¹ Nafa ŋeno Yesu adde ta haji imojit inna hitok atta lobo hijufitani hijio tohonyie, To riŋai Hetiyanai, obolo moru hunaŋ ojio hidofe hajik hunaŋ elahaman!'' ² Ojio Yesu to honyie ŋegonyu iyye hasik hunna obolo wati? Obe iso nobo moruo arasa to horuoŋ ho nobo. Etatturok iso isia daŋ to fau. ³ Nafa ŋahunyai inyia to doŋe ho Olifeto nafa owuon ahosiere ha haji imojit nettok, afanu ho Peturu, Yokobo, Yoani arik ha Anerea, isia hamai, atta isia hifia inyia, ⁴ ''Ilimak iyyohoi anu iso owuon hirro innia? Nyo iso lotu hijio anyar etihutek iyyohoi hijio ofu iso hirro innia hiba?'' ⁵ Atta Yesu hitiara hiro to hosie hijio, ihuma hiriria, hotobiaŋa lobo tuŋani etubunyai itai. ⁶ Afanu iso hiyyo ariai to fure nanaŋ hulo ojio, Nayya le Kristo, atti etubunyai iso isia hiyyo ariai. ⁷ Eŋetiru itai hijio owuon iso riem ijio hidofe itai itiru huwo ero hijio eriem iso iyyohoi, hebaŋ; nyo olibo afanu hirro innia daŋ holobe hisidi no fau. ⁸ To nyo ofi lomuk to doŋe hosie anobo doŋe oriomori, ojio hidofe hiyyo illo obie nobo ofu to nobo obie oriomori. Owuon iso okitik to doŋiok daŋ hunna olufa wati ojio iso hidofe hiŋa inna hitok ottu iso. Atti ara hirro innia hitierita inno hitigiemita hunna obolo. ⁹ Ihuma riŋa wati innahati. Eyyari iso hiyyo itai to okiko ojio iso hidofe abaha itai ta haji imojit. Eyari iso hidofe itai ahosiere ho Mamur ojio hidofe ahosiere ha habuok to fure to nanaŋ, anyar ilimak itai huruk nahatai to hosie. ¹⁰ Ati to hosiere ho hisidi na fau anyar elimahini sayye inno olibo to hiyyo hunna ta fau daŋ. ¹¹ Eŋeniefu isia itai atta hisio itai to okiko ibaŋa hebaŋ hijio nyo iso nia efi itai hiro, irara iyya esio hiyyo ta hatai to holoŋ to nyia. To nyo obe ara hiro nahatai ati hiro no Oyiri inna Olibo. ¹² Esio iso lobo halasi honyie to ye, ojio monye esio onyi honyie, ojio hidofe durre orosok monyie hosie to ye. ¹³ Oliwari iso hiyyo itai daŋ to fure to nanaŋ. Ati lia lo odihu man to hisidi etilohini iso tuŋani lia. ¹⁴ Eŋegonyu itai imuyak inna etumura hotwai na haŋ owueta tamai inna obiaŋari inyia osiru awuetari, anyar ilia owuon wati to Yudea herwata ahide doŋiok. ¹⁵ Isiara le ehiana wan hetiru na anyar. Hotobiaŋa lia to hide haji esuru afau ha haji hijio awak inyia ŋadumu nobo sihin ta haji honyie, ¹⁶ Isiara li owuon wan ta mana honyie hotobiaŋa aciahari hijio awu inyia ŋeyyani boŋo nohonyie. ¹⁷ Orru bino to ŋorwo hunna owodi ojio te innia etidasa wati to holoŋi niyya! ¹⁸ Itimoje hijio anyar obe holoŋitek niyya afanu to holoŋitek inno hirobi. ¹⁹ Nyo to holoŋitek owuon iso hitigiemita huna obolo atta ŋagalik hitigiemita daŋ to hitieri ha ŋayeu na fau man Iyyania. Dede obe iso nomuk hitigiemita agalik isia. ²⁰ Lobe Habu ehumak holoŋitek inno oduhucio obe iso lobe tuŋani etilohini, atti ehumak isia hunna oduhucio to ilia illo onyimuni. ²¹ To holoŋitek huna lejo lobo ta hatai, "Ituwolo Kristo ille, kuyya lojio Kristo lia! Ibaŋa eruk. ²² To nyo odioto iso Kristohien henyiabak arik ho hebwana henyiabak ille ehuma iso hitihutita hunna obolo arik he idwariti hunna okiamari ille onyimuni etubunyai isia. ²³ Ihuma hiriria, elimak nayya itai hirro hunna daŋ holobe isia ŋafanu. ²⁴ Ta halu ho hitigiemita inno holoŋitek hunna, oye iso holoŋ ojio hidofe yafa atta enyie holobwor. ²⁵ Atta hidofe haŋer ŋahuyu te ido, ojio hidofe igoliti niyya te ido ekikiro. ²⁶ Atta isia ati hiyyo ŋegonyu iso Onyi Tuŋani, ille esuru te ido to hide he itiran arik ho dwaran ojio kwatan inna obolo. ²⁷ Efahak iso inyia Anjilohien illohonyie atta inyia eduduhak tara oyyami aŋwan, to hucuŋi na fau man to hucuŋi no hide ²⁸ Iyiyenu hirro tara ŋaboli. Afanu sana innohonyie sanan ojio hidofe fara innohonyie osidu, atta itai hiyyen hijio eliaha ta has. ²⁹ Iyyania eŋegonyu itai hirro inne edwoŋ, itiyyen hijio eliaha ŋawoŋ no honyie, isionok ikatin. ³⁰ Dede, ajio nayya ta hatai, obe iso hilahaji innaŋ oye man ehumari hiyyo hirro hunna daŋ. ³¹ Olita iso ido arik ha fau, ati obe iso hiram nanaŋ olita. ³² Ati to holoŋ arik ha saa inna ohuyeri inyia ŋawoŋ obe lobo oyyen hara ida hido anjilohien liyya te idou ojo Onyi Hollum, obe lobo oyyen aracie Monye hame oyyen. ³³ Ihuma riŋa, ihuma hidofe ra. Ibe itai eyyen hijio anu ottu iso inyia, ³⁴ Ihuma riŋa! Itira iyya tuŋani ille edek haŋ nohonyie atta hililoto, atti to hosiere esio inyia to hegiamak illohonyie igiem bidaŋ atta hisio heririani hijio isiara hotoriŋai ³⁵ Atti ihuma riŋa nyo ebe itai eyyen hijio anu iso ottu ettok la hatai. Kuyya ottu iso ta kaikai, kuyya ottu ta tari, kuyya ottu elok hohoro, kuyya ottu tomotie. ³⁶ Leŋelunyu inyia atta arrumu itai ejioto. ³⁷ Hirro hunna ero nayyi, ero naŋ to hiyyo bidaŋ, ihuma riŋa!