¹ Ta far to nyia, afanu heyiyenak to Yesu atta hijo, “ŋai ara ettok to obie ne ido?” ² Ellilloŋu Yesu nobo hiito nettiŋ atta emak inyia to hosiere hosie, atta hijo, “Dede, ³ elimak naŋ itai hijo, lebe itai eloito iyya durre inno hitiŋi, ebe iso itai ejiŋak to obie ne ido. ⁴ Niya, lia, lenyiak wan nohonyie iyya hiito inna, ara iso inyia nettok to obie ne ido. ⁵ Tuŋani lomoju iyya inna to fure hanaŋ, amoju inyia nayya. ⁶ Ati lorrosok iŋeyye neruk ta hanaŋ to hiyyata, osiru hefitak no moruo nettok honyie atta ebirok inyia ahari hotodiori. ⁷ Orru iso ta fau to hirro inne etipala! Afanu iso hitipalita dede ati orru iso binno to tuŋani leyyani isia! ⁸ Kuyya lara hani iko heju nohoi iyye to hiyyatta, toŋute isia adde atta iyye ebire isia adde. Olibo hajiŋahini ta manya leŋurra agalik ebirohini wan nohoi daŋ iko has innohoi arik iko hejek to hima. ⁹ Kuyya leyyari honyek nohoi iyye to hiyyata, ogolotu inyia atta iyye ebire adde. Olibo tohoi hajiŋahini ta manya iko honyek nobotie agalik ebirohini iyye to hima iko honyehite lohorik. ¹⁰ Ihuma riŋa hijo hotobiaŋa itai emiana hiito lettiŋ iyya inna nyo elimak naŋ itai hijo egonyu anjilohien illohosie homom Monye hanaŋ lia te idou. ¹¹ Nyo ottu Lonyi Tuŋani hetilahari illo olita. ¹² Hegigilo itai jai? Lo owuon tuŋani iko kioro hisihai nobotie ojo nobotie atta litai, obe iso inyie ediahari tomwana hotoŋwan ho hotoŋwan to doŋe atta ŋasiahari lara olita? ¹³ Dede, elimak naŋ itai hijo larrumu inyia lara olita obolo iso mune nohonyie binno agalik kioro innara tomwana hotoŋwan ho hotoŋwan inno obe olita. ¹⁴ Obe hidofe Monye hohoi lia te ido awak lobo hoto litei. ¹⁵ Kuyya leyyau halasi hoi to hoi ino ituhutek hiyyau nohonyie to honyie. Leruk inyia hiram nohoi, arriehu iyye inyia amotte hoi. ¹⁶ Ati lebo inyia hitira to hoi, illiloŋu lobo tuŋani lobotie kuyya lohorik hatara asut lohoi, hijo hetiru hiyyo illia hirro innahatai. ¹⁷ Ati lebo inyia hitira to hosie, ilimak hiram nyia to hosiere he ikelesia. Larasa inyia hibo hitira hiram ne ikelesia, isiara inyia hatara ta hatara ta hatai lo a pagani ojo hidofe hatara heduduhani lo musuru. ¹⁸ Elimak naŋ itai dede, hijo hirro daŋ inne efitak itai ta fau, efita iso daŋ te ido. Ojo hidofe hirro inne ehek itai ta fau, ohehini hidofe daŋ te ido. ¹⁹ Enyiak naŋ elimak itai dede hijo, lomojo hiyyo lohorik nobotie to nobo sihin nawak isia, esio iso Monye hanaŋ lia te ido do hosie. ²⁰ Nyo lotubahini hiyyo lohorik kuyya hidofe lohunik to fure hanaŋ awuon iso naŋ to hiji hosie.” ²¹ Atta Peturu awoŋ efiari Yesu atta hijo to honyie, “Habu, Hara inyahita jai inne ebusak iso naŋ halasi hanaŋ leyyau ta hanaŋ? Hara iso inyahita hatarik hame?” ²² Ati ojo Yesu to honyie, “Abe naŋ ajo to hoi hinyahita hatarik, ati tomwana hatarik ha hatarik. ²³ Ara obie ne ido iyya lobo habu lawak etibisak horos nohonyie iko piti illohonyie. ²⁴ To hosiere, eyyani ifa huwo do honyie tuŋani lafa ohuru arobiya tara honyie alif tomon. ²⁵ Ati obe arobiya to honye hadumari horos nohonyie, atta ettok lohonyie elimak hijo hetinyaŋak huwo inyia ho oŋorwo honyie ojo durre iko hirro innohonyie daŋ, anyar oremik idumuti innafa esok inyia. ²⁶ Atta pit lia rigoŋi ta fau to hosiere he ettok lohonyie, atta hijo, “ Ettok, tomehini ta hanaŋ, aduma iso naŋ hirro innohoi daŋ.’ ²⁷ Omehini ifa taji nettok atta inyia a hek tuŋani lia atta ebusak inyia ho horosi daŋ. ²⁸ Eno pit lia atta eboŋohini iko lobo lafa egiama he inyia, lafa owuon ho dinari hisiha nobotie. Eniefu inyia lohoros lohonyie atta eyari inyia to murut atta hijo, “Todumai horos hanaŋ.’ ²⁹ Ati ohuyek hegiamani lohonyie ta fau atta hifia hijo, ‘Ibusak nayya, nyo aduma iso nayya iyye.’ ³⁰ Ati ebo ifa hegiamani lia. Atta inyia rigoŋi to hosiere honye atta hilolia to honyie hijo, ‘Tomehini ta hanaŋ, aduma iso naŋ iyye.’ ³¹ Ati ebo ifa ettok lia man efitak lohoros lohonye to kijan man odumari inyia horosi daŋ. Ejiriŋa ifa huwo ille etiru hiram nia binno, atta isia efie elimak daŋ ettok lohosie hirro innia daŋ. ³² Ellilloŋu ifa ettok lo hegiamani lia inyia, atta hijo do honyie hijo, ‘Iyye pit lorru binno. Nafa eloliari iyye ta hanaŋ abusak ifa naŋ horosi innohoi. ³³ Nyo ibe iyye ebusak horosi inno lohoros lohoi iyya ebusahini naŋ innohoi?’ ³⁴ Ejoria ifa ettok lohonyie to honye binno atta hisio inyia to bolis hatabak inyia man odumari inyie horosi innohonyie daŋ tamai. ³⁵ Ehuma iso Monye hanaŋ ta hatai daŋ ania lobe itai ebusak halasira hatai ta tajia inna hatai dedde.”