¹ Ifa ejio Yesu atuhok inyi ŋelimak efahat illohonyie tomon ho lohorik. Atta inyia eno etiyanari aborejin hagala inno hosie. ² Nafa etiru Yoani hirro inne egiem Kristo, atta inyia ŋefahak efahati lo botie lohonyi tara efahat illohonyi. ³ Atta hijio to honyi inno tojio, “Irra iyye lafa ojio ottu iso? Anyar etila iyyohoi lobo hamai?” ⁴ Atta Yesu hitiraŋ hijio ifeti ilimak to Yoani hiro inno egonyu ittai ojio inno etiru ittai. ⁵ Oriŋai haŋodok, oloton haŋurak, olibe hiyyo illo oŋuai arik ho johin inno orru, etira hatuhok, ŋebuhu hayok, ŋetiru heruhok sayejin inno olibo. ⁶ Hotowuana jaha to tuŋai lobe ekuya hiram nanaŋ ⁷ Nafa aciahari hiyyo ille atta Yesu elimak te iluluŋi inno hiyyo hiram no Yoani, ifa tara atta hifi isia hijio, “Efi ifa ittai awaha tonyio? Yani no ohut oyyami? ⁸ Efi ifa ittai riŋa nyio? Tuŋani le eciefita boŋojin inno olibo? Dede hiyyo ille eciefita boŋojin inno olibo amanya tahaji ha Habwok. ⁹ Atti efi ifa ittai oriŋari nyio? “Hekilani? Ee, ajo naŋ ta hatai, ajo hidofe naŋ agalik hekilani. ¹⁰ Illohoi tuŋani lie lafa egiorohini te inyia, ‘Itiriŋai hayitani ha sayye innanaŋ ahosiere hatai le ohu ehuhumak hikoi to hosiere hatai.’ ¹¹ Dede elimak nayya ta hatai, to hiyyo ille esini tara ŋorwo inno obe lobo agalik Yoani Batista. Atti owuon lobo le agalik inyia to obie to Onyi te ido. ¹² To holoŋitek innafa ho Yoani Batista many iyyania orrumu obie ne ido huturuo ojio hiyyo illo omuno huturuo eyari inyia to golon. ¹³ Odule ifa hekilak iko hifahita hikila man to holoŋitek innafa ho Yoani Batista. ¹⁴ Eremik iyye amoju inyia, Elia lafa ojio ottu iso. ¹⁵ Lowuon ho yohe hetirari isiara inyia hetiru. ¹⁶ Etirijik iso nayya hilahaji inna arik ho nyo? Ara iyya durre hullo eramita to etinyaŋari ille ettole atta hillilloŋo wati illo hosie. ¹⁷ Atta hijio, ehuta iyyohoi ciwali ta hatai ejio itai ebe ecia. Ewuon iyyohoi ho twari ejio ittai ebe eyio. ¹⁸ Nafa ottuni Yoani obe adaha imune, obe amata balu, ejio ittai atta hijio owuon inyia ho miniaŋati. ¹⁹ Nafa ottuni Onyi Tuŋani adaha inyia imune ojio hidofe amata atta isia hijio ituwolo, arra inyia ahadahani ojio hidofe ara harumani, amote ho hemimojok ho musuru iko heyyak!’ Atti etibisahini iso hilofere to higiemita innohonyie.” ²⁰ Atta Yesu hitiara hitiyana borejin inno gala innafa obolori igiem no honyi nyo holobe isia oyyite. ²¹ Orru iso ta hatai Korasin, orru iso ta hatai Beteseda! Nara ida igiem no Hollum iyya ne egiamari inyia to Taya arik ho Sidon to hatai ŋaite ifa ittai beren, atta itai emak siwal iko ottuala. ²² Atti elimak nayya ta hatai hijio olibo iso to Taya arik ho Sidone to holoŋ no ŋoto agalik na hatai. ²³ Ittai Kaparnum egigilo ittai hijo eremik iso ittai ŋefi ahide ido? Obe, ebirori iso ittai amai no orru. Hara ida igiem nyie egiem Hollum to Sodoma iyya ta hatai ida harasa ida man ena. ²⁴ Atti ajio nayya ta hatai hijo ofiaha iso to holoŋ no oŋotori Hollum agalik nia hatai. ²⁵ To holoŋ nyie etiraŋ Yesu hijio, “Amuno nayya iyye Monye, Habu lo ido arik ha fau, nyo etuhutek iyye hirro to fiorojok ojio to tuŋani lo oyyen etilau isia to hullo holobe ŋetiyenu iyya durre hullo hittiŋi. ²⁶ Monye olibo ifa to honyehite hoi toriŋe esio Monye hatai hirro bidaŋ ta hanaŋ ²⁷ Esio ifa Monye hanaŋ hirro daŋ ta hanaŋ; obe hidofe lobo tuŋani oremik hiyyen Onyi aracie Monye, obe hidofe lobo tuŋani oremik hiyyen Monye aracie Onyi, iko to tuŋani lo onyimu Onyi hetiliek to honyie. ²⁸ Ifanu ta hanaŋ itai ille egiama ejio hidofe ekafita hirro inno odiŋ, esio iso nayya ta hatai yiri. ²⁹ Iyari hiyeni hanaŋ ejio ittai eyiyenu tara hanaŋ, nyo anyalam nayya ojio taji hanaŋ olibo, ati orrumu iso oholioho innahatai yiri. ³⁰ Nyo olibo hiyeni hanaŋ ojio hiram nanaŋ ehauwa.