¹ Atta illak Farisei iko hegiorok afanu to Yesu to Yerusalem. Ejio isia, ² ”No nyo owur heyiyanak illohoi imohiti inno ettaha? Obe isia elila has innohose la adaha isia.” ³ Atta inyia hitirraŋ atta hijo to hosie, “No nyo hidofe ewur itai hifahi no Hollum to hiram ne imohiti innahatai? ⁴ Nyo ojio Hollum hijo, ‘Abaŋa monye hoi iko hotonyo hoi,’ Ojio tuŋani le ero norru to hotonye iko monye honyie, oye iso inyia.’ ⁵ Ati ejio itai, ‘Lejio lobo to monye honyie iko to hotonye honyie hijo, “Le luak lobo itai, omoju inyia tara hanaŋ hatara a hisiori to Hollum,’’’ ⁶ hotobiaŋa tuŋani lia abaŋ monye honyie. To hikoi nia, eturru itai hiram no Hollum te imohiti innahatai. ⁷ Itai henyabak! Ekilu ifa Isaya te itai ta nafa ojitari inyia hijo, ⁸ ’Abaŋ hiyyo hullo nayya to hutuhen innohosie hame, ati alama tajia innohose tara nayya. ⁹ Etihabuo isia nayya assai, nyo etiyana isia imohiti innohosie iko hifahita inno hiyyo.’’’ ¹⁰ Atta inyia hililoŋ iluluŋ to honye atta hijo to hosie, “Itira ejio hidofe eyyien. ¹¹ Obe nobo sihin no ojiŋak ahutuk ho tuŋani oremik hiturru tuŋani. Ati, sihin netihar tuŋani inyia sihin no ottu to hutuk ho tuŋani.’’ ¹² Atta heyiyanak afanu to honyie atta hijo to Yesu, “Heyyen iyye hijo ejoria ifa Farisei to hetiru nohosie hiro nohoi?’’ ¹³ Etirraŋ Yesu atta hijo, “Orutuni iso yani ne edulak no obe Monye hanaŋ te ido edulak. ¹⁴ Ibusak isia hame, ara isia haŋodok hetuhutak. Lo orihita oŋodo lobo tuŋani, ohuyek isia daŋ ewudo.” ¹⁵ Etirraŋ Peturu atta hijo to Yesu, “Iko ihuma elimak te iyyohoi icelit nia.’’ ¹⁶ Ojo Yesu, Holobe itai daŋ ehum etiru na anyar? ¹⁷ Holobe itai egonyu hijo ne eba nobo sihin to hutuk, ohu hidofe daŋ heno oko hosehe atta hidofe ebirori ahotwe iwudo? ¹⁸ Ati hirro inno afanu adde to hutuk, afanu ta taji. Isia hirro inne eturru tuŋani. ¹⁹ Ojo hidofe ta taji afanu igigilita inne ebwot, toho, roto, somon, hoho, roso, iko teler. ²⁰ Isia innia inne etihar tuŋani. Ati daha ojo has obe elila, obe oremik hitibwot tuŋani.’’ ²¹ Atta Yesu eno adde teyya adoŋiok inno Tire iko Sidona. ²² Ottu nobo hiito noŋorwo no Kanan adde to fau nyia. Eyyorro inyia atta hijo, “Tomehini ta hanaŋ Habu Lonyi Davide! Iniefita miniaŋati binno.’’ ²³ Ati obe Yesu etirraŋ to honye lobo hiram. Atta heyiyanak illohonye afanu to honyie atta tana inyia hijo, “Ifuhai inyia adde, eyyorrita inyia toohoi.’’ ²⁴ Ati atta Yesu hitirraŋ atta hijo, “Abe ifa nayya attu te illak hame ati to kioro inno olita ta haji ne Isarail.’’ ²⁵ Ati ottu inyia atta rigoŋo ta fau to hosiere honye, atta hijo, “Habu, toluak nayya.’’ ²⁶ Atta inyia hitirraŋ atta hijo, “Obe olibo heyari imune no durre atta ebirok to ŋohe hullo hittiŋi.’’ ²⁷ Atta inyia hijo, “Habu, ati adaha hido kuyyuhi ŋiria no odek tara teremejaha inno ettaha illohose.’’ ²⁸ Atta Yesu hitirraŋ atta hijo to honyie, ‘’Inna tuŋani, obolo huruk nohoi; isiara hegiamai to hoi iyya ewak iyye.’’ To saa to nyia atta ŋani ho tuŋani nyia libe. ²⁹ Atta Yesu ebusari mai nyia atta eno aŋati hari nettok no Galilea. Owu inyia adoŋe atta ahunyie dia. ³⁰ Awoŋ iluluŋ nettok to honye. Eyyani daŋ he isia haŋurak, haŋodok, hattuhok, iko inne eyyokie, he innak daŋ innafa oŋwai. Esio isia daŋ to hejek inno Yesu, atta inyia hitilib isia. ³¹ Eliliha ifa iluluŋ nafa egonyu isia hattuhok ero, iko haŋurak illo olot, haŋodok orriŋa. Omuno isia to Hollum le Isarail. ³² Atta Yesu hillilloŋ heyiyanak illohonye atta hijo, “Amehini nayya binno te iluluŋ nia, obolo hittole nohosie inni holoŋitek hunik obe isia anya illak hirro. Abe naŋ awak efuhai isia adde holobe isia enya lobo daha, ŋaso isia ofu huyuta to hikoi.’’ ³³ Ojio heyiyanak to honyie, “Herumu iso iyyohoi imuniaha inno oremik iluluŋ inna aji ta mai inna ara waha tiji?’’ ³⁴ Ojio Yesu to hose, “ Ara imuniaha inno owuon ta hatai jai?’’ Atta isia hijo, “Hatarik he innak ham kai.’’ Atta ³⁵ Yesu elimak iluluŋ hettolojo ta fau. ³⁶ Odumu inyia imuniaha hatarik iko ham, ta halu ho hisio nohonyie humo, atta inyia hiwur imuniaha atta hisio to heyiyanak hatadahai. Atta heyiyanak hisio te iluluŋ. ³⁷ Atta hiyyo daŋ daha man ofoŋi. Atta isia eduduhak innafa ofitini man enyiak hifut to gufa. ³⁸ Ara ifa liawa illa adaha alif aŋwan tara ŋorwo iko durre. ³⁹ Atta Yesu efahak iluluŋ adde tara honyie atta inyia arrerk ahide togoli atta eno afau ho Magadan.