¹ Nafa allu Yesu to hide doŋe, ejufari ifa iluluŋ no hiyyo inyia. ² Ati dia ottu ifa lobo tuŋani lo talulu to honyie, atta rigoŋo to hosiere honyie, atta hijio, “Habu, le ewak iyye hitilibo nayya, eremik iyye hitilibo nayya.” ³ Ehalamak ifa Yesu hani nohonye ade ho tuŋani lia atta hittoŋ inyia, atta hijo, “Aremik naŋ. Tolibe.” Ati olibe ifa tuŋani lia ha talulu. ⁴ Ati ojo ifa Yesu to honyie, “To riŋe enni, baŋa elimak lobo tuŋani hirro inia. Ino to hikoi nohoi, ino ituhutek wan nohoi to fadirihien ojo hidofe isiara hisiorita innafa esio Musa hatara hitimijani to hosie.” ⁵ Ifa lajiŋak Yesu a Kapernaum, ottu ifa lobo eittok to honyie atta hifi inyia, ⁶ hijio, “Habu, lia pit lalaŋ ofer ta haji lo oŋuwai hidofe ogolie iko diahai bi nono.” ⁷ Ottu ifa Yesu hirro to honyie, “Ille nayya attu hitlibo inyia.” ⁸ Etiraŋ dafit to honyi hijio, Habu obe osiru ta hanaŋ hijio anyar ettu iyye ahaji hanaŋ, ati irara hijio olibo iso pit lallaŋ. ⁹ Nyo aniŋe naŋ ettok hanaŋ ojo hidofe oseŋer illallaŋ oniŋe nayya. Elimak naŋ to lobo, ino, atta inyia ŋeno, “Kuya hidofe lajo naŋ to lobo woŋ, atta inyia awoŋ” Ojo lajo naŋ to pit lalaŋ hijio, igiama niyya, atta inyia higem. ¹⁰ Ifa etiru Yesu, ellilliha inyia atta hijio to hejufutak, “Dede elimak naŋ itai hijio, ŋara ida man to Isarail, abe naŋ arrumu nobo huruk no obolo iyya inna te Isarail. ¹¹ Elimak naŋ ta hatai, afanu iso arria ta halu ojo to dial, ojo iso otiro to terefeja iko Aburamo, Isako ojo Yokobo, to lobie ne ido. ¹² Ati ebirori iso durre illo obie ahotwe idumele nabali, mai no owuanari yoo ojo hirrita no hala. ¹³ Ojo Yesu te ettok lo oseŋer, “Ino! Iyya leruk iyye, nia isiara hegiama tohoi,” ojo hegiamani atta libe to far nafa nyia. ¹⁴ Ifa lawoŋ Yesu ahaji ho Peturu, egonyu ifa inyia hamoni Peturu lofer no loŋuwai iko nohon no wan. ¹⁵ Nafa letir Yesu inyia , atta nohon no wan nohonyi atturori. Atta inyia diote atta higiama to honyie. ¹⁶ Nafa ara iŋalio,eyyani isia hiyyo arria illo oŋuwai iko miniaŋa to Yesu. Efuhai Yesu miniaŋa to hirro nohonye hidofe etinyar inyia haŋuwak daŋ. ¹⁷ Ehuma inyia hijio anyar etisiru hiro no heyani ha sayye Isaya, no ojo hijio, “Inyia to wan to lohonyi, ottu iso eyari iŋwueti hidofe etinyar iyyohoi.” ¹⁸ Iyyania egonyu ifa Yesu iluluŋ ekolok inyia, atta inyia hisio hituhutita hahuye otifor no wor no Galilea tololo. ¹⁹ Atta hegioroni awoŋ to honye atta hijo, “Hetiyanani, ejufari naŋ iyye amai no ehuye iyye.” ²⁰ Ojo Yesu to honye, “Owuon obeyohi ho ittuloho, ojo cieŋ inno ido owuon ho hajik, ati obe Lonyi tuŋani owuon ho lobo mai le etiferihini inyia ho nohonye.” ²¹ Ero ifa lobo heyiyani to honyie hijio, “Habu, aŋatak nayya to heno hanuhahini monye hanaŋ.” ²² Ati ojo Yesu to honyie, “Ijufuni nayya, ibusak hayok hotonuhak wati innohosie.” ²³ Ifa ajiŋak Yesu atogoli, atta heyiyanak illohonyie ejufak inyia ahotwe honyie. ²⁴ Nia odiote oyyami nettok to hide hahari nettok, nia etihok hifoliahita togoli, ati ojoto ifa Yesu. ²⁵ Afanu hejufutak to honye atta hitidiet inyia ahide, atta hijo, “Toluak iyyohoi, Habu, efi iyyohoi ye!” ²⁶ Ojio Yesu to hosie, “Nyo nia ebaŋ itai, odicio huruk na hatai.” Atta inyia diote ahide atta hitwet oyyami iko hari hotonyietai dee. Ati oduwai oyyami daŋ. ²⁷ Ellilliha hiyyo illia daŋ hijo, “Lari tuŋani lia abaŋ oyyami iko hifioŋ inyia?” ²⁸ Nafa ellaŋ Yesu hari akal ho Gerasa, Eruwaŋ inyia iko hiyyo ohorik hullo owuon iko miniaŋa. Afanu ifa isia to hotwe ho ilumioho hidofe ara asitajak, obe ifa hiyyo olot to hikoi nyia. ²⁹ Ati oyio isia hijio, “Lonyi Hollum, ewak iyye iyyohoi hegiama nyo tohoi? Ejo iyye ettu higiama iyyohoi holobeŋ holoŋ nohoi ottube?” ³⁰ Owuon ifa iluluŋ na bataha inno olluŋa na alama tara hosie hunna adaha bi. ³¹ Oluaha ifa miniaŋa to honyie hijio, “Lejo iyye efuhai iyyohoi ade, hadi ati iyyohoi efu ajiŋak a hotuwajin ho bataha.” ³² Ati ojo Yesu to hosie hijio, “Ifeti!” tara, ajiŋu minaŋa ade atta ajiŋak to bataha. Atta iluluŋ nafa bataha daŋ hinyior akal ha hari atta ahuyik ta hari ojo hidofe atta ayek to hotwe hari. ³³ Ofuhe heyohok illafa erribita bataha atta ajiŋak to hotwai haŋ atta isia elimak hirro innafa egonyu isia daŋ ojo nono to sitajak illafa owuon iko miniaŋa. ³⁴ Ati afanu ifa hiyyo daŋ to hotuwe haŋ to Yesu atta isia hifia inyia heno ade ta fau nohose.