¹ Ta nobo holoŋ no Sabato, eno Yesu iko heyiyanak illo honyie a hotuai mana illo ogigilari ŋama, hifufua atta daha. ² Attati illak Farisei hijo, "Jai lehuma itai higiemita inno obe hifahita lawak to holoŋ no Sabato?" ³ Atta Yesu hitiraŋ isia hijo, "Obe itai ehen hiram no Davide nafa owodori inyia, atta inyia iko hiyyo illafa owuon he inyia higiem? ⁴ Owu inyia ahaji no Hollum, atta eyari imune no hosiere atta hinyia innak, ojio hidofe esio niyya to hiyyo illafa owuon he inyia atta isia daŋ daha, nafa odua to fadirihien hadahari.'' ⁵ Atta inyia hijo to hose, "Ara Lonyi Tuŋani a Habu lo Sabato.'' ⁶ Ifa ta far to nobo no Sabato, ojiŋak Yesu to Sinagog atta hitiyena hiyyo. Owuon ifa lobo tuŋani lo logulo hani ne inyiet. ⁷ Ojo hegiorok iko hetiyanak illo hifahita ho Farisei hiriria binno, awak ifa isia hiwolo hijo hetilib iso tuŋani lobo to Sabato, anyar isi erumu hipali ne letisiahari inyia. ⁸ Ati oyyen ifa inyia higigillo no hosie atta hijo to tuŋani lia logulo hani, "Tete a hide, towetai inni to hiji ho hiyyo daŋ." Dee odiote tuŋani lia a hide, atta weta dia ⁹ Atta Yesu hijo to hosie, "Efi naŋ itai, holibo iso ta far no Sabato hegiamari no olibo, kuyya heturuori, etuluak wuaran iko heturuori nari nia olibo?'' ¹⁰ Owolo inyia to hosie atta hijo to tuŋani, "Itibisak hani nohoi. Atta inyia higiem iyya elimak Yesu inyia, atta hani nohonyie libe. ¹¹ Ati ejoria ifa isia binno to honyie atta isia hiro ta wati illohosie hijo errumu iso isi hipali nobo to honyie jai. ¹² Ifa far nobo to holoŋitek niyya, eno Yesu a doŋe lo mojori. Odulei inyia harie daŋ mojo to Hollum. ¹³ Ifa lera far, ellilloŋo inyia heyianak to honyie, atta inyia ŋanyimu isia tomon harik, illafa efurek inyia hijo lefahat. ¹⁴ Fureta inne lefahat ara lobo Simone (lafa efurek inyia hijo Peturu) iko halasi honyie Anerea, Yakobo, Yoani, Filipo, Bartilimeyo, ¹⁵ Metteyo, Tomaso, Yakobo Lonyi Alfeyo iko Simone (Lafa lelilloŋo hijo Sillote), ¹⁶ Yuda Lonyi Yakobo, iko Yuda Iskariote lafa etinyiaŋai Yesu. ¹⁷ Atta Yesu arubuni to doŋe hosie daŋ atta weita to bur. Owuon ifa iluluŋ no lobolo no heyiyanak honyie dia, ojo hidofe iluluŋ no hiyyo to Yudea ho Yerusalem iko to holoroŋ na hari no Taya ho Sidon. ¹⁸ Afanu isia hitira inyia anyar etilib isia te iŋweiti. Ojo hiyyo ille etigema loyirihen inno lebot hidofe atta libe. ¹⁹ Awak ifa hiyyo daŋ hitir inyia, nyo ottu ifa duaran to wan honyie atta hitilib isia daŋ, ²⁰ Atta inyia riŋa to heyiyanak illohonyie atta hijo, "Itumune itai ille elociaŋ, nyo ara Lobie no Hollum na hatai! ²¹ Itumune itai ille ewodo iyyania, nyo ara efoŋi iso itai! Itumune itai ille eyio iyyania; nyo ellohita iso itai! ²² Itumune leyyalai hiyyo itai, ojo hidofe le efuhai isia itai ade to hiji hosie, atta hidofe moro itai, to rori inno Lonyi Tuŋani! ²³ Itimune ejio hidofe etihabwo, nyo obolo iso hisiori nahatai te ido, nyo egiama ifa hohonyiok hosie to hekkilak illo Hollum ania. ²⁴ Orru iso binno ta hatai hasamak, hijo erumu iso itai mune nahatai ena. Orru iso hido binno ta hatai ille efoŋi ena, nyo efuo iso itai wode ta halu. ²⁵ Orru iso da hatai ille ellohita ena! Efwo iso itai yio ejio hidofe ejiriŋa ta halu. ²⁶ Orru iso ta hatai letahuo hiyyo itai! Nyo ehuma ifa hohonyiok hosie hekilak telerok ania. ²⁷ Ati ajo naŋ ta hatai ille etira, itimune miorok illahatai, ejio hidofe ehuma na lanyar to hiyyo illo oliwari itai. ²⁸ Itijak hiyyo ille epit itai, itimoje hidofe to hiyyo ille etigiema itai. ²⁹ To tuŋani la annaŋ iyye ŋul ne inyiet, isiara hidofe inyia ŋul ne ihorroŋ. Lodumu lobo tuŋani gamis nohoi, isiara hidofe to honyie no ŋolon. ³⁰ Isiara to lobo tuŋani sihin ne lefi inyia, leyari lobo tuŋani sihin nohoi, baŋa enyiak hifi inyia henyiahak to hoi. ³¹ Iyya ewak iyye hiyyo hehuma to hoi, ihuma do hosie daŋ ania. ³² Le emuno iyye hiyyo illo omuno iyye, herrumu iso iyye nyo tara hosie? Nyo omuno heyyak hiyyo illo lomuno isia. ³³ Lehuma iyye na lanyar to hiyyo ille ehuma na lanyar ta hatai, herruma iso itai nyo tara hosie? Ehuma hidofe heyyak ania. ³⁴ Leluahak iyye hirro innohoi to hiyyo ille eyyen iyye hame hijo enyiehak iso to hoi, herrumu iso iyye nyo tara hosie? Nyo oluha heyyak hirro to heyyak, to hirro inna awak isia enyiahu. ³⁵ Ati itimune miorok illahatai atta itai hihuma isia na lanyar. Ituluahak to hosie, ibaŋa egigillo henyiahu saŋ tara hosie, nyo obolo iso hisiorita innahatai. Era iso itai Lonyirok ho Hollum to hide, nyo omehini inyia to hiyyo illo obe lojo humo iko hiyyo illo loru. ³⁶ Itimehini iyya lomehini Monye hatai. ³⁷ Ibaŋa oŋot, hijo hotobiaŋa oŋotohini ta hatai. Ibaŋa etipal, hijo hotobiaŋa hiyyo etipal itai. Ibusak hiyyo hipalita innohosie, atta iso innohoi ŋebusahini. ³⁸ Isiara to hiyyo, atta iso hiyyo hisio to hoi. Hisiori to himorot no onyieru afau atta attubahini man oloŋori- oremik ejuhori amurosin hatai. Te iciemit ne eciamari iyye, ociemari iso hidofe hiyyo iyye.'' ³⁹ Atta inyia elimak isia hitiriami. "Heremik tuŋani loŋodo edihori tuŋani lo loŋodo? Kuyya le edihori, eremik isia daŋ ŋahuye ewudo, obe iso isia? ⁴⁰ Obe heyiyanani obolo agalik hetiyanani honyie, ati letiyyen inyia, atta hira iyya hetiyanani lo honyie. ⁴¹ Nyo liriŋa iyye to hujuti letiŋ no lowuon to honyiek ha halasi hoi, ejio iyye ebe egigilu hita nia to honyiek hoi? ⁴² Jai lejo iyye ta halasi hoi, 'Halasik, iko adumu naŋ hujiti nia to honyiek hoi,'' ejio iyye ebe ewolo hita nia to honyiek hoi? Iyye hetimayahani! Todumu doo hita nia to honyiek hoi, atta iyye wolo analanyar idumuni ati hujiti to honyiek ho motte hoi. ⁴³ Obe yani no olibo eŋarak haŋer inno lomura, obe yani no lomura eŋarak haŋer inno olibo. ⁴⁴ Nyo eremik yani daŋ aherini ta haŋer hosie. Obe itai eremik adeu ŋabolo tara ŋaria, obe hidofe itai ledeu haŋer inno fino tara hukua. ⁴⁵ Tuŋani la lanyar, afanu ilibiti to taji honyie inno olibo, ojo tuŋani lo loru afanu irutioho ta taji honyie. Nyo ero hutuk rori inno lowuon ta taji. ⁴⁶ Nyo le lilloŋo itai naŋ, 'Habu, Habu', eijo itai ebo hihuma rori inne elimak naŋ itai? ⁴⁷ Hiyyo daŋ illa afanu ta hanaŋ, atta hitira rori innanaŋ egemari, atta nayya ŋelimak itai he ciala jai. ⁴⁸ Owuon iyya tuŋani lo oduhok haji, atta hibok fau no lowudo wir wir man eba do moruo atta aduhok haji da mai no logol. Lojo igura lotu atta hibul hiji, obe oremik hituhut haji no honyie, obe loworei, nyo omijak haji esihohini na anyar. ⁴⁹ Tuŋani le letira rori innanaŋ ojio hidofe obe eruk, owuon iyya tuŋani lo oduhok haji to hide ho huron obe lobok ahotue fau. Lojo igura lebulak haji, atta haji ŋeribori ko kwak atta run."