¹ Ebuhari ifa holoŋitek arik inno ofu hiyyo eyyomori far na laŋan iko imune nobe ahabuok. Atta fadirihien arik iko hegiorok hitiara siaha hijo jai iso eniefuni Yesu to hinyaba anyar ettohoi. ² Atta isia hijo, ''Obe olibo heniefu inyia to hiyyom nettok hotobiaŋa hiyyo ewuwuoŋita binno.'' ³ Owuon Yesu ifa to Betani to doŋe ba Simone tuŋani la talulu, hala daha isia, atta hiito noŋorwo ŋawoŋ he ihulo inna owuon ho hiyali inna ogol to hinyaŋa binno. Atta inyia hibwor ihulo nyia atta ŋejuhok hiyali to hoo ho Yesu. ⁴ Ati owuon ifa lomuk hullo ejoria. Atta isia hiro to wati illohosie atta hijio, ''Nyo nia etitiarak tuŋani nia hiyali nia bi asai? ⁵ Oremik ida hiyali nia ŋetinyaŋani to arobia hisiha hunik, ojio ida arobia innia atta hiyyo ŋalwahari lociaŋak.'' Atta isia hiriŋa inyia. ⁶ Ati ojio Yesu hijio to hosie, ''Ibusak inyia hame. Nyo ne itigiama itai inyia? Ehum inyia dede sehin ne elahaman binno ta hanaŋ. ⁷ Ewuon itai ho lociaŋak holoŋitek daŋ, ojio ewak itai, eremik itai higiem no lanyar to hosie, ati ebe iso itai etole daŋ hanaŋ man fur. ⁸ Ehuma tuŋani nia iyya oremik nohonyie ojio hidofe inyia ejuhok hiyali inna to wan hanaŋ anyar ehuhumari inyia nayya to ŋanuhahini no wan hanaŋ. ⁹ Dede ajio naŋ ta hatai, to doŋiok huna etiyanari hiyyo sayye inno olibo, ero iso hiyyo to hirro inne egiem tuŋani inna.'' ¹⁰ Atta Yuda Iskariote, lobo lo Tomon harik, ŋeno adde to ettaha ilo fadirihien hijo anyar etinyaŋai inyia Yesu to hosie. ¹¹ Nafa ŋetiru inyia, atta isia mune atta ŋaciorok to Yuda Iskariote hijo anyar efu isie adumak to honye arobiyaha. To holoŋ to nyia osiaha Yuda hikoi hijo anyar awu inyia hisio Yesu to hosie. ¹² To hitieri no holoŋ no hiyyom inna adahari isia imune inna obe ahabuok, nafa ŋatohe isia ker no hiyyom, atta hejifutak hifi inyia hijo, ''Nari mai ne ewak iyye iyyohoi anyar ihuyeri iyye ŋadahari hiyyom na Laŋan?'' ¹³ Atta inyia ŋefahak illak heyiyanak lohorik, atta ŋelimak to hosie, ifeti abore gala, orumek iso tuŋani ille eyuhita moti no hifioŋ itai. Ijufari inyia man ahaji nyie ohuyeri inyia ŋajiŋahini. ¹⁴ Itijo to monye haji hijio, ojio, "Hetiyanani hijio ''Tahu haji no hatamonok inna afanini isia ŋadahari to hiyyom lo Laŋan ho heyiyanak illalaŋ?''' ¹⁵ Etuhutek iso inyia tahatai haji inna to hide arik ho hirro daŋ hunna hiyomita ojio hidofe ehuhumak daha te iyyohoi. ¹⁶ Tara atta heyiyanak ŋefi; atta isia ŋarumu hirro iyya nafa ojio Yesu tohosie, atta isia ŋehuhumak daha to hiyyom to na laŋan. ¹⁷ Nafa era harie otu Yesu ho heyiyanak tomon ho lohorik. ¹⁸ Haladaha isia, ojio Yesu to hosie, Dede ajio nayya ta hatai, lobo lahatai ille adaha daŋ hanaŋ etinyaŋak iso nayya.'' ¹⁹ Atta isia daŋ hijoria, ojio hidofe isia daŋ lobotie lobotie hijo to honyie, "Dede obe ara nayya lia?'' ²⁰ Etiraŋ Yesu to hosie hijo, "Ara inyia lo tomon ho horik, inyia lia eyari hani nohonyie ikanaŋ to huduti nobotie. ²¹ Oye iso Onyi Tuŋani iyya egiorohini ifa te inyia. Orru iso binno to tuŋani le etinyaŋai Onyi Tuŋani! Olibo nobe ifa inyia esini.'' ²² Ha ladaha isia, odumu Yesu imune atta