¹ Nafa esahak Yesu hirorita hunna, eno inyia to Galilea, atta awoŋ afau no Yudea no owuon ahosiere ho hari no Yordano. ² Ejufari ifa iluluŋ nettok inyia, atta inyia hitilibo isia teyya. ³ Afanu Farisei to honye, ociamari inyia, “Holibo to to tuŋani hapiahari iko oŋoruo honye?” ⁴ Etiraŋ Yesu hijo, “Ebe itai ehienu hijo inyia lafa oyyeu isia man to hitieri oyyeu isia hiito oliawa iko hiito noŋoruo? ⁵ Ojo hidofe inyia lafa oyyeu isia hijo, ‘To hiram to nia owu hiito oliawa ebusak monye iko hotonye honyie atta atubahini to oŋoruo honyi, atta lohorik hira wan no botie?’ ⁶ Nia obe isia enyiak hira arik, ati wan no botie. Hotobiaŋa lobo orit hirro inno ottubak Hollum nobotie.” ⁷ Atta isia to honye, “No nyo ati elimak Musa iyyohoi hesiara siada no piaha efuhai inyia adde?” ⁸ Ojo inyia to hosie, “To golon no tajia innahatai aŋatahini Musa itai hotopiahai ho ŋoruo innahatai, ojo man ifa to hitieri obe ifa ara to hikoi nia. ⁹ Ajo nayya ta hatai, tuŋani lo opiaha ho oŋoruo honyie to hirro inno somon, atta yama nobo, eyyau ho oŋoruo tuŋani ojo hiito oliawa lia owu yama hiito noŋoruo nia opiaha eyyau inyia.” ¹⁰ Ojo heyiyanak to Yesu, “Lera hiram no hiram no hiito oliawa iko hiito noŋoruo daŋ ania, obe hada olibo hayamari,” ¹¹ Ati ojo Yesu to hosie, obe ara hiyyo bidaŋ oremik huruk hitiyana nia, ati ara jia illo aŋatak heruhori inyia. ¹² Owuon illo obe awak yama man to hotwajin ho hotonye hosie. Owuon illak illo ehumak hiyyo hotobiaŋa ayama, Owuon hidofe illo obe awak yama to hiram no lobie no ido. Inyia lo oremik amoju hitiyana inna, isiara inyia hotomoju.” ¹³ Nia eyyani huwo illak durre illo hittiŋi to honye anyar atanyiak inyia has innohonyie to honyie atta mojo, ati eriŋ heyiyanak isia. ¹⁴ Ati ojo Yesu, “Idek durre illo hittiŋi, hotobiaŋa itai efuhai isia hafanini ta hanaŋ, nyo ara obie ne ido to ilia ara ania.” ¹⁵ Atta atirok has inno honyie to hosie, atta eno teyya adde. ¹⁶ Nafa nia, awoŋ lobo tuŋani to Yesu atta hijo, “Hetiyanani, hara ŋari hirro inno olibo iso inia egiem naŋ hijo anyar arrumu naŋ manya no osio fur?” ¹⁷ Ojo Yesu to honyie , “Nyo etitifa iyye ta nayya hirro inno olibo? Ara tuŋani lo olibo lobotie hame, ati lewak iyye ajiŋak to wuaran, ottunak hifahita.” ¹⁸ Atta tuŋani lia hijo to honyie, “Hifahita innari?” Atta Yesu, “Baŋa ottohe, baŋa eyyau ho oŋoruo tuŋani, baŋa ahahala, baŋa oteler, ¹⁹ Ta baŋa monye hoi iko hotonye hoi, ejio hidofe iyye emuno onyihari illohoi iyya wan nohoi.” ²⁰ Ojo tuŋani lia to honye, eruk naŋ hirro nia daŋ; arasa naŋ wahan nyo?” ²¹ Ojo Yesu to honye, “Lewak iyye bisan, ino, itinyaŋai hirro inno owuon to hoi, atta iyye hisio to locaŋak, atta iso iyye wuana he ibariti te ido. Ati woŋ, ijufak nayya.” ²² Ati nafa etiru inyia hirro innia tara Yesu, atta inyia eno ade le ejiriŋa, owuon ifa inyia he ibariti aria. ²³ Ojo Yesu to heyiyanak illo honyie, “Dede ajo naŋ ta hatai, ogol to tuŋani la abara hajiŋahini to lobie ne ido.” ²⁴ Enyiak naŋ hijo ta hatai, ofiak to konikoni hajiŋari to honyiek ho irifit, agalik ta habarani hajiŋahini ahotwai ho obie no Hollum.” ²⁵ Nafa etiru heyiyanak rori niyya, ellilliha ifa isia no atta hijo, “ŋai iso lia oremik hetilohini?” ²⁶ Owolo Yesu to honye atta hijo, “To huwo obe oremik, ati to Hollum oremik hiro bidaŋ fiahajo.” ²⁷ Atta Peturu hitira atta hijo to honyie, “Towolo ebusak iyyohoi hirro bidaŋ atta ejufak iyye; nyo iso nia erumu iyyohoi?” ²⁸ Ojo Yesu to hosie, “Dede ajo naŋ ta hatai, to hiŋa ŋejuk lawoŋ Onyi Tuŋani ahunye to hide ho lohwo nohonyie, itai ille ejufuta nayya, efu iso hido fe itai ahunye to hide hittolojita tomon harik haŋotori woyojin inno Isarail tomon harik. ²⁹ Ilafa bidaŋ ebusak hajik, halasirak, hanasirak monyie, hotonyie, durre ojo fau to fure nanaŋ, omoju hnyahita ahisihit ojo hidofe orutak manya no osio fur. ³⁰ Ati ariai illo ara hosiere ottu hira halu, ojo ariai ilia ara halu ofu hira hosiere.