¹ To holoŋ nia, ojiŋu ifa Yesu ta haji atta hittole to hutuk ahari. ² Atta iluluŋi inno hiyyo afanu to honyie aria, atta inyia arrek to togoli, ehut inyia ahiji ahari ojo iluluŋi oferik to otifor ahari. ³ Etiyana inyia hirro arria to hosie te iceliti. Atta hijio, “Owu lobo tuŋani ayek hinyomo inno honyie. ⁴ Nafa ayek inyia, atta innak ahuyik te ikoi ojo cieŋ atta ekukubu isia. ⁵ Ojo hidofe innak atta ahuyik to hide ho moru, mai no obe isia orrumu huron inno oluŋa. Ati esuru isia kokwak nyo obe mai nohosie ehum bwaha afau. ⁶ Ati ifa lonohon holoŋ, atta fara innohosie attoye nyo obe hadde to hosie. ⁷ Ojo hinyomo innak atta ahuyik to hiji ho hukwa. Atta isia daŋ esuru iko hukwa ojo hukwa atta agore isia. ⁸ Ati to hinyomo huna ohuyik to huron inno olibo esuru isia atta afanu eŋarak ŋama hinyahita hisihai nobotie, ojo innak hinyahita tomuwana ile ojo hidofe hinyahita tomwana hunik. ⁹ Lia lowoun ho yohe, tojo inyia hetiru.” ¹⁰ Afanu heyiyanak to honyie atta hifia inyia hijo, “Nyo etiyena iyye iluluŋ no hiyyo to hicelita?” ¹¹ Etiraŋ Yesu to hosie hijo, “Etiliek Hollum obie no honyie ta hatai nafa eŋofo, ati obe oremik etiliek to hosie hirro niyya. ¹² Nyo to lia lo owuon ho hirro, ofonihini iso innak aria, ojo iso inyia atta adule rumita. Ati to lia lobe owuon iko hirro, eyari iso hirro tara honyie adde iko hunna owuon to honyie. ¹³ Ero naŋ to hosie to hiticielita, nyo oriŋa ida hido isia, obe isia egonyu dede, etira ida hido isia, obe isia etiru ojo hidofe obe oyyen. Etisiru isia hikikila nafa ojo Isaya hijo, ¹⁴ ”Etira iso itai dede ati ebe iso ita etiru; eriŋa iso itai ejo iso itai ebe egonyu. Ati obe itai eremik hiyyen. ¹⁵ Nyo oye tajia inno hiyyo hullo, ojo yohe innohosie omiŋa to hitira, ojo isia emutak honyehite innohose; Kuyya obe isia ehum egonyu to honyehite innohose, etiru to yohe innohose, ehum hiyyen to tajia innohose, atta hinyiak yitei, ajo nayya atta hitilib isia.’ ¹⁶ Ati ajak iso honyiehite inna hatai, hijio hotoriŋe isia; ojo yohe inna hatai, etira iso isia. ¹⁷ Elimak naŋ itai dede hijio hekikilak arria iko hiyyo habisak owuon iko wahan no hegonyu hirro hunna egonyu itai, ejo itai ebe egonyu isia, ojo hetiru no hirro hunna letira itai, ejo itai ebe etiru isia. ¹⁸ Itire to hiticelita no hayani ho hinyomo. ¹⁹ Letira lobo to hirorita inno lobie no Hollum ojo obe ehumak ta taji, ottu iso ille lorru akwarari hiroita innafa oyehini ta taji no honyie adde. Ara ta lia lafa oyehini to oger ho hikoi. ²⁰ Ojo lia lafa loyehini to moruarari ara inyia lia letiru hiram atta hiruk kokwak to mune; ²¹ Obe inyia owuon iko hadde ati ociamak illamuk kai. Eruk inyia to ati lafanu hitigemita kuyya hihawa to hiram no Hollum, atta inyia ahuye tara hiruk nohonyie adde. ²² Ojo lia oyehini to hiji ho hukwa, inyia lia etiru hiram, ati higigilita iko ibariti inna fau otide hiram no Hollum tara honyie, atta inyia biaŋan owuon iko hiŋijiti. ²³ Ati lia lafa loyehini to huron hunna olibo, inyia lia ille etiru hiram no Hollum atta ehumak ta taji; inyia lia ille eŋarak haŋer atta aromok isia; oŋijak hinyahita hisihe nobotie, ojo innamuk hinyiahita tomwana ille, ojo innamuk hinyiahita tomwana hunik.” ²⁴ Enyiak Yesu eyyani nabo hiticeli to hosie; ojio inyia, “Ara lobie nyia te ido iyya tuŋani lo oyek hinyomo inno olibo ta mana honyie. ²⁵ Ati holojoto hegiamak, ottu mioroni lohonyie atta hidofe ayek abali to geme, atta eno. ²⁶ Lesuru ŋama man eŋarak haŋer innohosie, ojo abali hidofe atta alliew daŋ. ²⁷ Afanu hegiamak ho monye amana hifia ettok atta hijio, ‘Ettok, obe ifa mahu iyye eyek hinyomo inno lolibo da mana hoi? Nyo esuru isia iko abali?’ Etirraŋ inyia do hosie hijo, ‘Mioroni ehumak inyia. ²⁸ Ejo hegiamak do honyie, ‘Ewak iyye hijo anyar erutu iyyohoi isia adde?’ ²⁹ Ojo inyia to hosie, ‘Obe, lejo itai efu ruto abalie ŋaso itai erutu iko geme. Ibusak isia hebibolori daŋ man to holoŋ no dioŋo. Ati to holoŋ odioŋo elimak iso naŋ ta hadioŋok hijo, ³⁰ ”Ittieru arutu abalie adde atta itai efifitak abubuŋi esuahak, ati ejo itai geme etubak te ibati hanaŋ.”” ³¹ Enyiak Yesu eyyani nobo hitarriji to hosie. Ojo inyia, “Ara obie nyia te ido iyya haŋeri lo bule ille eyari tuŋani owu edulak ta mana honyie. ³² Odicio haŋeri lia binno tara haŋeri no bule daŋ. Ati lobolo inyia, atta agalik yani innia tohotwai mana daŋ atta hira a yani nettok, inna oduhori cieŋ inno ewuarita hajik hosie to sana honyie.” ³³ Enyiak Yesu elimak to hosie nobo hitarriji hijo. “Ara lobie nyia te ido iyya ahabuok iko bula inno odumu hitonoŋorwo ariomok ta balu hotopwase.” ³⁴ Elima Yesu hirro hunna daŋ te iluluŋ to hiticielita; ojo lobe hitarrijita obe inyia elimak hinnak hirro to hosie. ³⁵ Nyo anyar etisiru hiram no hekilani nafa ojo inyia hijo, “Eroita iso naŋ to hitirrijita; elimak iso naŋ hirro innafa eŋofo man to hitieri na fau.” ³⁶ Nia ebusari Yesu iluluŋ no hiyyo atta ajiŋak ta haji. Ati afanu heyiyanak to honyie efiari hijo, “Ituhutek iyyohoi hiram na abalie nia esuru ta mana.” ³⁷ Etiraŋ Yesu to hosie hijo, “Lonyi Tuŋani liaNia ebusari Yesu iluluŋ no hiyyo atta ajiŋak ta haji. Ati afanu heyiyanak to honyie efiari hijo, “Ituhutek iyyohoi hiram na abalie nia esuru ta mana.”lo oyek hinyomo innia olibo. ³⁸ Ara mana fau; ara hinyomo illo olibo, lonyirok illo obie. Ara hidofe abalie lonyirok illo heturruoni; ³⁹ ojo mioroni ara tuŋani lo oyek abalie ara inyia hetisiahani. Ojo dioŋo iyya hisidi na fau, ojo hadioŋok ara anjilohien. ⁴⁰ Ati odue iso isia abali atta asuahak to hima, ara iso nia to hicuŋi na fau. ⁴¹ Efahak iso Lonyi Tuŋani anjilohien honyie hatagaranyai adde niyya daŋ epala hullo hilak, iko hullo ehuma hirruti. ⁴² Atta iso isia ebirok isia to hima inna onok. Owuon iso yio iko ⁴³ hirrita na hala. Edia iso liborok iyya holoŋ to lobie no Monye hosie. Lia lo owuon iko yohe tojio inyia hetiru. ⁴⁴ Ara lobie ne ido iyya ibariti inno eŋofo ta mana; larumu lobo atta eŋofok isia. To mune nohonyie, ohu inyia etinyaŋe hirro inno honyie adde, hijo anyar atu enyaŋini mana nyia. ⁴⁵ Ara hidofe lobie no Hollum iyya hapoconi ille etufa honoro no obwor ojo hinyaŋita inno honyie ogol. ⁴⁶ Owu tuŋani lia etinyaŋe innamuk hirro inno honyie daŋ. Attati larrumu hinyaŋita, atta inyia awoŋ enyaŋu honoro nia. ⁴⁷ Ara obie ne ido iyya hiyafohit ne lebirok hayafohok a hotwe hari, atta emietu enefu ham to woyyojin. ⁴⁸ Ehumu heririahak isia otifor hari atta egigelu hunna olibo wati atta ehumak to fedito, ati ebire hirro inno lorru adde. ⁴⁹ Ara iso to hisidi na fau iyya nya; afanu iso anjilohien egigelu hiyyo hullo orru tara ho hiyyo hullo olibo, ⁵⁰ Ebirohini iso isia hiyyo illia lorru to hima inna onok, owuon iso yio ojo hirrita na hala. ⁵¹ Ehum mahu itai etiru hirro innia daŋ?” Atta isia hitiraŋ hijo, “Ee, etiru iyyohoi” ⁵² Atta inyia hiro to hosie hijo, “Iyyania ara hegiorok daŋ a hiyyo illo etiyana hiram no obie ne ido iyya monye haji, ille odumu hirro marwak iko ŋejuho te ibati honyie. ⁵³ Nafa atuhok Yesu hiticelita inia, atta inyia eno ta mai to nyia adde. ⁵⁴ Nafa eba Yesu ta fau honye, atta inyia ŋeno a haji imojit etiyanari. Ellilliha ifa hiyyo hijo “Horrumu inyia ofioroho iko idwariti innia ogol aji? ⁵⁵ Hobe ara lonyie hesisihoni ille habauhien lia? Hobe Maria ara hotonye honye? Obe mahu halasira honyie ara, Yokobo, Yosefu, Simone iko Yuda? ⁵⁶ Obe mahu hanasira honyie owuon daŋ to hiji hohoi? Horrumu mahu inyia hirro innia daŋ aji?’’ ⁵⁷ Ejoria ifa isia to Yesu. Ati erro Yesu to hosie hijo, “Ebo hiyyo hitihabuo hayitani ha sayye kuyya hilahaŋ iko doŋe hosie etihabuo inyia.” ⁵⁸ Obe inyia egem innak idwariti dia to biaŋan no huruk nohose.