¹ Atta Yesu ellilloŋu heyiyanak illohonye hullo tomon lohorik atta hisio to hose golon na agalihini isia oyirihien inne ebwot no oremik efuhari ojo hidofe etilibori iŋweti gele gele. ² Ara ifa fureta inno efahat tomon harik lia. Hitieri hose ifa, Simone (lafa elliloŋo inyi hijo Peturu), iko Andrea ilasi honyie; Yokobo onyi Sebedeyo, iko Yoani ilasi honyie; ³ Filipo iko Batulumeyo; Tomaso, iko Metteyo heduduhani ho musuru, Yokobo onyi Alfeyo, iko Tedeyo; ⁴ Simone lafa omuno Hollum, iko Yuda Iskariote, lafa ottu etinyaŋai inyia. ⁵ Atta Yesu efahak lefahat ade. Etuhutek inyia isia atta hijo, “Ibaŋa ofuo amai no owuanari halufak, ibaŋa hidofe ojiŋak abore gala no Samaria. ⁶ Ati ifeti ahaji no olitari ker ne Isarail; ⁷ ojio to hefi nahatai, itiyanai atta itai hijo, ‘Awoŋ obie ne ido aŋati.’ ⁸ Itilibo haŋwak, ituwaru hayok, itilibo haŋwak inno talulu, atta itai efuhai miniaŋa adde. Amoju ifa itai assai, isiara hidofe assai. ⁹ Ibaŋa eyari innak nyahuo, iko yiel to kulosien innahatai. ¹⁰ Ibaŋa eyari innak hirro to loton nahatai, ibaŋa hidofe eyari boŋo, iko hamuha iko innak hirro, nyo osiru hegiamani hadahari ŋiria nohonyie. ¹¹ Lajiŋak itai to nobo haŋ iko doŋe, itirumu tuŋani no osiru teyya, atta itai hittole dia man ebusari itai mai nyia. ¹² Lajiŋak itai ta haji, ifonya inyia. ¹³ Losiru haji nyia, ibusak himwara nahatai dia. Ati lobe osiru, isiara himwara nahatai hawoŋ ta hatai ¹⁴ Ati te illia illo obe efwotu itai ojio hidofe obe etira to hitiyana nahatai, ittutturok tuduha to hejek innahatai adde le ebusak itai doŋe nyia. ¹⁵ Dede elimak nayya itai, eyyak iso ta fau no Sodoma iko Gomora ta far no ŋoto agalik doŋe nyia. ¹⁶ Itiiwolo, efahak nayya itai iyya kioro to hiji he ewuoho, anyaregeny itai iyya munok ejio hidofe ebe eriafu iyya irigioho. ¹⁷ Ihuma riŋa to hiyyo! Ofu iso isia hisio itai te iluluŋi, atta isia baha itai to sinagogi innohose. ¹⁸ Atta iso hidofe isia hisio itai ahosiere ho mamuri iko habwok to hiram nanaŋ, hatara ahituhuti to hose iko to halufak. ¹⁹ Le esio isia itai to hose, ibaŋa abaŋ to hiro inne efu itai hiro ojo hidofe efu iso itai hijo jai, esiarahini iso hirro inne efu itai hiro ta saa nyia. ²⁰ Obe ara iso itai efu hiro, ati ero iso Oyiri no Monye hatai ta hatai. ²¹ Esio iso ilasi , ilasi honye to ye, ojio hidofe monye hiito lohonye. Odioto iso durre no orru to hesiok hose atta hisio isia hotottohoi hiyyo. ²² Oliwari iso hiyyo daŋ ta mai itai to fure nanaŋ. Ati lo odik man to hucuŋi, etilohini iso tuŋani lia. ²³ Letigiama isia itai to doŋe inna, irrwata adde anobo, dede ajo naŋ ta hatai, obe iso itai eremik ebusari doŋiok inno Isaraile holobe Lonyi Tuŋani awoŋ. ²⁴ Obe heyiyanani oremik agalik hetiyanani honye, obe hidofe hegiamani ara nettok tara eittok lohonye. ²⁵ Oremik iso to heyiyanani hatara iyya hetiyanani lohonye, ojio hidofe hegiamani iyya eittok lohonye. Lellilloŋ isia eittok la haji Belsebul, orru iso binno te illia ille ellilloŋo isia amotiarak illo haji nohonye! ²⁶ Iyyania, ibaŋa abaŋ isia, obe iso nobo sihin ne eŋofo no obe oliew, obe hidofe iso nobo sihin ne eŋofo nobe oyyen. ²⁷ Ne elimak nayya itai ta mai no oriok, irara ta far, le etiru itai innak hirro bolioŋ to yohe innahatai, ihuma eyyorik binno ta hajik innohose. ²⁸ Ibaŋa abaŋ illia illo oremik attohe wan ati illo obe oremik attohe oholio. Ati, itibaŋ tuŋani lo oremik hitihar oholio daŋ iko wan atta ebirok to hima. ²⁹ Hobe iso cieŋ lohorik oremik etinyiaŋari ta arobiya kai? Obe lobo oremik ahuyik ta fau lo obe Monyehatai oyyen. ³⁰ Ati essok inyia ta hihen hofir inno hosi innahatai. ³¹ Ibaŋa abaŋ. Elibo itai egalik cieŋ ³² Leruhok lobo tuŋani nayya to hosiere ho hiyyo, eruhok iso nayya inyia daŋ to hosiere ho Monye hanaŋ lo owuon te ido. ³³ Ati lorisa nayya to hosiere ho hiyyo, arisa iso nayya inyia daŋ to hosiere ho Monye hanaŋ lia te ido. ³⁴ Ibaŋa egigilo hijo eyyani nayya himwara ta fau. Abe nayya attu eyyani himwara, ati fere. ³⁵ Attu nayya esutak tuŋani haliwari monye honyie, ojio hiito oliwari hotonye honyie, ojio hiito na ara a hamoni oliwari homoni honyie. ³⁶ Ara iso miorok illo tuŋani hiyyo lia ta haŋ honyie. ³⁷ Lia lomuno monye honyie iko hotonye honyie agalik nayya, obe osiru ta hanaŋ; lomuno lobo onyi honyie iko ŋani agalik nayya obe osiru ta hanaŋ. ³⁸ Lobe lobo ahafu kuruce atta ejufari nayya obe osiru ta hanaŋ. ³⁹ Losiaha lobo wuaran nohonye, etilitek iso inyia. Ati lia letilitek wuaran nohonye ta nayya orrumu iso inyia. ⁴⁰ Lia lomoju itai omoju inyia nayya, ojo lia lomoju nayya omoju iso hidofe inyia lia lefahu nayya. ⁴¹ Lia lomoju hekilani hijo ara inyia hekilani, efwotu iso inyia hisiori no hekilani, ojo lia lefwotu tuŋani habisani to hira nohonye tuŋani habisani efwotu iso inyia hisiori no tuŋani habisani.