¹ Niyya ebono Yesu atta egonyu hiyyo hasamak illafa ehuma hisiorita inno hosie to ottunari. ² Atta inyia egonyu nobo ihidak no ŋorwo efiyak arobia lohorik. ³ Atta inyia hijo, “Ajo naŋ ta hatai dede hijo esio ihidak innaŋ inno arria agalik isia bidaŋ. ⁴ Esio isia hisiorita innohosie to himunya ne ibariti innohosie. Ati esio ihidak inna to hilociaŋ nohonyie hirro innohonyie daŋ ta mai innafa etimanya inyia.'' ⁵ Ero ifa illak illohosie to haji imojit, to hilahaman nohonyie to moru iko hisiorita, atta inyia hijo, ⁶ "To hirro inia eriŋa itai, ottu holoŋ no obe nobo moru ebusahini to nobo no obe obwara.'' ⁷ Atta isia hifi inyia hijo, "Hetiyanani, anu iso ofu hirro inia aliew? ŋari nyo iso etuhutek hijo haliew nohosie?'' ⁸ Atta Yesu hitiraŋ, ''Ihuma riŋa hijo hotobiaŋa lobo tuŋani enyieb itai. Afanu iso hiyyo arria to fure nanaŋ, hijo, "Nayya lia,' atta hijo, 'Eliaha far nyia.' Ibaŋa ejufari halu nohosie. ⁹ Le etiru itai fere iko ŋalafa, hotobiaŋa itai elafuho, isiara hirro inia hotoliew do to hosiere, ati obe iso hucuŋi oliew kokwak.'' ¹⁰ Niya atta inyia hijo to hosie, “Oliwa iso doŋe iko nobo doŋe, ojo obie iko nobo obie. ¹¹ Owuon iso ikebehi inno hittaha ta masik arria, owuon iso hiŋa iko iŋweti arria Owuon iso hiro inne etibaŋa hiyyo iko hituhututa te ido. ¹² Ati holobe hirro inia daŋ, otirok iso isia has innohosie ta hatai atta hitigiama itai, man esio itai ta hajik he imojiti iko ta babusi, ojio hidofe eyyani itai to hosiere ha habuok iko mamuri to fure nanaŋ. ¹³ Eyari hirro inia etigolori itai te igem no olibo. ¹⁴ Iyyania ihumak ta tajia innahatai hijo ebe itai efu risai la lawoŋ far nyia, ¹⁵ esio iso naŋ ta hatai hiroria iko ofioroho, no obe iso miorok illahatai oremik tume. ¹⁶ Ati esio iso hesiok hatai itai, halasira, woyyo, iko motiarak hatai to hosie atta isia attohe illak tara hatai. ¹⁷ Oliwari iso hiyyo itai daŋ to fure nanaŋ. ¹⁸ Ati obe iso lobo hofitti olita to hosi innahatai. ¹⁹ To hidi nahatai, efwotu iso itai oholioho innahatai. ²⁰ Le egonyu itai ekolok miorok Yerusalem, itiyyen hijo eliaha hitihara nohonyie. Ilimak liyya illa amanya to Yudea heruata ²¹ adoŋe, ilimak hidofe liyya illa amanya to hiji ho bore gala heruata, ibaŋa ebusak illa alama tara Yerusalem hotojiŋak ahotwe honyie. ²² Holoŋitek inno hilionyo hunna, hijo anyar lottuba hirro innafa egiorohini. ²³ Orru iso to ŋorwo inne ebuŋuta iko to niyya inne etidasa to holoŋitek niyya! Obolo iso hitigiama to hiyyo illa amanya to fau nia, obolo iso hidofe jore no Hollum to hiyyo. ²⁴ Ohuye iso isia to demi atta iso hiyyo eniafari isia te innak masik inno obe ara innohosie, Orriehini iso Yerusalem ta fau to miorok illohonyie, man ottubari holoŋitek inno halufak inne etigiamari isia. ²⁵ Oliew iso hituhutita to holoŋ, ta yafa, iko to haher, iko ta fau. Owuon iso doŋiok to hitigiama, iko ta baŋi nyo to hibuluŋuta no hari nettok. ²⁶ Owuon iso huyuta no hiyyo illa abaŋ to hirro inna afanu afau. Ekikiro iso golon ne ido ²⁷ Ati egonyu iso isia Lony Tuŋani ottu te itiran ho golon ojo to hitahwo no obolo. ²⁸ Ojo letiru itai hijo eba hirro inia, itidiote ahide atta itai hihaf hosi innahatai ahide, nyo eliaha etilohini nahatai.'' ²⁹ Atta Yesu elimak to hosie nobo hitiriami, "Itiwolo to bule, iko to yanik daŋ. ³⁰ Le asidu isia hosi innohosie, atta itai egonyu to wati innahatai, itiyyen hijo eliaha tahas. ³¹ Hidofe lejo itai hirro inia eba, atta itai hiyyen hijo eliaha obie no Hollum ³² Dede, ajo naŋ ta hatai, hijo obe iso hilahaji innaŋ olita man oliew hirro inia daŋ. ³³ Olita iso ido iko fau, ati obe iso hiram nanaŋ olita. ³⁴ Ati ihuma riŋa wati innahatai, hijo hotobiaŋa tajia innahatai elafuho to hirro inno mata iko to hirro inne etihara itai, iko hirro hunna etibaŋa itai ta manya, atta holoŋ nyia awoŋ kwak ta hatai atta eniefu itai. ³⁵ Ottu iso far nyia to hiyyo illa amanya ta fau daŋ. ³⁶ Ati ihuma riŋa binno a sahien daŋ, itimoje hijo anyar edule itai golon heruatari ade tara hirro inno orru inna afanu, hijo anyar ewetari to hosiere ho Lonyi Tuŋani.'' ³⁷ To holoŋitek innafa etiyanari inyia te imojit, ojo ta harie owu inyia ade, ofirie adoŋe ho Oliveto. ³⁸ Afanu ifa hiyyo daŋ ahunyie to honyie to motie beren etirari.