¹ Hitieri no sayye no Yesu Kristo ille Lonyi Hollum. ² Iyya egiorohini to buk no Isaya hekilani, ''Itiriŋei, efahu naŋ efahati lalaŋ ahosire hatai, tuŋani lia ohu ŋehuhumak hikoi nahatai. ³ ''Eyyorro lobo tuŋani hillilloŋo to tim, 'Ihuhuma hikoi no obis ta Habu; ihuhumak hikota innohonyie no obis.''' ⁴ Ifa awoŋ Yoani, etifoto ifa inyia to tim, ojio hidofe etiyana hitifoto no amitu no hiyyata iko hahohini na Habu anyar ebusak isia hiyyata inno hosie. ⁵ Ofu ifa hiyyo daŋ to doŋe ho Yuda iko hiyyo illo Yerusalem daŋ to honyie etifotu ifa inyia isi daŋ ta hari ho Yordano, atta isia rigoŋo iko hibo no hiyyata innohosie anyar ohori ade. ⁶ Eciefita ifa Yoani boŋo inna ara ahofir inno konikoni, ojio hittodit no honyie ara amuhunyo te ihuluk, adaha ifa Yoani Iwarihien iko; hisio no hilofiri. ⁷ Etiyena inyia hijio, "Ottu iso lobo tuŋani ta halu hanaŋ la agalik, nyo abe naŋ asiru hitiwet inyia ajo hidofe abe aremik ahou hamuha innohonyie. ⁸ Ebatisio naŋ itai to hifioŋ ojio iso inyia ottu hibatisio itai to Oyiri no Olibo.'' ⁹ To holoŋitek innafa niyya, ottu ifa Yesu to Nasaret no Galilea, ojio Yoani ebatisio Yesu ta hari ho Yordano. ¹⁰ Ifa awoŋ Yesu to hifioŋ, egonyu inyia ido aŋa ojio Oyiri ottu afau to honyie iyya cieŋi la ara wolo, ¹¹ ojio hillilloŋo nobo ottu te ido ''Iyye Lonyi hanaŋ ille amuno naŋ. Amuno naŋ iko hoi.'' ¹² Esio Oyiri Yesu heno atim, owuon ifa inyia to tim holoŋitek tomwana aŋwan, ojio Sitan atta hicem inyia. ¹³ Owuon ifa inyia arik ho ciaŋi hahonyak, ojio anjilohien egiem hirro innafa awak inyia. ¹⁴ Ifa ta halu ho heniefu no Yoani, awoŋ Yesu a Galilea le etiyana sayyie inno Hollum ¹⁵ atta hijio "ŋawoŋ holoŋ nafa, eliaha obie no Hollum. Itiyite adde tara hiyyata ojio hidofe iruho sayye inno Hollum.'' ¹⁶ Nafa allaŋari Yesu hari na hittok no Galilea atta inyia ŋegonyu Simone iko Anereyo hilasi Simone, ebiro hiririehita ta hari no mile nettok, ojio ifa isia ara heririahak, ¹⁷ eijo Yesu to hosie, "Ifanu ta halu hanaŋ ajio naŋ emak itai a heririahak illo hiyyo.'' ¹⁸ Atta isia ŋebusk hiririehita innohosie atta ŋefi ta halu ho Yesu ¹⁹ Nafa ŋeno Yesu kai alamarai, egonyu inyia Yokobo onyi Sebede ojio Yoani ilasi honyie, owuon ifa isia to togoli ojio isia oyya hiririehi, ²⁰ eliloŋo inyia isia; atta isia ŋebusak monye hosie Sebede to togoli iko hegiamak illohonyie atta isia ŋejufak Yesu. ²¹ Atta inyia ŋeno Akapernam to holoŋ no hiyyom atta ŋajiŋak ta haji imojit no Yudei atta hitiyana. ²² To hiba no Yesu ta haji imojit atta hitiyana, ellilliha ifa isia to hitiyana no Yesu, etiyana ifa Yesu isia to hilohitok obe ara iyya no