¹ Iyyania ifa lojo iluluŋ no hiyyo lokudak Yesu atta hitira hiram no Hollum, owueta ifa inyia to oger ha hari nettok na lara fure Genesaret. ² Owolo inyia togolisien arik to oko oger ha hari nettok. Esuru ifa heririahak adde to togolisien innohosie atta hillilla hiyafohita innohosie. ³ Atta Yesu esurok to nobo togoli nafa ho Simone, atta hifi inyia hotosulak adia a hotwe hari. Atta inyia ahunyie ta fau atta hitiyana hiyyo to hotwe ho togoli. ⁴ Ifa attohu inyia hiroita, ejo inyia to Simone, "Iyari togoli a hiji ha hari ade no owudo atta iyye ebirok boita innohoi anyar erietu ham." ⁵ Atta Simone hitiraŋ hijo, "Ettok, egema iyyohoi binno harie daŋ, obe erietu innak hirro, ati to hiro to nohoi, ahu naŋ ŋebusak boi a hifioŋ." ⁶ Ifa egiem isia, atta isia eduduhu iluluŋ na ham, atta boi innohosie fufuto. ⁷ Atta isia hilliloŋ loriahat hosie ta hani a togoli nobo anyar lafanu hiluak isia. Atta isia ŋafanu efutak togolisien niyya, man ettek togolisien ŋadillori. ⁸ Ati nafa ewolo Simone Peturu inyia, atta inyia ŋahuyek to huŋuta inno Yesu, hijo, “Ino teni hanaŋ, ara naŋ heyyani, Habu." ⁹ Ellilliha ifa inyia, ho liyya illafa lowuon he inyia, ta ham innafa le nefu isia atta eyari. ¹⁰ Ara ifa isia Yakobo ho Yoani, lonyirok ho Sebede, illafa lara oriahat ho Simone. Atta Yesu hijo to Simone, "Idek he ibaŋ, nyo ta far te inna a hosiere era iso iyye heririahani ho hiyyo." ¹¹ Ifa lojo isia leyyani togolisen oger, ebusak inyia daŋ atta isia ejufari Yesu. ¹² Owuon Yesu ifa to bore gala nobo, ati dia, owuon lobo tuŋani dia lo oŋwai ha talulu. Nafa ewolo inyia Yesu, atta inyia ŋahuyek to homom a fau atta hilolia to honyie hijo, "Ai! Habu, kuyya lewak iyye, itilibo nayya." ¹³ Atta Yesu etibisak hani no honyie atta hitir inyia hijo, "Awak naŋ. Tolibe." Teyya ojo talulu kuak atta ebusak inyia. ¹⁴ Atta inyia hitito tuŋani lia hijo hotobiaŋa inyia elimak lobo tuŋani, ati elimak inyia hijo, "Ino ikoi nohoi atta iyye etuhutek wan no hoi ta fadiri anyar ebuluc inyia iyye, iyya hifahita inno Musa hijo anyar lara hituhuti to hosie." ¹⁵ Atti esarik ifa igem nohonyie a rasa a hosiere, atta iluluŋ no hiyyo eduduhuni anyar afanu hitira hitiyena hidofe anyar etilib iŋweti hosie. ¹⁶ Ati odulei inyia eno amai no lodua omojori. ¹⁷ Ifa to holoŋitek nyya etiyanari Yesu, owuon ifa hilak Farisei iko hetiyenak ho hifahita ille ettole dia, illafa afanu ta masik innak a fau ha Galilea ho Yudea, ojo hido to bore gala no Yerusalem. Owuon ifa inyia ho golon na Habu ne etilibori iŋweti. ¹⁸ Nia afanu ilak hiyyo, illa akafita tuŋani loloŋura to biris, atta siaha ikoi ne leyari inyia a hotwe haji anyar etiferik inyia ta fau to