¹ Atta iluluŋ nohosie daŋ diote ahide, atta isia eyyani Yesu ahosiere ho Pilato. ² Atta isia hitiara roso inyia hirro. Hijo, “Erumu iyyohoi tuŋani ille etihara doŋe nohoi, ebo hisio musuru to Kesari, ojo hidofe ara inyie to wan Kristo Habu.“ ³ Efi Pilato inyia hijo, "Era iyye Habu lo Yudea?'' Atta Yesu hitiraŋ inyia, atta hijo, ''Iyya ejo iyye.” ⁴ Ojo Pilato to Leitok lo fadirihien iko iluluŋ, “Abe naŋ larrumu nobo hipali to tuŋani ille.” ⁵ Ati arrasa isia, hijo, “Etihara inyia hiyyo, etiyana to missihi daŋ inno Judea, etiara ta Galilea many ta mai inna." ⁶ Ati ifa etiru Pilato ania, efia inyia hijo hara mahu tuŋani ille lo Galilea. ⁷ Ifa eyyen inyia hijo ara Yesu la lowon to hilohitok ne Erode, atta inyia efahak Yesu te Erode, lafa owuon to Yerusalem to holoŋi nuhe. ⁸ Ifa lewolo Erode Yesu, omuno ifa inyia binno, nyo awak ifa inyia hiwolo inyia man beren. Etiru ifa inyia atta inyia wahan egonyu inyia iko iduariti innafa egiem inyia ⁹ Efi Erode Yesu to hirorita inne loluŋa, attati obe ifa Yesu etiraŋ inyia nobo hiram. ¹⁰ Odioto ettok lo fadirihien iko hegiorok atta arrosok inyia hirro inno lorru. ¹¹ Atta Erode ho loseŋer illohonyie moro inyia atta erramitari inyia, atta eticiofok to honyie boŋojin inne elahaman atta efahak inyia to Pilato. ¹² Atta Erode ho Pilato sonya himotia ta far nyia (Beren ara ifa isia amiorok). ¹³ Ellilloŋ Pilato habwok illo fadirihien iko ettaha jo iluluŋ no hiyyo. ¹⁴ Ojo to hosie, eyyani itai ta hanaŋ tuŋani ille iyya lobo ille edihita hiyyo hehumai hirro inn loru, “Itiwolo efi naŋ inyia to hosiere hatai, arrumu naŋ obe hada nobo hipali to tuŋani ille ta hirro inia daŋ errosohini itai inyia. ¹⁵ Obe Erode orrumu inyia hepalani, inyia nia enyiak inyia efahu inyia te iyyohoi, itiwolo hidofe, obe hidofe inyia osiru to ye. ¹⁶ Awak iso nayya hibak inyia bi attati nayya ebusak inyia. ¹⁷ Egioro ifa to hifahi hijo anyar ohek Pilato tuŋani lobo lobotie la adaha isia hiyyom na allaŋari imune. ¹⁸ Atta oyio ifa hiyyo binno daŋ anobotie, hijo, "Iyai tuŋani lia ade, itihek te iyyohoi Barabas!'' ¹⁹ Efitak ifa hiyyo Barabsas nyo orosok ifa hiyyo inyia hijo awak ifa inyia asulai ettaha ade to hittolojita innohosie, ojio hidofe ottohe tuŋani. ²⁰ Enyiak Pilato hirro to hosie, awak ifa inyia ahek Yesu. ²¹ Ati eyyorro ifa hiyyo binno hijo, Isihok inyia, isihok inyia.'' ²² Atta inyia hidas to hosie hitahunihi hijo, "No nyo, hegiem tuŋani ille nyo no orru? Obe nobo sihin na arrumu naŋ no osiru to honyie ye. Abak iso nayya inyia atta naŋ ebusak inyia.'' ²³ Arrasa ifa isia hiyyorro no, awak isia anyar le sihohini inyia. Atta hiyyorro nohosie hiloit taji no Pilato ²⁴ Atta Pilato eruhu hisio to hosie wahan nohosie. ²⁵ Ahek inyia lia lafa efia isia lafa owuon ta babus to hitihara nohonyie haŋ ojio hidofe ottohe tuŋani. Ati esio ifa inyia to hosie Yesu. ²⁶ Nafa eyari isia inyia abali, atta isia eniefu lobo la ara fure nohonyie Simone lo Sirene, lafa ottu to doŋe hosie, atta isia ahafak to honyie hoto lororoi kurucie le ejifita Yesu. ²⁷ Atta iluluŋ no obolo no hiyyo iko ŋorwo innafa oyio ojio hidofe ejiriŋa te inyia ejufari inyia. ²⁸ Ati ofiala Yesu to hosie atta hijo, "Ŋaniok inno Yeruselem, ibaŋa oyio nayya, ati