¹ Etiara ifa Yesu hitiyana isia to hitiriamita. Atta inyia hijo, "Oromok ifa lobo tuŋani mana nohonye, atta abwahak mariŋ dia, atta hibok iwudo imotit no haŋer. Atta inyia abwahak obele to haramok. Atta inyia eno ade anobo doŋe. ² To nobo holoŋ, atta inyia efahak hegiamani heyyani haŋer inno ajalaŋi. ³ Ojio isia atta eyari inyia, ollum atta isia efuha inyia adde obe innak hirro. ⁴ Atta Yesu hinyiak efahak lobo hegiamani, atta isia eriafu inyia to hoo ojio hidofe ehum inyia no orru. ⁵ Enyiak ofe inyia efahak lobo, ojio isia atta attohe inyia. Egiem isia te illak daŋ iyya nyia, ollum illak ojio hidofe ottohe isia. ⁶ Ati arasa inyia efahak tuŋani lobotie, onyi lafa omuno inyie. Ara ifa inyia hucuŋi lafa efahak hiyyo to hosie, "Abaŋ iso isia lonyi hanaŋ." ⁷ Ati ero hegiamak ta wati innohosie hijo, "Harutani lohonyie ille. Ifanu ettohe inyia, atta iso irututi innia hira innohoi." ⁸ Atta isia eniefu inyia atta attohe atta hidofe ebire inyia adde to hotwe mana. Hegiem iso monye mana nyo? ⁹ Ottu iso inyia hitihar haromok illo mana atta hisio mana nyia te illak hame. ¹⁰ Holobe itai ehen hiram no Hollum? 'Enyiak morwo nafa ebo haduhok hira a morwo no oduhori huwo. ¹¹ Ottu innaŋ tara Habu, ojio hidofe olibo to honyehite innohoi.''' ¹² Atta isia siaha hijo ewak isi ŋefitak Yesu, ati abaŋ ifa isia iluluŋ, nyo oyyen isia hijo ero inyia hitiriamita innia do hosie. Ebusak isia inyia atta ŋefi adde. ¹³ Atta isia efahak illak Farisei iko hiyyo illo Erodia to honye anyar elohu isia inyia to hiro nohonyie. ¹⁴ Nafa afanu isia atta hijo to honyie, "Hetiyanani, eyyen iyyohoi hijo eyyen iyye higigilita inno tuŋani, ejio hidofe iyye obe egigiala hiyyo. Etiyana hidofe iyye hikoi no Hollum no obis. Holibo iso adumari arobiya to Kesari kuyya orru? Heduma iyyohoi kuyya obe?" ¹⁵ Ati oyyen ifa Yesu hituhuma no nohosie atta inyia hijo to hosie, "No nyo enyiaba itai nayya? Eyyani ta hanaŋ denari lobotie awak naŋ hiwolo." ¹⁶ Atta isia eyyani lobotie to Yesu. Atta inyia hijo to hosie, "Na ŋai rijori iko higieri innaŋ?" Atta isia hijo, No Kesari." ¹⁷ Atta Yesu hijo to hosie, "Isiara to Kesari hirro inno Kesari ojio to Hollum hirro inno Hollum." Atta isia daŋ hikuyya hiro nohonye. ¹⁸ Atta Sadusahien, illo ojio obe ebuhu, afanu to honyie. Efi isia inyia hijo, ¹⁹ "Hetiyanani, egiorok ifa Musa to te iyyohoi hijo, 'Loye ilasi lobo ebusari ongoruo honye ta halu, ojio lobo hito obe, anyar eyari halasi honyie hiito noŋoruo nyia anyar esik durre te ilasi honyie.' ²⁰ Owuon ifa ilak halasira hunik; atta hitieri ayemu hiito noŋorwo ojio hiito noŋorwo atta ye, ebusari obe durre. ²¹ Ojio hitarrihi awoŋ eyari hito noŋorwo nyia atta hidofe ye obe durre. Atta hitahunihi hira ania daŋ. ²² Atta hattarik enyie hediahari durre. Hucuŋi nohonyie atta hidofe hito noŋorwo ye. ²³ To holoŋ ne ŋebuhu, ottu iso inyia hira oŋorwo ŋai? Era ifa halasira hattarik liyya daŋ aliawa illohonyie." ²⁴ Atta Yesu hijo to hose hijo, "Obe ara hiram nyia