¹ Holoŋi innafa niyya ottuni Erode etirini hiram no Yesu. ² Atta inyia elimak to hegiamak illohonyie hijo,” Yoani Batista lia; ebuhu inyia to ye. Inyia nia egiama iduariti innia to honyie.” ³ Nyo elifo ifa Erode Yoani atta etifitak inyia to kijan, to hiram no oŋoruwo halasi honyie Pillipo. ⁴ To hiro no Yoani te Erode hijo, “Oduwa to hoi hawuanari iko inyia oŋoruwo hoi” ⁵ Ejo Erode awak attohe Yoani, ati abaŋ ifa inyia hiyyo, nyo eruk ifa hiyyo hijo ara inyia hekilani. ⁶ To holoŋ nafa ehuhumari huwo mune ta haŋ he Erode holoŋ nafa esiori huwo inyia, acia hodwo inno Erodia atta Erode mune binno, ⁷ man elimu to nobo hodwoti hijo esio iso naŋ iyye hirro daŋ inno ewak iyye. ⁸ Atta hodwoti nia eno hifia hotonye honyie hijo, “Hawu iso naŋ hifia inyia hesiera nayya nyo? Atta hotonye hijo, “Tojo isiara nayya hoo no Yoani Batista to hiduti inna” Atta hodwoti nia hijo iyya ojo hotonye honyie. ⁹ Ejiriŋa habu lia, atta inyia baŋi hirro innafa elimu inyia ojo hodwoti iko hatamonok etira. Ejo inyia, isiara hirro innia awak inyia. ¹⁰ Atta inyia efahak lobo hegiamani lohonyie heno akijan hotoŋutuni hoo no Yoani. ¹¹ Eyyani tuŋani lia hoo nia atta hisio to huduti no hiito nia, ojo hiito nia atta eyari to honye honyie. ¹² Ojo heyiyanak illo Yoani atta afanu akafari wan no Yoani onuhari. Tia ofuyye elimahini to Yesu. ¹³ Nafa etiru Yesu hirro innia, atta inyia etuhutu wan tara to togoli anabo mai hamai. Nafa orriŋa etiru iluluŋ nia, atta atifori Yesu to bore gala amai nyia. ¹⁴ Nafa awoŋ Yesu ahosiere hosie egonyu inyia iluluŋ nia edwoŋ atta inyia amehini te isia, atta hitinyar haŋwak inno hosie. ¹⁵ Nafa era iŋalio, afanu heyiyanak hijo to honyie, “Ara mai inna amur, ojo hidofe holoŋ eliha aswori, itatturok iluluŋ nia hefie amisihi hosie anyar ofuo arrumu daha nohosie.” ¹⁶ Ati, ojio Yesu tohosie, “Hotobiaŋa isia ofuo adde. Isiara to hosie innak hirro hatadahai isia.” ¹⁷ Atta isia hijo to honyie hijo, “Ewuon iyyohoi iko imuniaha miet ojo ham arik ijja.” ¹⁸ Atta Yesu hijo, “Iyyani ta hanaŋ enni.” ¹⁹ Ojo Yesu atta etihunyik hiyyo ta fau to hide ho miyaŋ. Atta inyia adumu imuniaha miyet iko ham arik, atta hibonno ahide ido atta inyia hijok hidofe atta hibubun imunieha atta hisio to heyiyanak hesiara to hiyyo. ²⁰ Adaha isia daŋ man oruma. Ati eduduhu heyiyanak ofitot inno imuniaha lur to gufat tomon harik. ²¹ Ara ifa iluluŋ no liawa hame alif miet, ojo ŋorwo iko durre. ²² Kokwak atta inyia etuhunyik heyiyenak illohonyie ahotwai ho togoli nafa owuon to hutuk ha hari, ojio inyia ta wan nohonyie atta efuhak iluluŋ no hiyyo adde. ²³ Ta halu no hetaturok no honyie iluluŋ, atta inyia hirre a doŋe inyia hamai omojori. Ifa iŋalio odule inyia dia daŋ. ²⁴ Ati eba ifa togoli to hiji ha hari nettok, nyo ohut ifa oyyami binno ojo hidofe ebo hitiho nyo efiriwa ifa oyyami binno. ²⁵ Ifa era harie, atta Yesu awoŋ aŋati hosie, lolot to hide hifioŋ. ²⁶ Nafa egonyu isia Yesu olot to hide o hifioŋ, atta isia baŋi atta hijo, “jok nia,” oyyio ifa isia ta baŋi. ²⁷ Atti ero Yesu to hosie teyya hijo, “Itigolo! Nayya lia! Ibaŋa abaŋ.” ²⁸ Etirraŋ Peturu to honyie hijo, “Habu, iyye lia, iko ojo ta nayya woŋ to hoi aniya to hide ho hifioŋ.” ²⁹ Ejo Yesu to honyie, “Woŋ.” Atta Peturu allu to togoli eno to Yesu to hide ho hifioŋ. ³⁰ Ati nafa ewolo Peturu oyyami, atta inyia baŋi; atta inyia adiori ahotwai hari, atta inyia yio hijo, “Habu, itiluwahu nayya.” ³¹ Ifa tara ehalamak Yesu hani no honyie atta hinief Peturu, ero Yesu te inyia hijo, ‘’Iyye ille odicio hiruk nohoi, nyo ekuyya iyye?” ³² Ifa arrek Yesu iko Peturu a togoli, ojo oyyami atta aduehini. ³³ Atta heyiyanak illafa ettole to togoli hitihabuo Yesu hijo, “Era iyye dede Lonyi Hollum.” ³⁴ Nafa ellaŋ isia tololo, atta isia allu to Genesaret. ³⁵ Nafa aheru hiyyo illo mai nyia Yesu, atta isia efahak sayye to masik niyya ta mai to nyia, heyanini haŋwak innohosie daŋ to Yesu. ³⁶ Attana isia inyia hedek haŋwak inno hosie hototir ŋolon no boŋo nohonyie, iluluŋ no haŋuak illafa otir inyia olibe.