hijak atta hibun, atta hisio to hosie, atta hijo, "Ibeti inna ara inaŋ wan nanaŋ." ²³ Atta inyia adumu ikobo atta hisio humo to Hollum atta hisio to hosie, atta isia daŋ himat. ²⁴ Ojio inyia to hosie, "Ara innaŋ hoto nanaŋ inna owuoni wan to hiyyo arria. ²⁵ Dede ajio naŋ ta hatai, abe iso nayya enyiak himat hifioŋ inne ajalaŋi, man to holoŋ iso inna attuni naŋ himat hifioŋ inne ajalaŋi ŋejuho to obie no Hollum.'' ²⁶ Nafa attohu isia hidolo no fure no hitihabuo no Hollum, atta isia ŋefi man adoŋe ho Oliveto. ²⁷ Ojio Yesu to hosie, ''Efi itai daŋ ŋahuyei to hiram hanaŋ.'' Nyo egiorohini ifa hijo, "Attohe iso naŋ heyohoni ojio kioro daŋ atta ŋessarrai.' ²⁸ Atti tahalu ho ŋebuhu hanaŋ, ahu iso naŋ to hosiere hatai a Galilea.'' ²⁹ Etiraŋ Peturu to honyie, ''Erruat ida hido hulloŋ bi daŋ, abe naŋ aremik hurruat tuŋ.'' ³⁰ Ojio Yesu tohonyie, ''Elimak naŋ tohoi dede, ta tari inna holobe hohoro elok hinyiahita arik, ehu iyye risai nayya hinyahita hunik.'' ³¹ Ojio Peturu hijio, ottohe ida hido hiyyo nayya daŋ hoi abe nayya aremik hibo iyye tuŋ.'' Ero isia daŋ nobotie. ³² Atta isia hiba ta mai inna ara fure Getesemani, atta Yesu hijo to heyiyanak illohonyie, ''Itihunyai to, hala mojo nayya''. ³³ Atta inyia ŋeyari Peturu, Yokobo arik ho Yoani daŋ honyie, atta hitiara hijiriŋa binno ojio taji nohonyie odiaha. ³⁴ Atta inyia hijio to hosie, ''Odiaha taji nanaŋ binno iyya ajo naŋ ayye. Ituwuetai inni ejio itai ehum riŋa.'' ³⁵ Atta Yesu hihut alamarai kai, atta ŋeno rigoŋi to fau, atta inyia mojo, loremik ira, isiara holoŋ no diahai hatallaŋ tara hanaŋ. ³⁶ Atta inyia hijo, ''Baba, Monye, eremik iyye higiem hirro daŋ. Iyari imatit inna tara hanaŋ ade. Ati obe ara nayya awak, ati ara nohoi.'' ³⁷ Atta inyia ŋacohini atta ŋarrumu isia ojioto, atta inyia hijo to Peturu hijo, ''Simone, ejioto iyye? ³⁸ Ibe iyye iremik riŋai saa nobotie? Itiriŋai daŋ ejio hidofe emojo hijo anyar ibe itai eruk hisusuta. Awak oyiri, ojio wan elik.'' ³⁹ Atta Yesu hinyiak ŋaciahari omojori, atta hidas imojiti innara omojori inyia. ⁴⁰ Atta Yesu hinyiak ŋaciohoni to hosie atta ŋarumek isia daŋ ojioto, nyo emoŋita isia ifa binno, obe oyyen hijio nyo iso nia efi isia hijio to honyie. ⁴¹ Atta Yesu hinyiak awoŋ hitahunihi atta hijio to hosie, Helerasa itai jiote? Aremik! awoŋ holoŋ. Itiriŋai! etinyiaŋahini Onyi Tuŋani ta has ho heyyak. ⁴² Ititte, ŋefi. Itiriŋai, hetinyiaŋani hanaŋ lia eliaha aŋati.'' ⁴³ Helero inyia, atta Yuda, lobo lo Tomon ho lohorik arik heluluŋ no hiyyo ariai illo owuon ho feria arik ha fatigioho, fadirihien, hegiorok arik ha marwak illo doŋe. ⁴⁴ Atta hetinyaŋani lo Yesu ŋelimak iluluŋ no hiyyo hutuhuti hijio, ''Lia ahu naŋ hijur homom nohonyie, inyia lia. Iniefu inyia atta itai eyari atti ibaŋa abak inyia. ⁴⁵ Nafa eba Yuda, atta inyia ŋehutok to Yesu, atta hijio ''Hetiyanani!'' atta hijur homom nohonyie. ⁴⁶ Teyya, atta isia ŋeniefu inyia tid atta ŋeyari inyia. ⁴⁷ Atta ati lobo lohosie lafa owueta ho Yesu ŋasutu demi atta hiŋut hiyyok no pit lafa ho fadiri lettok atta ŋasalu hiyyok nohonyie ade. ⁴⁸ Atta Yesu hiro tohosie hijio, "Efanu itai ta hanaŋ ho feria arik ho fatigioho hijio ewak itai ŋeniefu nayya iyya ohoho?'' ⁴⁹ Holoŋitek daŋ awuon naŋ daŋ hatai ta haji imojit inna hitok, no nyo ifa ebe itai eniefu nayya. Eba hirro hunna daŋ hijio anyar etisiru higierita. ⁵⁰ Atta heyiyanak daŋ ŋebusak inyia atta hurwat. ⁵¹ Atta lobo nyarhaluti ŋejufari inyia le eciefita boŋo nobotie inna ne eluro to wan honyie lafa ejufuta Yesu. Nafa eniefu hiyyo inyia ⁵² ebusak inyia boŋo atta hurwat aŋaturre. ⁵³ Orihori isia Yesu to fadiri lettok. Ojio ettaha arik ho hegiorok iko marwak illo doŋe ottubahini. ⁵⁴ Ojio Peturu ejufuta Yesu alamarai, man to rwat ne ettok la fadirihien. Ettole inyia to hiji ho oseŋer illo osuja hima anyar onok wati innohosie. ⁵⁵ Osiaha ettaha iko hewuahak illo Yudei hirro hijo ewak isi arosok Yesu hiram no oŋotohini isia ye to Yesu. Ati obe isia orrumek nobo hipali to honyie. ⁵⁶ Afanu hiyyo ariai hulo ero irositi to Yesu ati oteler isia. ⁵⁷ Odioto lomuk ahide atta ŋarosok inyia hijio, "Etiru ifa iyyohoi inyia ojio hijio, ⁵⁸ 'Etatur iso naŋ haji ne tok imojit ne oduhohini tahas, ojio ta halu ho holoŋitek hunik aduhok iso naŋ nobo inna obe oduhohini ta has.''' ⁵⁹ Ati obe irositi innia hosie ocialari. ⁶⁰ Atta fadiri lettok dioto ahide to hiji hosie atta hifi Yesu hijo, "Ibe iyye iwuon ho hitiraŋi? Hirro huna orosok hiyyo hulloŋ to hoi? ⁶¹ Ati oduehini inyia atta nyai he etiraŋ nobo. Enyiak fadiri lettok hifi inyia hijio, "Iyye Kristo, Onyi Hollum?'' ⁶² Etiraŋ Yesu hijio nayya lia. Ati egonyu iso itai Onyi Tuŋani ille ettole ta hani he inyiet ho golon ojio iso hidofe itai egonyu inyia aŋawoŋ inyia he itiran ne ido'' ⁶³ Atta fadiri lettok higwas boŋo nohonyie atta hijio, ''He lewak iyyohoi innak hiyy illo oyyen hiram inna? ⁶⁴ Heletek itai ŋetiru teleri no honyie. Egigilo itai nyo tohonyie? Atta isia daŋ hitiraŋ hijio, Osiru ye to honyie. ⁶⁵ Atta lomuk hitiara mita hamilak to homom honyie atta ŋefitak boŋo to homom honyie atta hinaŋ inyia atta hijio to honyie, ''Totenu tuŋani la anaŋ iyye!'' Atta oseŋer ŋeyari inyia abahari. ⁶⁶ Etole ifa Peturu to rut atta nobo hoduoti hegiamani na fadiri lettok awoŋ to honyie. ⁶⁷ Atta egonyu Peturu osuja hima anyar etinok wan nohonyie, atta inyia hidor Peturu. Atta hijio, "Ewuon ida iyye ho Yesu ille ho Nasarit.'' ⁶⁸ Ati orisai inyia atta hijio, "Abe naŋ ayyen hijio nyo nia ero iyye ojio hidofe abe naŋ etiru. Holojiŋai inyia te ikat atta hohoro hillok. ⁶⁹ Enyiak hegiamani nia ŋegonyu inyia atta hinyiak hidofe hitiara ŋelimak hiyyo ille etira wati hijio, "Lobo illohoi lo heyiyanak!.'' ⁷⁰ Atta inyia hinyiak risai. Nafa era gaa, atta hiyyo ille lowuon te hijio to Peturu, ''Dede iyye lobo, nyo ira iyye la Galilea.'' ⁷¹ Atta inyia hitiara hipita wan nohonyie atta hidofe hituŋo hijio "Tuŋ, dede abe nayya ayyen tuŋani le ero iyye.'' ⁷² Atta hohoro hillok hitarihi nohonyie. Teyya atta Peturu ŋagilu hikienita innara ero Yesu to honyie hijio, "Holobe hohoro enyiak hilok hitarihi, erisa iso iyye nayya hibworita hunik''. Atta inyia yio binno.