hegiorok. ²³ Ta haji nafa he imojit, owuon ifa lobo tuŋani ho Oyiri ne ebuot. Oyyo tuŋani, ²⁴ ''Hegiem iso iyyohoi nyo to hoi, Yesu lo Nasarit? Itu iyye hijio anyar etihar iyye iyyohoi? Ayyen naŋ hijio ŋai iyye. Ira iyye lonyi Hollum ille Olibo wan!'' ²⁵ Eriŋ Yesu miniaŋati atta hijio, ''Todwehini, woŋ adde tara honyie!'' ²⁶ Ta halu ho ŋebirok no oyiri ne ebuot inyia to fau, atta yio no lokwat ojio miniaŋati atta awoŋ abali tara honyie. ²⁷ Ellilliha ifa hiyyo daŋ atta hifia wati, nyo innaŋ? hetiyenita ŋejuho iko hilohitok! Ata inyia ŋelimak oyyirihien inne ebuot, ojio isia atta baŋi isia.'' ²⁸ Tawak atta sayye inno Yesu ŋesarai amasik daŋ aŋacio inno okudak Galilea. ²⁹ Nafa ŋebusak isia tawuak haji imojit, atta isia ŋefi ahotwai ha haji no Simone arik ha Anereyo, ojio Yokobo arik ho Yoani. ³⁰ Oŋwai ifa hamoni Simone iko nohon no wan, dede elimak isia to Yesu ŋuai no tuŋani nafa nyia. ³¹ Ojio Yesu atta hittoŋ inyia ta hani atta hitidiet inyia ahide; atta ŋuai nyia ŋeno ade ojio Yesu atta hitiara higiama isia. ³² Ifa lera iŋalio ta halu haŋasuori no holoŋ eyyen isia haŋuak ojio hiyyo inne enief miniaŋa. ³³ Otubai hiyyo inne bore na gala ara nobotie tekat na haji. ³⁴ Etuluahu Yesu innafa oŋuai wati iko iŋwueti arriai, ojio hidofe ebirei miniaŋa ariai, obe ifa Yesu ebusak miniaŋa herara nyio oyyen ifa isia inyia. ³⁵ Odioto Yesu ta harie beren ho oriok; atta inyia ŋeno amai na aracie inyia alobotie atta mojo dia. ³⁶ Osiaha ifa Simone iko hiyyo illafa woun dia inyia. ³⁷ Orumu isia inyia atta hijio to honyie, ''Osiaha hiyyo iyye bidaŋ.'' ³⁸ Eijo inyia, ''ŋefie anobo mai ahotuai bore na gala, anyar ahu naŋ iso hitiyana dia. Hiram nyia nia attu naŋ enni egiamari.'' ³⁹ Atta inyia hilur Galilea daŋ, etimojo inyia to sinagogi innohosie atta inyia hidofe atta ŋefuhai miniaŋa adde. ⁴⁰ Ottu tuŋani ille oŋwai ha talulu to honyie; atta tana to honyie, atta inyie rigoŋo ta fau. Atta hijio to honyie. Leremik iyye hitilibo nayya.'' ⁴¹ Ohu ifa inyia ho higigilo no ŋamehini no hitigiemita, odumu Yesu hana nohonyie atta hitan inyia, ejio to honyie, ''Egiem naŋ. ⁴² Tolibe.'' Dede ebusak talulu inyia, ŋetilibik Yesu inyia. ⁴³ Esor Yesu inyia atta ŋefuhai inyia tawuak ade, ⁴⁴ Eijio Yesu to honyie, anyar dede ibe iyye ilimak nomuk hirro tolobo tuŋani, atti ino ituhutek wan nohoi ta fadiri, isiara hirro innafa ojio Musa to liboi to nohoi, hatara ahitihutita to hosie ⁴⁵ Ojio inyia atta ŋeno ade ŋelilimari hiyyo daŋ. ŋesisarik halaŋ le hiram hijio obe ifa Yesu ohu bolioŋ anobo abore gala; emak ne inyia hetolojo to waha anyar ofu hiyyo to honyie misihi daŋ.