¹ Afanu Farisei iko Sadusei hijo ewak isia hiciem Yesu atta hifia inyia hijo hetuhutek nobo hituhuti nottu te ido. ² Ati etirraŋ Yesu do hosie, “Laswuori holoŋ te iŋalio man odo, atta itai hijo, ‘olibo iso ena nyo odon ido.’ ³ Ojo hidofe to motie beren lo odon ido ojo hidofe owuon he idis, ‘Ottu iso hai ena.’ Eyyen itai hiloito no hirro inno ido, ati ebe itai eremik hiloit hituhututa inno holoŋitek hunna. ⁴ Awak hilahaji no’rru hituhutita, ati obe iso nobo noremik etuhutahini to hosie, ati hituhuti no Yona.” Ebusak Yesu isia atta ŋeno adde tara hosie. ⁵ Nafa eba heyiyanak illohonyie aŋati ha hari, agilu ifa isia hijo ague isia imuniaha innohosie. ⁶ Ati ojo Yesu to hosie, ihuma riŋa. “Ibaŋa eruk bula inno Farisei iko inno Sadusien.” ⁷ Attati isia hiro ta wati innohose hijo, “Ero inyie ania nyo ebe iyyohoi ewuon he imune.” ⁸ Ati oyyen ifa Yesu hiram nia daŋ binno atta hifi isia hijo, “Itai hullo odicio hururk hullo, nyo nia edule itai hiro to biaŋan ne imune? ⁹ Holobe itai daŋ eyyen? Ibe itai egocie imuniaha miet innafa aharak naŋ to hiyyo illafa hisihai tomwana miet? ¹⁰ Hara hafejin inno imuniaha jai innafa ebeny atta itai adumu? ¹¹ Jai ebe itai etiru hijo abe naŋ ero to hiram ne imune? Ihuma riŋa binno hiram no bula inno Farisei iko Sadusien. ¹² Niya etiru isia hijo obe inyia ettito isia to bula inno imune na Farisei, ati ero inyia to hiram ne etiyena Farisei iko Sadusien. ¹³ Nafa eba Yesu ta fau no Kesaria Filipi atta inyia hifia heyiyanak illohonyie hijo, “Hojo hiyyo ŋai Lonyi Tuŋani? ¹⁴ Atta isia hijo, “Ojo hillak Yoani Batista; ojo lomuk, Elia; arasa hilak hijo, Yeremia, kuyya hidofe lobo heyani sayye. ¹⁵ Attati inyia hifi isia hijo, “Ati eijo itai ara naŋ ŋai?” ¹⁶ Atta Simone Peturu hitirraŋ to honyie hijo, “Ira iyye Kristo, Lonyi Hollum hamanyani.” ¹⁷ Atta Yesu hijo to honyie hijo, “Simone lonyi Yona, obolo iso jaha tohoi nyo obe lobo tuŋani etuhutek nia tohoi, ati Monye hanaŋ te’ido etuhutek iyye. ¹⁸ Hidofe ajo naŋ tohoi hijo, iyye Peturu, to hide ho moruo nia aduhok iso naŋ ikelesia hanaŋ. Nolobe golon ne ikat oremik agalik. ¹⁹ Esio iso naŋ tohoi iŋanyiti no obie no Hollum ojo hidofe lefit iyye hirro daŋ tenni ta fau, efitahini iso daŋ te ido. Hirro daŋ inne ehohi iyye ta fau, ohohini iso hidofe daŋ te idou. ²⁰ Atta Yesu elimak heyiyanak illohonyie hijo hotobiaŋa elimak ilak hiyyo hijo ara inyia Kristo. ²¹ Ta far nyia etiara Yesu hituhuta heyiyenak illohonyie hijo ahu iso inyia Yerusalem ojo hidofe etigiama iso marwuak iko hehumak ojo hegiorok inyia, Atta ŋattohoi inyia ati ebuhu iso inyia to manya ta halu ho holoŋitek hunik. ²² Ati eyari Peturu inyia kai oger atta hiro hijo, “Habu; isiara hirro inne ero iyye hotobiaŋa eidoŋ to hoi.” ²³ Ati oyito Yesu atta hijo to Peturu, “Ihuto ade Sitan ta haluhanaŋ! Ira iyye hetipalani hanaŋ nyo ebe iyye egigilo higigilita inno Hollum, ati egigilo iyye higigilita inno hiyyo.” ²⁴ Ati ojo Yesu to heyiyenak illohonyie hijo, “La awak lobo tuŋani hijufuta naŋ isiara inyia hebwara wan nohonyie, hotolororoi kuruce nohonyie atta hujufuta nayya. ²⁵ Lawak lobo tuŋani etuluwahu manya nohonyie, etilitek iso inyia, ati tuŋani lesio manya nohonyie to hiram hanaŋ orrumek iso inyia. ²⁶ Nyo libe nohonyie larrumu tuŋani ibariti inna fau daŋ atta etilitek manya nohonyie daŋ? ²⁷ Nyo ottu Onyi Tuŋani to lohwo no Monye honyie ha anjilohien illohonyie. Oduma iso inyia hiyyo daŋ to igemita innohosie. ²⁸ Dede elimak naŋ itai hijo, ettole illak inni iyyania illo obe iso oremik egonyu ye man egonyuni iso isia Lonyi Tuŋani awoŋ to obie nohonyie.”