¹ Eboŋohini ifa fadirihien daŋ ifa tomotie iko maruwak ojo hegiorok iko hewahak daŋ illo Sanhedrin. Efit ifa isia Yesu atta arihori inyia ade teyya. Atta hefi hisio ade to Pilato. ² Efi ifa Pilato inyia, "Era iyye Habu lo Yudea?" Etiraŋ inyia to honyie hijo, "Iyya lejo iyye." ³ Ati eyyani ifa fadirihien hullo hitaha iko irositi inno oluŋa to Yesu. ⁴ Ati edas Pilato hifi inyia, "Obe iyye etiraŋ innia?" To riŋe oluŋa irositi inno orosok hiyyo tohoi. ⁵ Ati obe ifa inyia etiiraŋ nobo hiram, to nia atta Pilato hillilliha. ⁶ ŋasi daŋ to hiyyom nettok ohou mandir lia efita iyya awak hiyyo. Owuon ifa lobo tuŋani le efita to kijan lia ara Baraba. ⁷ Owuon ifa inyia iko ilamuk hiyyo ille eŋere okuma ojio hidofe ottohe hiyyo. ⁸ To nia afanu iluluŋ no hiyyo to Pilato hefiari inyia hehumari iyya inna ho holoŋi. ⁹ Etiraŋ Pilato tohosie hijo "Ewak itai hijo anyar ahek nayya Habu lo Yudea ta hatai? ¹⁰ Nyo oyyen ifa Pilato hijo eyyani ifa isia Yesu to hayin. ¹¹ Esusuta hehumak illo hittaha hiyyo daŋ hijo anyar ohou Pilato Barabba. ¹² Etiraŋ Pilato to hosie hijo, "Hehum iso naŋ nyo to Yesu ille ellilloŋo hiyyo hijo Habu lo Yudea? ¹³ Ati ewuwuoŋita isia hijo, "Isihiok inyia!'' ¹⁴ Etiraŋ Pilato hijo, "Nyo loru ne lehum inyia? Ati ewuwoŋita isia nalagalik hijo, "Isihok inyia ." ¹⁵ To nia awak Pilato hitilik iluluŋ no hiyyo, atta ahek Barabba tohosie, ati ohek inyia ifa Yesu hesihohini ille abaha. ¹⁶ Atta ati oseŋer eyari inyia akal ha haji ne efurek hijo Pratorio, hidofe attubahini iluluŋ no oseŋer to honyi daŋ. ¹⁷ Atta hidofe eticiofok te inyia boŋo imoli atta hiyyir ihita no hukuwa atta eticiofok to ho honyie. ¹⁸ Teyya atta isia hitiara hifonya inyia hijo, "Moŋ, Habu lo Yudea!'' ¹⁹ Abaha isia ho nohonyie to halio atta hidofe rigoŋo to honyie. ²⁰ Ifa attohu isia elohitari inyia, atta isia ahou boŋo nara atta eticiofok boŋojin innohonyie atta isia eyari inyia hesihohini to kuruce. ²¹ Nafa ajiŋe isia, eboŋ isia iko lobo lo Sirene fure nohonyie Simone lo ottu ta mana. Ara inyia monye lo Alisandoro iko Rufus. Orossok isia inyia hotolororoi kuruce no ofuyeri esihohini Yesu. ²² Eyari isia inyia amai ne efurek golgota (nolo ojo mai no ho''). ²³ Atta isia etimatak inyia hifioŋ inno ajalaŋi huna eharra iko yani ne efurek mura, ati ebo inyia himat. ²⁴ Teyya atta isia esihok inyia atta hihor awak boŋojin innohonyie atta hibak muwaŋa hijo ŋai iso eyari boŋojin. ²⁵ Esihok isia inyia to sa hitahunihi. ²⁶ Egiorohini ifa irositi to hide ho honyie hijo, "Habu lo Yudei." ²⁷ Esihok ifa isia iko inyia hahalak lohorik, owuon lobotie to oko hani inyiet ojo lobotie to oko hani ihorroŋ nohonyie. ²⁸ ''Teyya etisiru higierita hunna lojo, esihohini inyia anobotie iko heyyak." ²⁹ Omoro halotok Yesu atta huta inyia to hafiala hijo, "Iyye lia ejo hijo etatur naŋ haji imojit nettok atta hinyiak aduhohini to holoŋitek hunik, ³⁰ iko hido itiluwahu wan nohoi. Isuru iyyania to hide ho kuruce!" ³¹ Iyyania elohitari fadirihien hullo hittaha inyia to wati illo hosie hijo "Etilohu ifa inyia ilamuk ati, nyo obe ati inyie etilohu wan lohonyie?" ³² Isiara Kristo, Habu lo Isarail hotodou aini afau to kuruce, hijio anyar honyie egonyu iyyohoi atta hidofe huruk to hoi." Ati to ilia illafa esihohini iko inyia to kuruce atta hidofe himor inyia. ³³ To holoŋ tomon harik man holoŋ hunik ne iŋalio orioho ifa fau daŋ edumele tirtir. ³⁴ Nafa era sa hunik atta Yesu hitikuwat hirro nohonyie binno hijo, "Eloi, Eloi, Lama Sabak tani? No lo ojo Hollum hanaŋ Hollum hanaŋ nyo ebusak iyye nayya? ³⁵ Etiru hiyyo illo oweta hirro nohonyie atta hijio, "Itiriŋai, eliloŋo inyia Elija." ³⁶ Enyior ifa lobo lohosie atta edutok boŋo a hotwe ho hifioŋ inno eruwattiŋo atta efihak to hita atta etimatak inyia atta hijio "Idek hoi, hetiwolo kuya ottu iso Elija etihoru inyia. ³⁷ Enyiak ofe Yesu yio no lo kuwat binno atta inyia ye daŋ. ³⁸ Teyya atta boŋo na haji imojit guwasa hame akali arik to hide man afau. ³⁹ Atta ettok lo oseŋer lia weita dia, egonyu inyia Yesu oye atta hijio, ''Dede, ara hada tuŋani ille Lonyi Hollum. ⁴⁰ Owuon ifa ŋoruwo innafa eriria ta alamarai. To hiji hosie owuon Maria Madalina iko Salome ojio Maria hotonye Yokobo ille hittiŋ iko Yose. ⁴¹ Ejufuta ifa ŋoruwo huna Yesu nafa holowuon inyia ta Galilea oluwahari inyia. Afanu hidofe ŋoruwo innak he inyia man Yerusalam. ⁴² Nafa era kaikai no holoŋ nafa ehuhumari isia daha no Sabato. ⁴³ Atta Yosefu awoŋ to doŋe no Arimatea. Ara ifa inyia ettok lo hewahak ho hirro, ojo hidofe inyia etila obie no Hollum. Atta inyia ŋajiŋak to Pilato hefiari wan no Yesu. ⁴⁴ Ati ellilliha Pilato ta taji nohonyie hijio, oye Yesu dede? Ati ellilloŋ inyia ettok lo oseŋer hefiari inyia kuya loye hada Yesu. ⁴⁵ Nafa etiru Pilato hijo oye Yesu tara lettok lo oseŋer, aŋatak inyia Yosefo heyari wan nohonyie. ⁴⁶ Nia eyyani Yosefo boŋo no lo buwor atta adutu wan no Yesu to kuruce afau atta hibubun boŋo atta etiferik te ilume nafa ottulahini te ibak, atta ettaborok moru no obolo to hutuk he ilume. ⁴⁷ Atta hidofe Maria Madalina iko Maria honye Yose egonyu mai nafa onuhari Yesu.