¹ To nobo far, orrek Yesu togoli, atta hillaŋ hari atta ajiŋak to nobo bore gala. ² Eyyani ifa hiyyo to honyie lobo tuŋani lofer nyo eyyokie ifa inyia. Ifa egonyu Yesu hiruk nohosie, atta hijo to tuŋani le eyyokie wan hijo, “Hiito itigolo wan nohoi, ahohini hiyyata inno hoi.” ³ Atta lomuk hegiorok ta wati te innohosie hijo, “Omoro tuŋani illeŋ iyyohoi.” ⁴ Ati oyyen ifa Yesu higigilta innohosie daŋ atta hijo to hosie hijo, “Nyo egigilo itai nolorru ta taji te innahatai ania? ⁵ Nari nia eliaha, to hijo to nanaŋ hijo, ‘ŋahohini hiyyata innohoi, kuyya hidofe te hijo to nanaŋ hijo, ‘Totte, toloto. ⁶ Ati anyar eyyen itai hijo owuon golon do Lonyi tuŋani ta agalik to nohonyie hiyyata inno huwo ta fau. Attati inyia hijo to tuŋani le eyyokie lia, “Totte, obubunak ijotit innohoi, ino a haŋ hoi.” ⁷ Teyya atta tuŋani lara etilibo Yesu diote atta abubunak ijotit nohonyie atta eno ahaŋ honyie. ⁸ Nafa egonyu iluluŋ no hiyyo arria hiram nyia atta isia baŋi atta isia hitahabwo Hollum lesio duwaran iyyania to tuŋani. ⁹ Nafa awoŋ Yesu teyya, atta inyia egonyu lobo tuŋani fure nohonyie Metteyo. Ettole ifa inyia ta haji nolodumari hiyyo musuru, atta Yesu hijo to honyie, “Ijufuni nayya.” Odioto ifa Metteyo atta ejufari inyia. ¹⁰ To nobo far, ettole ifa Yesu ta fau ta haji adahari ojo illak hemimojok illo musuru afanu atta daŋ daha he inyia ŋiria daŋ honyie iko heyyak. ¹¹ Ifa egonyu Farisei hiram nia. Atta isia hiro te lefahat illohonyie, “Nyo adaha hetiyenani lahatai ho heyyak ojo hemimojok illo musuru?” ¹² Ati etiru Yesu hiram nia atta hijo, “Obe hiyyo illo olibo ojo hidofe ogol oremik asiahari akim, ati awak hiyyo illo oŋwai akim. ¹³ Ifeti egigilori woyyo no hiram nia. Awak nayya hiyyo illo omelehini tajia innohosie, obe ara hiyyo illia esiara hisiorita.’ Abe naŋ attu hillilloŋo hanyarrak, ati attu naŋ ellilloŋori heyyak.” ¹⁴ Niya, afanu hetiyenak illo Yoani to Yesu atta hijo, “Eferitta iyyohoi ho Farisei ati obe hetiyenak illohoi oferitta nyo?” ¹⁵ Etirraŋ Yesu to hosie hijo, “Horemik motiarak illo hayamani hijiriŋa ojo hayamani owuon daŋ he isia? Afanu iso holoŋi inne eyari hiyyo hayamani to hiji hosie ade, ati to holoŋ nia atta iso isia aferu. ¹⁶ Obe lobo tuŋani oremik arifak ittafit no boŋo ŋejuk te igwasit no boŋo marwani. Nyo ogwasa iso ittafit ŋejuk tara boŋo marwani ade, atti obolo iso igwasit nia agalik nara. ¹⁷ Hidofe obe iso lobo oremik ejuhok finno ŋejuk to hobon marwani. Ati lejuhok lobo, obor iso finno nia hobon man obiaŋari nobo hobon. Ati ijuhok finno ŋejuk to hobon ŋejuk atta isia rassai daŋ.” ¹⁸ Nafa hero Yesu hirro innia to hosie, awoŋ lobo dafit atta rigoŋi do hosiere atta hijo to honyie hijo, “Hetek ŋanni hanaŋ yee iyyania, woŋ inno ottirok hani to honyie anyar owar inyia.” ¹⁹ Odiote Yesu atta ejufari inyia daŋ, ojo lefahat illohonyie ofwo ta halu honyie. ²⁰ Ottu nobo hiito noŋorwo nafa odule hosehe nohonyie puluta ŋasi tomon ho lohorik atta hittir halu no boŋo no Yesu. ²¹ Nyo eijo ifa inyia beren hijo, “Lettir naŋ boŋo nohonyie aremik iso naŋ libe.” ²² Ati oyito Yesu do honyie atta ŋegonyu inyia atta hijo do honyie, “Hiito, itigolo taji nohoi. Etilibo huruk nohoi iyye.” Kwak ta manya, atta hiito noŋorwo nya libe. ²³ Nafa awoŋ Yesu ta haji ho dafit, ewolo inyia hahutak illo ikakan iko iluluŋ no hiyyo eyyorro binno. ²⁴ Atta inyia hijo, “Ifeti adde, holobe hiito inna oye, ati ojoto inyia bi.” Ati ellohitari ifa isieja inyia to hittaduho. ²⁵ Nafa efuhak hiyyo iluluŋ abali, ojiŋak inyia to hiji ho hiyyo a hotwe haji man ohu hittoŋ hiito nyia ta hani, atta hiito nyia diote ahide. ²⁶ Esarrik ifa sayye innohonyie to missihi niyya. ²⁷ Nafa eno Yesu tara adde, ejufari ifa illak haŋodok lohorik inyia. Odule ifa isia hiro ille ewuoloŋita hijo, “Tomehini te iyyohoi, Lonyi Davide!” ²⁸ Nafa eba Yesu to hotwe haji, afanu haŋodok to honyie. Atta Yesu hijo to hosie, “Heruk itai hijo aremik naŋ higiem inna?” Atta isia hijo to honyie, “Eruk iyyohoi dede Habu, ²⁹ Atta Yesu hittir honyiehite innohosie atta hijio, “Isiara hatara ania ta hatai iyya ewuon itai ho huruk.” ³⁰ Atta honyehite innohosie ŋa. Ati ojio Yesu to hosie hijo, “Itiyyen hijo hotobiaŋa lobo tuŋani oyyen hiram nia.” ³¹ Ati efie ifa hiyyo lohorik luha etissarik hiram nia to doŋe nyia. ³² Iyya ofwo ifa hiyyo lohorik lia a adde, Eyyani ifa huwo lobo tuŋani to Yesu lafa etuduek miniaŋati. ³³ Nafa efuhari miniaŋati lia adde tara honyie, atta tuŋani lo odwa lia hiro. Oduehini ifa iluluŋ no hiyyo atta hijio, “Holobe ifa inak hirro eba man beren to doŋe ne Isaraile ania!” ³⁴ Ati odule ifa Farisei hiro hijio, “Efuhai inyia miniaŋa adde to golon nettok no miniaŋa.” ³⁵ Olot ifa Yesu a missihi iko a doŋiok inno bore gala. Odule ifa inyia hitiyena to sinagogi, lettiyena sayye inno obie no Hollum, ojio hidofe etilibo iŋweti daŋ tamai. ³⁶ Omehini ifa taji nohonyie te iluluŋi inno hiyyo daŋ, nyo elafuho ojio hidofe oŋuŋusia ifa isia binno. Ara ifa isia iyya kioro inno obe heyyohoni. ³⁷ Ojio inyia to heyiyenak illohonyie hijo, “Obolo mana odioŋoti ati oduhucio hegiamak. ³⁸ kwak, hetimoje ta Habu lo mana, hijio anyar efahak hegiamak a mana odioŋori.”