nia epalari itai, to biaŋan nahatai hiyyien hiram no Hollum kuyya golon no Hollum? ²⁵ Lofuo isia diote to ye, obe iso isia enyiak yama ojio hidofe obe iso esio wati innohose to yama, ati ofu iso isia hira iyya anjilohien te ido. ²⁶ Ati to hiram no hayok illo etidietini, holobe itai ehenu to Buk no Musa, to hiram nafa ero inyie to tim, to nafa erarari Hollum do honye atta hijo, 'Nayya Hollum la Abramo, Hollum le Isako, hidofe ara a Hollum lo Yokobo'? ²⁷ Obe inyia ara a Hollum la hayok, ati a Hollum la hawuarak. Epala itai no." ²⁸ Ottu ifa lobo hegioroni atta ŋetiru rija nohosie; etiru inyia hijo etirraŋak ifa Yesu isia na anyar. Atta inyia hifi inyia, "Hara hifahi nari nia olibo agalik binno daŋ?" ²⁹ Attati Yesu hitirraŋak to honye hijo, 'Isarail, ihuma hitira, ara Habu a Hollum lohoi, ara Habu lobotie. ³⁰ Tomune Hollum Habu lohoi ta taji nohoi daŋ, to oholio nohoi, to higigilo nohoi, ojio hidofe to golon to nohoi.' ³¹ Ara hitarrihi no hifahi tiji, 'Tomune onyihari nohoi iyya nia emunori iyye wan nohoi.' Obe nobo hifahi na agalik hunna." ³² Atta hegioroni hijo, "Anyarru, Hetiyanani! Ebis iyye to hijo nohoi hijo ara Hollum lobotie, obe lobo iyya inyia. ³³ Mune inyia ta taji daŋ, iko to hiyyen daŋ, iko to golon daŋ, ojio hidofe mune to onyihari iyya wan nohoi, agalik luŋa binno hisiorita iko omudat." ³⁴ Ifa etiru Yesu hijo etirraŋak inyia no obis, atta inyia hijo do honyie, "Dede obe iyye elama tara obie no Hollum." Ta halu ho hirro innia, enyie lobo hefia Yesu innak hirro arria. ³⁵ Atta Yesu etirraŋak, ta nafa etiyanari inyie to hotwe haji imojit, atta inyia hijo, "No nyo ati ojio hegiorok hijo ara Kristo lonyi Davide? ³⁶ Ojio Davide ta wan nohonyie to golon no Oyiri, hijo, 'Ojio Habu ta Habu hanaŋ, tohunyie da hani he inyiet hanaŋ, man emak naŋ miorok illohoi a hittoloji nohoi.' ³⁷ Elliloŋo Davide ta wan nohonye Kristo 'Habu', Jai iso eniyak hidofe inyia hira Lonyi Davide?" Etira ifa iluluŋ nettok to honyie ojio isia omuno inyia. ³⁸ To hitiyana nohonyie, atta Yesu hijo, "Ihuma riŋa hegiorok, awak loton to hofi iko to hifonya ta masik inne enyiaŋari hiyyo hirro. ³⁹ Ojio hidofe isia awak hittolojita to hotwai ho sinagogi iko ta masik inno hittaha to hiyyomita. ⁴⁰ Eturrwo hidofe isia ihidahi ta hajik innohose, etibolo hidofe isia mojo nohose anyar egonyu hiyyo isia. Efwotu iso hiyyo illia hitigiemita hunno hittaha." ⁴¹ ttole ifa Yesu ta fau aŋati ho sienuk no hisiorita ta haji imojit. Orriŋa ifa inyia hibiro no hiyyo arobiya ahotwe sienuk. Ebiro ifa hiyyo illa asam arobiya arria. ⁴² Ati ottu ifa nobo ihidak nelociaŋ ebirok riali illohonye arik ijja, obe oremik hira a robiya. ⁴³ Atta inyia elliloŋu heyiyanak illohonye atta hijo to hosi, "Dede elimak naŋ itai, ebirok ihidiak nia elociaŋ agalik hiyyo ille ebirok arria to sienuk no hisiorita. ⁴⁴ Esio isia daŋ to bore no arobiya innohose. Ati esio ihidak nia hirro innohonye hunna oremik hitimanya inyia ahosiere to hilociaŋ nohonyie.