¹ Eba ifa Yesu ho heyiyenak illohonyie to Betfaji aŋati ho Yerusalem to doŋe no Oliveto, efak ifa Yesu heyiyenak illohonyie lohorik atta ² hijo to hosie, “Itijiŋak to doŋe nia nolowon to hosiere hatai, errumek iso itai nobo sigira ne efita iko ŋani honyie. Itihou atta itai eyyani isia ta hanaŋ. ³ Lefia lobo tuŋani itai hinak hirro, itirraŋak do honyie hijo, ‘Awak Habu isia,’ ojo iso tuŋani lia atta efahu isia he itai.” ⁴ Owuon hirro innia ania hijo anyar etisiru hiro no heyani sayye lafa ojo, ⁵ ”Ilimak ŋani Siona hijo, Toriŋai, ottu Habu lohoi tohoi, la anyalam lettole to horuoŋ ha ŋani sigira.” ⁶ Atta heyiyenak ŋefi hihuma iyya elimak Yesu isia. ⁷ Eyyani isia sigira iko ŋani honyie atta ŋafiatak boŋojin innohosie to horuoŋ no sigira atta Yesu hittole dia. ⁸ Ofiatak ifa hiyyo arria boŋojin innohosie to hikoi ojo hidofe illak atta ayefu sana inne yanik atta ŋafiatak isia te ikoi. ⁹ Atta huwo innafa owuon to hosiere iko inna halu daŋ hitiara hidolo fure no ojo, ¹⁰ ”Hosanna to onyi Davide! Hotomune lia lottu to fure na Habu. Isiara hitihabuo hotowuana hitihabuo te ido.” ¹¹ Nafa ajiŋak inyia to Yerusalem, elliliha ifa huwo daŋ atta hijo, “ŋai lia?” Ojo ifa iluluŋ no hiyyo hijo, “Yesu lia, heyani sayye lo Nasaret no owuon ta Galilea.” ¹² Ojiŋak ifa Yesu ta haji imojit nettok atta ŋefuhai hiyyo daŋ illafa etinyaŋa iko illafa etinyaŋa hirro innohosie ta haji nia. Atta inyia asulai terefejahien inno ettok la arobiya, hittolojita daŋ inno hetinyiaŋani lo irigioho. ¹³ Atta inyia hijo tohosie, “Egioro hijo, ‘Eliloŋo iso haji hanaŋ hatara a haji imojit,’ ati eloitok itai inyia hatara inyia ahinom na hahalak.” ¹⁴ Afanu haŋodok iko haŋurak to honyie ta haji imojit nettok ojo inyia hitilibo isia. ¹⁵ Eloŋojita ifa hiyyo illo hittaha iko hegiorok legonyu isia hirro innafa ehuma inyia ojo hidolo no durre innafa etihabwo ta haji he imojit nettok to hijo nohosie, “Hosanna to onyi Davide,” ¹⁶ Atta isia hijo to honyie, “Hetiru iyye hirro inne ero isia?” Etirraŋ Yesu to hosie hijo, “Eee” Ibe itai ehiana hijo, “To hutuhien ho durre iko tara idoliaha, errumek iso iyye hitihabwo no libo?” ¹⁷ Ediahari ifa Yesu isia atta eno teyya a doŋe no Betania ojiotori. 18To motie beren acahari Yesu a doŋe Yerusalem atta inyia wode. ¹⁸ To motie beren acahari Yesu a doŋe Yerusalem atta inyia wode. ¹⁹ Owolo inyia nobo ŋaboli nowuon to oger ho hikoi ati eba inyia to yani nia atta arrumu fara hame innohonyie. Atta inyia hijo to yani nia, “Hotobiaŋa innak haŋer enyiak afanu tara hoi.” Teyya, atta yani nia toyyo kwak ta halu honyie. ²⁰ Nafa egonyu heyiyenak yani nia otte, elliliha ifa isia atta hijo, “Henor ŋaboli nia daŋ kokwak jai?” ²¹ Etirraŋ Yesu do hosie hijo, “Elimak naŋ ita dede hijo, ‘lewuon itai ho huruk nobe ekuyya, eremik itai hihuma iyya naŋ to yani nia. Ati obe ara nia hame. Lero ida hido itai to doŋe inna hijo, ‘Todiote, ibirok wan nohoi ta hari nia, oniŋo iso inyia itai. ²² Nyo lefia itai hirro daŋ to mojo jo to huruk, emoju iso itai.” ²³ Ojiŋak ifa Yesu a haji imojit nettok ojo ettaha illo ikelesia ojo marwak afanu daŋ to honyie atta hifia inyia atta hijo, “Ta nari golon nia ehumari iyye hirro hunna? ŋai esio do hoi hilohittok nia?” ²⁴ Ojo Yesu atta hitirraŋ isia hijo, “Etirraŋ iso naŋ itai hifii nobotie. lelimak itai deti, elimak iso hidofe naŋ itai ta nari golon nia egiamari naŋ hirro hunna. ²⁵ Hottu hilohittok no Yoani tai nebatisori inyia hiyyo? Hottu tara Hollum ama tara tuŋani?” Ati atta isia rija ta wati te innohosie hijo, ²⁶ ”Lejo iyyohoi, ottu tara idou.’ Atta inyia hijo toohoi, nyo ati ibe itai eruk inyia?’ Ati lejo iyyohoi, ottu tara tuŋani,’ ebaŋ iyyohoi iluluŋ, nyo oyyen isia hijo ara Yoani hekilani.” ²⁷ Niya atta isia hitirraŋ Yesu atta hijo, “Ebe iyyohoi eyyen.” Hidofe enyiak inyia hijo to hosie, “Abe iso naŋ elimak hottu golon negiamari naŋ hirro innia taji. ²⁸ Ati egigilo itai nyo to hiram nia? Owuon ifa lobo tuŋani ho lonyirok illohonyie lohorik. To nobo far, eno inyia to oŋiew lohonyie atta hijo, ‘Hito, ino enna amana egiamari.’ ²⁹ Ojo hiito atta hitirraŋ hijo, ‘Abe naŋ awak.’ Ati ta halu atta inyie hiloit hoo nohonyie ³⁰ atta hijo, ‘Olibo awu naŋ.’ Enyiak hidofe monye eno hiro to lonyi honyie ille hitarrihi. Etirraŋ lonyi honyie lia atta hijo, ‘Olibo, awu naŋ,’ attati hibo ta halu. ³¹ Lari hiito lia to hiji hosie awak monyie? Etirraŋ isia to honyie hijio oŋieu.’’’ Ojio Yesu to hosie, elimak naŋ itai dede, le ara hamojoni homusuru arik ho somojok ofi ŋajiŋak to lobie no Hollum do hosiere hatai hilibe itai igiem. ³² Nyo ottu ifa Yoani ta hatai le ejufuta to hirro hifahita inno Yesu atti ibe itai eruk to honyie; ojio hamojo ho ho musuru arik ha hasomok eruk to honyie. Ojio itai, egonyu ifa itai hirro inne edoŋ, hotobiaŋa itai iloyit tajia innahatai hijo anyar eruk itai to honyie. ³³ Itirai to nobo hiticeli. Owuon ifa lobo tuŋani, ara ifa inyia amonye mana. Edulak ifa inyia mana atta ŋalik mariŋ, atta ŋabwahak iwudo to hotwai honyie, obwahak obele dia, atta hisio te illak heciok. Atta inyia ŋeno anabo doŋe. ³⁴ Nafa eliaha yafa no dioŋo, atta monye mana ŋefahak lomuk piti to hiyyo ilia eco wati mana no honyie hijo anyar odieŋini ŋama. ³⁵ Atti eniefu heciok ha mana piti illo honyie, atta hibak lobotie, atta ŋattohe lobo, ojio lobo atta hipud to moru. ³⁶ Edas inyia ŋefahak piti ariai tara illafa hosiere, atti atta hecok hidas higiem to piti liyya iyya nafa egiem isia te illafa hosiere. ³⁷ Tahalu, ŋefahak inyia lonyi honyie to hosie, hijo, ‘Anyar abaŋ isia lonyi honyie.’ ³⁸ Ati nafa egonyu heciok liyya lonyi honyie, atta isia hiro to wati innohosie hijo, ‘Illohoi harutani. Ifanu ettohoi inyia anyar erutak hirro innohonyie.’ ³⁹ Enief isia inyia atta epihori inyia adde to mana atta ŋattohe. ⁴⁰ Lawoŋ monye mana, hehum iso inyia nyo te eciok liyya? ⁴¹ Ejo isia to honyie, “Ottohe iso inyia harwuok lia to hikoi no’rru atta hisio mana nohonyie te illak heciok, huwo illo oremik duma haŋer lo odon.” ⁴² Ojo Yesu to hosie, “Ibe itai ehiana higierita? ‘Egioro ifa hijo, “Ottu iso morwo nafa ebo haduhok hira hitieri to ohitir; nyo ara inna hiram nia ehuma Habu, nelliliha iyyohoi binno to honyehite innohoi?’ ⁴³ Nyo elimak naŋ ta hatai hijo, ‘Orujuni iso obie no Hollum adde tara hatai atta hisio to hiyyo ille eŋarak haŋer innohonyie. ⁴⁴ Tuŋani lo ohuyek to morwo nia, owuro iso inyia; Ati lesiak morwo nia tuŋani, attad iso wan nohonye.” ⁴⁵ Nafa etiru ettaha illo ikelesia iko Farisei iceliti innia tara Yesu, atta isia hiyyen hijo ero Yesu te isia. ⁴⁶ Ati awak ifa isia eniefu inyia, ati abaŋ ifa isia iluluŋ no hiyyo, nyo oyyen ifa hiyyo hijo ara inyia hekilani sayye.