¹ Tahalu ho holoŋitek ile eyari Yesu iko inyia Peturu, Yokobo ojo Yoani halasi honyie, atta eyyani isia man ahide ho doŋe to wati innohosie. ² Eloito ifa inyia to hosiere hosie; ohidia homom nohonyie iyya holoŋ, ojo boŋojin inno honyie atta buorro no no iyya cialai. ³ Teyya, edwuoŋ Musa iko Elijah to hosiere hosie ojo erro iko isia. ⁴ Etiraŋ Peturu atta hijo to Yesu, “Habu, holibo iso te iyyohoi hamanyiari inni, lewak itai, ehumak iso nayya hajik hunik inni - nobotie nohoi, nobotie no Musa, ojo nobotie te Elija.” ⁵ Iyya nafa arasari inyie erarari, teyya, atta ohidis no itiran no obuor etiyok isia, ojo teyya, owuon ifa hiro no erro teyya hijo, “Onyi hanaŋ la amuno nayya ille, te inyia amuno Naŋ bi no no. Itire to honyie.” ⁶ Nafa etiru efahat, eruk isia to homomite innohosie atta baŋi bi no no. ⁷ Teyya awoŋ Yesu hitir isia atta hijo, “Itidiote ahide ati ibaŋa labaŋ.” ⁸ Atta isia hiwolo ahide ati obe egonyu lobo tuŋani aracie Yesu Kristo hame. ⁹ Iyya nafa alu isia afau to doŋo, elimak Yesu to hosie, hijo, “Ibaŋa elimak hirro inia tolobo tuŋani man owuarini Onyi Tuŋani to ye.” ¹⁰ Efi heyiyanak illohonyie inyia, hijo, “Nyo hidonyie ojo hegiorok hijo anyar ottu Elija do?” ¹¹ Etirraŋ Yesu atta hijo, “Ottu iso Elija dede anyar ottu enyahu hirro danŋ. ¹² Ati elimak nayya ta hatai, awoŋ Elija, ati obe isia oyyen inyia; ati egiem isia iyya nyo awak inyia ho egiama. To hikoi to nia, etaban iso hidofe Onyi Tuŋani ta has hosie.” ¹³ Teyya atta heyiyanak etiru hijo erro ifa inyia to hosie iyya Yoani Hetifwotoni. ¹⁴ Nafa afanu isia a iluluŋ, awoŋ lobo tuŋani tohonyie atta rigoŋi to hosiere honyie, atta hijo, ¹⁵ ”Habu, omelehini onyii hanaŋ, oŋuai inyia iko hahwe ojo hidofe etaban bi no no; odule inyia huyita to hima ojo to hifioŋ. ¹⁶ Eyyani Nayya inyia to efahat illohoi, ati obe isia oremik hitiluak inyia.” ¹⁷ Etiraŋ Yesu atta hijo, “Obe hilihaji nia ara heruhok, man anu iso etole nayya iko itai? Man anu iso adik nayya itai? Iyyani inyia ini.” ¹⁸ Omojo Yesu to inyia, ojo miniaŋa atta efi ade tara honyie; olibe ifa hiito lia ta far nyia. ¹⁹ Teya afanu efahat to Yesu hame hame atta hijo, “Nyo obe iyyohoi oremik efuhai miniaŋa inia adde? ²⁰ Ejio Yesu to hosie; Dede, odicio hiruk lahatai, ati ajio nayya ta hatai, lewuon ida itai ho hiruk ara ida hido odicio kai iyya haŋeri lo miyaŋ, eremik itai hijo to doŋe ile, “Itihute wan nohoi teni inno alamare, ati efuhai iso wan nohonyie. Obe iso inak hirro inno aŋalik higiemita innahatai. ²¹ Ati obe miniaŋa nnia oremik efii adde ile to mojo iko to hitudwuara. ²² Nafa etolojori isia to Galilea, eijo Yesu te heyiyanak illohonyie, “Esiarahini iso Onyi Tuŋani ta has ho hiyyo; ²³ Ati ottohe iso isia inyia, ati to holoŋ hitahunihi, owuaru iso inyia to ye.” Atta heyiyanak hijiriŋa. ²⁴ Nafa afanu isia a Kapernaum, atta hiyyo illafa eduduha musuru afanu to Peturu atta hijo, “Obe mahati hetiyanani lohoi oduma musuru?” ²⁵ Ejio inyia, “Dede.” Ati nafa inno Peturu ahaji, ero Yesu to honyie ata hijo, “Hegigilo iyye nyo, Simone? Habu lafau, hara ŋai lia omojori hiyyo musuru? Tara lufajak?’’ ²⁶ Nafa ojo Peturu, “Tara lufajak,” Ejio Yesu to honyie, “Ati hotobiaŋa monyie doŋe enyiak duma. ²⁷ Ati ehumak iyyohoi heduduhak ho musuru ho eyyau, ino ahari nettok, ibirok hiririehi, ati iririehu hami lo ottu hitieri; leŋa iyye hutuk nohonyie, erumu iso iyye arobia. To dumu ojo hidofe esio to heduduhak ho musuru ta nayya ojo te iyye.”