¹ Heŋot lobo tuŋani ojio iso hidofe Hollum obe oŋot itai. ² Le eŋot itai lobo, oŋot iso hidofe Hollum itai. Ojio te icemit ne eciamari itai, aciamari iso itai daŋ. ³ No nyo erriŋa iyye belerri no owuon to honyiek, ne ilasi hoi ijio iyye ibe ewolo to nia no owuon to honyiek hoi? ⁴ Jai eremik iyye hiro to ilasi hoi hijio hadi agorotu naŋ belerri to honyiek hoi ade? ⁵ Itai hetimiyahak! Togorotu hita nia hittok to honyiek hoi hosiere attati iso iyye ŋaremik ŋegonyu ojio hidofe ogorotu belleri ade honyiek lia lowuon to honyiek ne ilasi hoi. ⁶ Ibaŋa esiara hirro hunna odwa to ŋohe ojio hidofe hebirok honoron hunna obwor wati to fotirak hotobiaŋa isia eririe honoron inne to hejek innohosie atta hidofe yite oriomori itai. ⁷ Ifia, ojio iso Hollum esio ta hatai. Itisiahai ejio iso itai errumu. Inninnnaŋa ikat, ojio iso inyi aŋa ta hatai. ⁸ To nyo le efia wan to Hollum omoju iso. Lia losiaha wan orrumu iso, ojio hidofe le enninaŋa wan ikat aŋa iso ikat to honyie. ⁹ Obe iso lobo tuŋani esio onyi honyie morwo lomojo inyia ŋiria? ¹⁰ Kuyahidofe omojo onyi honyie hami atta hisio to honyie munu? ¹¹ Itai illia ille erru wati kuyya eyyen itai hisiara no hirro hunna olibo wati to durre inna hatai? Obe iso Monye hatai lia te ido esio hirro hunna olibo wati binno to hiyyo hullo efia wati inyia? ¹² Hirro daŋ hunna iwak itai hijio hehumai hiyyo ta hatai, anyar hidofe ihuma itai inna ocialari to hosie. To nyo egiorohini hunnaŋ te ifahita ojio hidofe egiorita inne hekilak. ¹³ Itijiŋak te ikoi to nia ottida wan, to nyo alat ikoi innaŋ etidihori hiyyo to ye, inyia nia oluŋa halocitak te koi to nia. ¹⁴ Ati otida ikoi ne etidihori hiyyo to wuaran inyia nia oduhucio hiyyo illo orrumu inyia. ¹⁵ Ihuma riŋa hekilak hullo enyiaba hiyyo, to nyo olot isia ta hatai iyya kioro, ati ta tajia hose, ara isia iyya ewuoho hullo oniama wati. ¹⁶ Eyyen iso itai isia to haŋer hunna hihumita innohosie. Dede ettalik hiyyo ŋahoru haŋer inna ajalaŋi tara ikwa, ojio hidofe ettalik hiyyo ahoru haŋer inno ŋaboli tara ilaŋi. ¹⁷ Yani daŋ hunna olibo wati eŋarak iso haŋer innohosie hunna olibo, ojio hidofe hunnaŋ orru wati eŋarak iso haŋer hunna orru wati. ¹⁸ Atti obe iso yani innaŋ olibo oremik eŋarak haŋer hunna orru wati. Ojio hidofe yani innaŋ orru wan obe oremik eŋarak haŋer hunna olibo. ¹⁹ Oŋutu iso hiyyo yani inna eŋarak haŋer inno obe olibo daŋ ade atta ebirohini to hima. ²⁰ Ati efanu iso itai hiyyen isia to haŋer innohosie. ²¹ Obeŋ iso ara hiyyo bi daŋ hullo ojio ta hanaŋ, Habu, Habu, ojiŋak iso to obie ne ido, ati ojiŋak iso lia lehuma wahan no Monye hanaŋ lia te idou. ²² To holoŋ nia ojio iso hiyyo arria ta hanaŋ hijio, Aii, Habu, Habu. Ebe ifa iyyohoi ekikila to fure tonohoi, ebe ifa iyyohoi efuhak jiohin to fure to nohoi, ebe ifa iyyohoi ehuma hihumita arria hunna obolo wati to fure to nohoi?’ ²³ Atta ti nayya hijio to hosie hijio, abe nayya ayyen itai tuŋ, Ifeti ade tara hanaŋ, itai hullo ihuma wati hirro hunna orru wati!’ ²⁴ Hiyyo daŋ hullo etiru wati hiro hanaŋ ojio hidofe oniŋe hikienita innanaŋ ara iso isia iyya olofere ille oduhok haji nohonyie to hide ho moru. ²⁵ Asa hai, ohut oyyami, ojio hidofe hifioŋ onyieta, atta ati hai nia hibak haji ettalik haji nia ahuyai nyo ara hitieri nohonyie moruo. ²⁶ Hiyyo daŋ hulo etiru wati hirorita innanaŋ ojio isia obe oniŋie hiro nuhe ara iso isia iyya osita ille oduhok haji nohonyie to siŋata. ²⁷ Asa hai ojio hidofe oyyami ohut ojio hifioŋ onyieta, atta ati hai hibak haji atta haji nia ŋahuyai atta turo. ²⁸ Nafa esahak Yesu hiro nohonye, ellilliha ifa hiyyo, ²⁹ nyo etiyana inyia isia iyya haboloni, obe inyia etiyana isia iyya hegiorok illohosie.