hosiere ho Yesu. ¹⁹ Obe isia oruma ikoi ne eyari inyia a hotwe hijo obolo iluluŋ no hiyyo, atta ati isia ŋarek a hide ha haji. Atta isia etusuru inyia to biris honyie to hiji ho hiyyo to hejek iko to hosiere inno Yesu. ²⁰ Ifa ewolo inyia hiruk nohosie, atta Yesu hijo. "Illa, ebusahini hiyyata innohoi." ²¹ Ati efia hetiyenak ho hifahita iko Farisei innia hijo, "ŋai lia eramitari fure no Hollum? ŋai lia ŋebusak hiyyata, aracie Hollum hame?" ²² Atta Yesu hiyyen higigilita innohosie atta hitiraŋ, "Nyo lifia itai inia ta tajia hatai? ²³ Nari olibo, to hijio, 'Ebusahini hiyyata hoi? 'Tete, toloto' ²⁴ Ati anyar liyyen itai hijo owuon Lonyi tuŋani ho golon ta fau to hebusak hiyyata, ajo naŋ tohoi, 'Tete a hide, todumu biris nohoi, ino a haŋ hoi.'" ²⁵ Teyya odioto tuŋani lia a hide to hiji hosie atta ŋadumu biris nohonyie nafa ofirieri inyia, atta aciahari a haŋ honyie le etihabuo Hollum. Eliliha ifa hiyyo bi daŋ atta isia hitihabuo Hollum. ²⁶ Efut isia iko baŋi, atta hijo, "Ewolo iyyohoi rori inno logol Ena." ²⁷ Ta halu ho rori inne, eno Yesu teyya atta wolo heduduhani ho musuru fure no honyie Lefi letole da mai he leduduhari ho musuru. Atta inyia hijo to honyie, "Ijufuni nayya." ²⁸ Niya ebusak Lefi saŋ daŋ, odioto atta ejufari Yesu. ²⁹ Atta Lefi ehuhumak karama nettok to Yesu ta haŋ honyie, owuon ifa heduduhak ho musuru ille loluŋa dia, ojo ilak hiyyo ille lowuon to terefeja illa adaha hosie. ³⁰ Ati eŋuŋunita Farisei iko hetiyanak ho hifahita to heyiyanak hijo, "Jai edaha itai ejio hidofe emata iko heduduhak ho musuru ojo hiyyo heyyak?" ³¹ Atta Yesu hitiraŋ isia, "Obe hiyyo ille olibo osiaha diktor, ati hiyyo illo oŋwai osiaha. ³² Abe naŋ latu lelilloŋori hiyyo ille obis anyar eloito, ati attu nayya ellilloŋu heyyak hotoyite." ³³ Atta isia hijo to Yesu, "Eya ifa heyiyanak illo Yoani hiya ojo hidofe omojo gagaga. Ojo heyiyanak illo Farisei ehuma daŋ ania. Ati adaha heyiyanak illohoi ojio hidofe amata." ³⁴ Ojo Yesu tohosie, "Heremik iso oriahat illo hayamani hiya holowuon hayamani to hiji hosie? ³⁵ Ati afanu iso holoŋi inne leyari hayamani to hiji hosie, atta ati isia hiya to holoŋi niyya." ³⁶ Atta Yesu hijo hirro to hosie hitiriami hijo, "Obe tuŋani lo oritu boŋo nohonyie letiŋ tara boŋo ŋejuk atta arifak to boŋo maruani. Legiem inyia ania, eremik hirit boŋo nara ŋejuk. ³⁷ Obe tuŋani oremik eturak fino ŋejuk ahotwe rokwo maruani, legem inyia ania, atta fino ŋejuk hirit rokwo nia, atta fino nia ejuhori, atta rokwo nia guasa. ³⁸ Anyar ejuhohini fino ŋejuk a hotwai ho rokwo ŋejuk. ³⁹ Obe tuŋani ta halu ho himat nohonyie fino maruani, hiwak fino ŋejuk, ojio iso inyi hijo, 'Olibo maruani.'"