¹ Nafa otuho holoŋ no hiyyom no Sabato enyiaŋu, Maria Madalina daŋ ha Maria honye Yokobo ho Solomone, hiyali ne awak isia efi ŋeyalak to wan ho Yesu holobe onuhahini inyia. ² To motie beren to hitieri ne isabit, ofu isia elume ho Yesu nafa eduoŋu holoŋ. ³ Ero isia to wati te innohosie, ''Ojio, ŋai iso owu ŋetibuluŋai ade moru to hoi tekat he luime?'' ⁴ Ifa ewolo isia ilume nyia, atta isia egonyu hijio ŋetibuluŋari hada moru nyia ade, nafa hittok. ⁵ Nafa ajiŋak isia ilume atta isia ŋegonyu lobo hiito eciefita hofito no lobwor, ettole tologer he inyiet, atta isia baŋi. ⁶ Atta inyia hijio to hosie, ''Hotobiaŋa itai ebaŋ. Esiaha itai Yesu, ille ho Nasarit, lafa esihohini. ebuhu inyia! Obe inyia teni. Itiwolo mai nafa etifierihini hiyyo inyia. ⁷ Ati ifeti, ilimak hejufutak illohonyie arik ho Peturu hijio ŋeno inyia ahosiere hatai a Galilea. Efi iso itai egonyu dia, iyyia nafa elimak inyia ta hatai.'' ⁸ ŋajiŋu isia abali atta ŋanyieru te ilume; okikir wati innohosie ojio isia eliliha. Obe isia ero innak hirro to lobo tuŋani nyo abaŋ ifa isia. ⁹ Ifa era ŋati motie beren te isabit, ta halu ho ŋebuhu nohonyie, olieu inyia hosiere to Maria madalina, nafa efuhai inyia miniaŋa hattarik tara honyie. ¹⁰ Atta inyia ŋeno ŋelimak hiyyo illafa owuon daŋ honyie, ejiriŋa inyia ojo hidofe oyio. ¹¹ ŋetiru isia hijo owuaran ojo hidofe inyia egonyu to wan to nohonyie, ati obe isia eruk. ¹² Ta halu ho hirro innia oliew inyia to hiyyo lohorik, iyya nafa olocitari isia amisihi. ¹³ Ofu isia ŋelimak illak heyiyanak, ati obe isia eruk to hosie. ¹⁴ Atta ati Yesu hidoŋ to tomon Holobotie illafa arasa cio to terefeja, atta inyia hiriŋ isia to biaŋan no hiruk iko to golon na tajia innohosie, nyo obe isia eruk to hiyyo illafa egonyu inyia ta halu ho ŋebuhu nohonyie to ye. ¹⁵ Ojio inyia to hosie, '' Ifeti afau bi daŋ, etiyanari sayye to hirro innafa oyeuni bidaŋ. ¹⁶ Tuŋani le eruk atta arrumu batisimo owu iso inyia etilohini, ojio lia lobe eruk aŋotihini ye to honyie. ¹⁷ Odule iso hutuhutita hunna ho hiyyo hullo eruk. To fure nanaŋ, ofu iso isia ŋefuhai miniaŋa. ¹⁸ Ofu iso isia hiro to hikieni ŋejuho. Ofu iso isia ŋahurru munok ta hass te innohosie, ojio le ŋefi isia himat nomuk hirro inne ittohiti, obe iso oremik eriafu isia. Ofu iso isia attiork hass innohosie ta haŋuak, ojio isia atta libe.'' ¹⁹ Ta halu ho hiro na Habu to hosie, atta inyia eno ido atta eno hittole ta hani he inyiet no Hollum. ²⁰ Atta heyiyanak ŋefie etiyanari ta masik arria, ojo Habu odule daŋ higiama ojo hidofe etiraŋ hiram nohonyie te isia to hutuhutita innafa oliew to hosie.