1
To motie beren to hitieri no holoŋ te isabit, afanu isia elume eyyani he isia hitiŋwojita innafa odiarak isia.
2
Atta isia arrumu moru etiŋatari ade tara ilume.
3
Ojiŋak isia a hotwai. Ati olita ifa wan na Habu Yesu teyya.
4
Oweta isia dia illo odule hilliliha to hirro inia, ojo hiyyo lohorik illo opipiak boŋojin innohosie atta hidoŋ.
5
Ati abaŋi ŋorwo atta hiluŋuro afau, atta isia hijo to ŋorwo, “No nyo esiaha itai hawarani to hiji ho hayok?
6
Obe inyia teni, ati ebuhu inyia! Itigilu hirro innafa ero inyia ta hatai nafa halarrasa inyie ta Galilea.
7
Hijo esiarahini iso Lonyi tuŋani ta has ho heyyak, atta hidofe isia esihok inyia, ojo ta halu ho holoŋitek hunik ebuhu iso inyia inyiak to wuaran.
8
Agilu ŋorwo hiro nafa ero inyia.
9
Aciohini isia te ilume atta elimak hirro inne daŋ to hejufak iko hiyyo illamuk daŋ. Ara ifa ŋorwo inia Maria Madalinna, Juana,
10
ojo Maria hotonye Yakobo, ojo isia ho ŋorwo innak atta elimak hirro daŋ to lefahat illo Yesu.
11
Ati egigilo ifa lefahat liyya hijo obe hiram ne ara dede, atta isia enyiei leruk to hiram nia tara hosie.
12
Ati odioto ifa Peturu ahide, atta hinyior elume, oweta, atta riŋai ahotwai. Ewolo inyia boŋo lowuon dia, atta Peturu aciahari ahaŋ honyie, ellilliha hijo nyo mahu lowuon.
13
Atta illak lohorik efie ta far nyia a doŋe nyia lara Emmaus, nafa lara maili ile to Yerusalem.
14
Ero isia to wati innohosie hirro daŋ innafa edoŋ.
15
Ifa lero isia to wati innohosie atta Yesu alotohini daŋ he isia.
16
Ati owolo isia inyia ati obe ifa isia oremik ahieru inyia.
17
Ojo Yesu to hosie, “Hero itai nyo to wati illahatai lohorik?'' Atta isia weta ille ejiriŋa. Atta lobo lohose lafa lara fure Kiliopa, etiraŋak to honyie hijo,
18
“Hera iyye lobo hatamononi inni to Yerusalem lobe oyyen hirro hunna lerr hiyyo to holoŋite hunna?''
19
Ejo Yesu to hosie, Innari hirro inia?” Etiraŋ isia to honyie, “Sayye inno Yesu lo Nasarit, lafa ara hekilani, lologol binno ara inyia Hiro no Hollum ojo hidofe bi daŋ to hiyyo.
20
Lafa esio ettaha illo iklesia iko hekumok hijo hotottohe hiyyo inyia hotoyo atta esihok inyia.
21
Ati egigillo ifa iyyohoi hijo ottu iso inyia ahek hiyyo ille Isaraile. Te inne daŋ era holoŋitek hunik iyyania ta nafa ebarari hirro inne.
22
Ati etubur innak ŋorwo innoho iyyohoi nyo eba isia te ilume to motie beren.
23
Nara enyie isia holorumu wan nohonyie, afanu isia hiwolo hiro na anjilohien illafa owuar inyia.
24
Ofwo ifa ilak liawa illohoi elume loriŋari atta ŋarrumu dede iyya nafa elimahini hiito noŋorwo nia. Ati obe ifa isia egonyu inyia.
25
Ejio Yesu to hosie, “Itai hullo munaŋak ojo tajia odico to huruk to hirro inno hekilak.
26
Obe ifa osiru to Kristo hetigiamari hirro inia anyar lojiŋak to lobie nohonyie.
27
Etiara ifa to Musa man ohu to hekilak, eloitok ifa Yesu to hosie hirro innafa lofwo hidoŋ to honyie.
28
Ifa lafanu isia aŋati ha haŋ nafa lofuye isia, atta Yesu loton iyya ohu eno alamarai.
29
Ati ebo isia ebusak inyia heno atta hijo to honyie, “Itolojo daŋ iko hoi,” Nyo eno ifa hira iŋalio.” Atta Yesu eno hittole he isia.
30
Ifa lettole inyia daŋ he isia, atta isia daha, adumu inyia immune ejok atta hisio to hosie.
31
Atta honyiehite innohosie ŋa, ifa eyyen isia inyia atta inyia lite tara hosie kwak.
32
Ejio isia to wati innohosie, “Obe ifa owuon iyya owulo hima to tajia innohoi nafa erarari inyia te iyyohoi to hikoi atta elimak Hiram nia te iyyohoi to Bibi?''
33
Atta isia diote ta far nyia atta aciahari a Yerusalem, orrumu liyya tomon ho lobotie losuduha nobotie ojo illafa owuon daŋ he isia.
34
Atta hijo isia hijo, "Ebuhu Habu dede, olieu to Simone.”
35
Elima isia hirro daŋ innafa edoŋ te ikoi, iko hetuhutek no Yesu to hosie to hibun to nohonyie immune.
36
To hiro nohosie hirro niyya, owueta Yesu to wan to hiji nohosie, atta hijo to hosie, "Itigolo daŋ ta hatai."
37
Ati ekikiro ifa isia atta wuana ho baŋi iyya inna egonyu isia Loyiri.
38
Ojo Yesu to hosie, “No nyo odiaha tajia innahatai? No nyo obore hifiita ta tajia innahatai?
39
Itiwolo has innanaŋ iko hejek innaaŋ. Itittir nayya atta itai hidofe hiwolo. Obe loyiri owuon iko het, iyya inna awuanari nayya.''
40
Ifa attohu inyia hiro, atta inyia etuhutek to hosie has innohonyie iko hejek innohonyie.
41
Ati obe ifa isia eruk nyo arrasa ifa isia wuana ho mune, ojo hillilliha, ojo Yesu to hosie, “Ewuon itai ho nobo daha?”
42
Esio isia inyia hami no lomuda.
43
Atta Yesu adumu hami no omuda atta hinya.
44
Atta inyia hijo to hosie, "Nafa halawuon naŋ he itai, elimak ifa naŋ daŋ hijo egioro to ifahita inno Musa, iko hekilak, ojo Hidolita otten.''
45
Atta inyia hiŋa hosi innohosie hijo anyar bahati oyyen higierita.
46
Atta inyia hijo to hosie, "Egioro hijo, etigiema iso hiyyo Kristo enyiak ebuhu to ye ta far hitahunihi.
47
Anyar etiyana ta masik bi daŋ hibo no hiyyata to fure nohonyie, etiara to Yerusalem.
48
Irra ittai asuuti inno hirro hunna.
49
Itiwolo efahu nayya itierit no Monye hanaŋ ta hatai, ati ta hatai, ati itilai do to bore gala man ottuni golon to hide.''
50
Atta Yesu edihori isia aŋati ho Betania. Atta inyia hikaf has innohonyie ahide, atta hijok isia.
51
Ta nafa lajahari inyia isia, atta ebusari isia atta inyia eno ido.
52
Niya, atta isia hitihabwo inyia, atta aciahari a Yerusalem to mune nolobolo no.
53
Odule ifa isia wuana to hotwai Haji no Hollum illa ajaha Hollum