¹ Etirraŋ Yesu atta hinyak hiro to hiticelita to hosie hijo, ² ”Obie no ido ara iyya lobo letok ille ehumak mune no hiyama to lonyi honyi. ³ Efahak inyia hegiamani lohonyie anyar eliloŋ ilia hullo awak hafanu to mune no hiyama, ati obe isia awak afanu. ⁴ Enyak ofe habu efahak lobo hegiamani, ojo, “Ilimak isia hullo awak nayya, “Towolo, ediara nayya hirro adahat; attohe nayya hiteŋ tamot, ojo hirro ottubahini. ifanu amune hiyama.’’’ ⁵ Ati obe huwo illia awak hitira nalanyar, efie ilamuk amata hosie, ojo ilamuk acahari amasik inno igemita innohosie. ⁶ Ojo ilamuk eniefu hegiamak, atta hihum isia norru atta attohe isia. ⁷ Ati ejoria ifa habu atta efahak oseŋer illo honyie, atta attohe hattohok illia, atta hidofe aswahak doŋe nohosie. ⁸ Teyya ojo inyiaa to hegiamak illohonyie, ‘Ohidier hiyama, ati obe illia ellilloŋ iyyohoi osiru. ⁹ Tonia ino ahikoi anyar eliloŋ huwo iluluŋ hullo eremik iyye arumu hafanu to mune no hiyama.’ ¹⁰ Efie hegiamak ilia adia ahikoi atta eduduhu huwo anobotie hullo orrumu isia, illo orru iko hullo anyar. Teyya efut ifa hiyama gin iko hatamonok. ¹¹ Ati ifa lawoŋ habu hiwolo hatamonok, egonyu inya tuŋani ille obe ecofo boŋojin inno hiyama. ¹² Ejo habu to honyie, ‘Illa, hetu iyye enni jai ejio iyye ebe ewuon iko boŋojin inno hiyama?’ Obe ifa tuŋani lia enyiak hiro nobo. ¹³ Teyya ejo habu to hegiamak hijo, ‘Ifitak has iko hejek inno tuŋani ille, atta iyye asulai inyia amai nia oriok, nia nafa owuanari yo iko hirrita na hala.’ ¹⁴ Nyo ellilloŋini ifa hiyyo arria, ati eduhucio hullo onyimuni.’’ ¹⁵ Teyya efi Farisei higigilo hijo hehum iso isie jai anyar mahati elohu isie Yesu to hirorita innohonyie. ¹⁶ Teyya efahak isia to honyie heyiyanak illo honyie, anobotie iko huwo illo Erodia. Ojo isia atta hijo to Yesu, “Hetiyanani, eyyen iyyohoi hijo ara iyye ille dede, ejo hidofe iyye ebe eremik wahan inamuk hirorita tara lobo, ejo hidofe iyye ebe egigiala huwo. ¹⁷ Iyyania ilimak iyyohoi, hegigilo iyye ŋarinyo? Hobis iso mahati hadumari musuru to Kesari?’’ ¹⁸ Ati oyyen ifa Yesu hijo obe isia oremik hitira na lanyar atta hijo, ‘’Nyo eciama itai nayya, ara itai hullo eteler? ¹⁹ Ituhutek nayya arobiyaha.’’ Teyya eyyani isia yel to honyie. ²⁰ Ojo Yesu to hosie, na ŋai rijori iko fure inna? ²¹ Ejo isia to honyie, ‘’No Kesari.’’ Ojo Yesu atta hijo to hosie, ‘’Isiara hirro inno Kesari to Kesari ojo hirro inno Hollum to Hollum.’’ ²² Ifa letiru isia daŋ ania, eliliha isia. Atta isia efie ade ediahari inyia. ²³ To holoŋ nafa nya afanu illak Sadusahien to honyie, illafa ojo hijo obe nobo hebuhu. Efi isia inyia, ²⁴ Hijo ‘’Hetiyanani, ojo Musa hijo, ‘Loye lobo tuŋani, obe owuon ho durre, isiara ilasi honyie hotoyemu oŋorwo honyie anyar owuon iko durne te ilasi honyie.” ²⁵ Owuon ifa ilasira hatarik. Ayama lohosiere ojo atta ye, obe obusari durre. Ebusak inyia oŋoruo honyie to ilasi honyie. ²⁶ Teyya atta hidofe ilasi hitarihi igiem iyya nafa tara ilasi lia, teyya man te ilasi hitahunihi, eba bi daŋ man hinyahita hatarik. ²⁷ Tahalu hosie daŋ, oye hiito noŋorwo nia. ²⁸ To hebuhu, hara iso hiito noŋorwo nia ne ilasira ilia hatarik? Nyo ayemu ifa isia inya bi-daŋ.’’ ²⁹ Ati etirraŋ Yesu atta hijo to hosie, “Epal itai, nyo ebe itai eyyen hirro hunna egioro to buk kuyya hidofe to ŋolon no Hollum. ³⁰ Nyo to hebuhu, obe iso isia oremik yama. Ati ofu iso isia hira iyya anjilohien te ido. ³¹ Ati to hiram no hebuhu no hayoni, obe itai ehien innafa ero Hollum ta hatai, hijo, ³² Ara nayya Hollum lo Abramo, Hollum le Isako, ara nayya Hollum lo Yokobo’? Obe Hollum ara Hollum lo hayok, ati ara lo hawuarak.’’ ³³ Ifa letiru iluluŋ inia, ellilliha ifa isia to hitiyana nohonyie. ³⁴ Ati ifa letiru Farisei hijo etudwek Yesu Sadusahien, eduduhak isia wati innohosie anobotie. ³⁵ Atta lobo lohose, ille ara haŋotoni, ifi inyia, to icemiti to honyie- ³⁶ ”Hetiyanani, hara nari hifahi na agalik to hifahi?” ³⁷ Ojo Yesu to honyie, “Tomune Habu Hollum lohoi to taji nohoi daŋ, iko oholio nohoi daŋ, iko to higigilita innohoi daŋ.’ ³⁸ Ara inna hitieri ojo hidofe ara hifahi nettok. ³⁹ Ojo hefahi hitarihi ara tiji- ‘Tomune onyihari hoi iyya emuno iyye wan nohoi. ⁴⁰ Owueta hifahita ta mai daŋ iko hekilak te inna.” ⁴¹ Iyya harasa ifa Farisei hududuha wati innohosie anobotie, efi Yesu isia. ⁴² Ejo inyia hijo, ‘’Hejo itai ara Kristo ŋai? Ara inya lonyi ŋai?” Ejo isia to honyie, “Lonyi Davide.’’ ⁴³ Ejo Yesu to hosie, Nyo mahu ati enyak Davide hililoŋ inyia to Oyiri hijo Habu, hijo, ⁴⁴ ’Ojo Habu lalaŋ to Habu lalaŋ, “Ohunye ta hani henyet hanaŋ, man ehumahini nayya miorok illohoi ahittoloji nohoi’’’? ⁴⁵ Leliloŋ Davide Kristo Hijo Habu, ‘Jai ara inyia lonyi Davide?’’ ⁴⁶ Obe ifa lobo loremik hitirraŋ inyia to hiro, Obe hidofe lobo tuŋani oremik hifi inyia innak hifiita ariai man to holoŋ nafa nya ahosiere.