itiyye to wati innahatai iko to durre innahatai. ²⁹ Itiwolo, afanu iso holoŋitek innafa inna afanu isia hijo, Hotomune hosehe ne eholofi iko hosehe no obe esie, iko hinai no obe etidasa.'' ³⁰ Atta iso isia hitiara hijo to doŋiok, ''Ituhuyek te iyyohoi.' iko to doŋiok illo hitiŋi imuluhak iyyohoi. ³¹ Le egiama isia hirro inia hara yani igara, nyo iso edoŋ lotte inyia?'' ³² Orihori ifa isia illak hahalak arik anyar esihohini he inyia hotoyo he inyia. ³³ Ifa eba isia ta mai no ojo hijo, "Mai no Hoo,'' atta isia esihok inyia dia, iko hattohok liyya, esiho ifa lobo ta hani he inyiet nohonyie ojio lobo esiho to oko hani he ihorroŋ. ³⁴ Atta Yesu hijo, "Monye, ibusak isia, nyo obe isia loyyen hirro inne egiama isia.'' Atta isia hibiro muaŋa ehutu ŋai, awahari abwanyari boŋojin innohonyie. ³⁵ Oweta ifa hiyyo arria illo orriŋa inyia iko ettaha ille ellohitari inyia hijo, " Etiluahu hido inyia illak. Isiara hidofe inyia hetiluahu wan nohonyie, la ara inyia dede Kristo onyimoti lo Hollum.'' ³⁶ Atta hidofe oseŋer ellohitari inyia, ehutok to honyie, atta etimatik to honyie balu. ³⁷ Atta hijo, “Lera iyye Habu lo Yudea olwak wan nohoi. ³⁸ Owuon ifa ihierit to hide ho Kuruce no ojio “Ara inyia Habu lo Yudea.'' ³⁹ Atta lobo lafa esihohini he inyia, himor inyia, hijo, “Ebe ati iyye era Kristo ‘Tolwak wan nohoi he iyyohoi.” ⁴⁰ Ati etiraŋ ifa lobo atta hiriŋ inyia hijo, “Obe iyye ebaŋ Hollum, ena ewuon iyye to ŋoto nia daŋ. ⁴¹ Ewuon iyyohoi inni dede ano lobis, efwotu iyyohoi hipalita inne ehum iyyohoi, ati obe tuŋani ille ehum inak hirro inno lorru.“ ⁴² Atta inyia hinyiak afonik hijo, Yesu, togilu nayya lejo iyye leba to lobie nohoi. ⁴³ Ojo Yesu to honyie, “Dede ajo naŋ to hoi, ena ewuon iso iyye ika naŋ ta paradisio.'' ⁴⁴ Era ifa kil na far atta fau daŋ rioho man ara holoŋ hotoŋwan. ⁴⁵ Ifa lenyie holoŋ ho bworro. Atta boŋo himuhi na Haji Imojit bwanya to hiji. ⁴⁶ Oyio ifa Yesu binno ahide, atta hijo, ''Baba ta has innohoi esio naŋ Loyiri hanaŋ. Ojo inyia atta yei. ⁴⁷ Ifa ewolo ettok hirro innafa oliew, atta inyia hitahwo Hollum, hijo dede ara tuŋani illeŋ haliboni.'' ⁴⁸ Ifa ewolo iluluŋ innafa afanu orriŋari hirro inne edoŋ atta hidofe hiwolo hirro to honyiehite te innohosie, aciaahari isia illo ollumo suhiara innohosie. ⁴⁹ Atta illafa daŋ oyyen inyia, iko ŋorwo ejufari inyia ta Galilea, oweta isia te iloma atta riŋa hirro niyya. ⁵⁰ Ati owuon ifa lobo tuŋani dia la ara fure nohonyie Yosefu, ara ifa inyia tuŋani le iluluŋ nyia. Ara ifa inyia tuŋani lo olibo ojio hidofe ara ahaliboni. ⁵¹ Obe ifa tuŋani lia awak eruhu higigilo no hosie iko higemita innohosie. Ara ifa inyia lo Yudea to bore gala na Arimetea; osiaha ifa inyia obie no Hollum ⁵² Eno tuŋani lia to Pilato, atta inyia hifi wan no Yesu. ⁵³ Odumu inyia wan nyia afau, atta bubun to boŋo ne elahaman, atta etiferik te iwure nafa oborini ade tara morru, no lobe lobo onuhahini dia min beren. ⁵⁴ Ara ifa far ne hitihuma ifa awoŋ no Sabato, ⁵⁵ afanu ŋorwo innafa ejufuni Yesu man to Galilea, atta isia hiwolo ilume nafa etifierihini isia inyia dia. ⁵⁶ Aciahari isia, atta adiarak hitiŋwojita inne efufuso hiyyyo ta hayoni. Atta isia ayiriu ta far no Sabato iyya egioro to hifahi.