia ŋafieru. ²¹ Obe lobo tuŋani orifak hitafit no boŋo ŋejuk to higwasit no boŋo marwani, lehuma lobo ani ogwasari iso hitafi ŋejuk to boŋo to nia marwani adde atta higwasit nia ŋebibolori agalik nara to hitieri. ²² Obe lobo ejuho balu ŋejuk to hotwai he ihulo marwani, le huma inyia ania obwor iso balu ne ihulo atta balu he ihulo biaŋan. Balu ŋejuk anyar ejuhohini to hotwai he ihulo ŋejuk.'' ²³ To holoŋ no Sabato ohu Yesu iko heyiyanak illohonyie to hotwai matta inno ŋama, ho olot isia to hotwai matta atta heyiyanak sonya gila ŋama atta riaja. ²⁴ Teyya atta Farisei hijio to honyie, ''Toriŋai, nyo nia ehuma isia sehin no odwa to holoŋ no Sabato?'' ²⁵ Etirraŋ Yesu to honyie hijio, ''Ibe itai ehienu hirro innafa huna ehuma Davide iko hiyyo illafa owuon daŋ honyie loniamai isi? ²⁶ Ohu ifa inyia ahaji no Hollum ha ara Abiatara afadiri ille obolo wan atta inyia daha imuniaha hunna odwa wati inno obe lobo tuŋani adaha aracie hehuhumak adaha hamai adaha, ojio hidofe Davide esio nomuk to hiyyo illohonyie?'' ²⁷ Atta inyia elimak to hosie hijio, "Ara ifa Sabato no hiyyo, ati obe ifa esio huwo ta Sabato. ²⁸ Iyyania ara Onyi Tuŋani Habu lo Sabato.''