1
Ojiŋak ifa Yesu atta eno to oko Yeriko.
2
Nia, owuon ifa lobo tuŋani dia lalara fure nohonyie Sekeyo. Ara ifa inyia habu lo heduduhak ho musuru ojo hidofe asam.
3
Awak ifa inyia hiwolo hijo ŋai lia ara Yesu ati obe ifa inyia oremik wolo to hide he iluluŋ, nyo osuk ifa inyia.
4
Nia enyior inyia ahosiere ho hiyyo atta ŋarek ahide ho yani aŋaboli anyar egonyu inyia, nyo awak ifa Yesu ŋeno te ikoi to nyia.
5
Ifa laŋawoŋ Yesu amai inyie ebono ahide atta inyia hijo to honyie, “Sekeyo, tolu kokwak afau anyar ahu naŋ hitole ta haŋ hoi.“
6
Nia efiriŋu inyia ŋallu afau atta hiboŋ Yesu alanyar.
7
Ifa egonyu hiyyo daŋ atta isia hiŋuŋunuta hijo, “ŋeno hallaŋ illeŋ hira ahatomononi ta haŋ ho tuŋani heyyani.“
8
Atta Sakayo diote atta hijo, “Habu toriŋai, “Habu esio iso naŋ hirro inanaŋ to lociaŋak ojo lemumun naŋ lobo tuŋani te innak hirro adumak iso naŋ inyia hinyiahita aŋwan.“
9
Atta Yesu hijo to honyie, “Ena eba etilohini ta haŋ inna nyo ara ifa inyia lonyi Abramo.
10
Nyo ottu Lonyi Tuŋani osiahari hikoi ne letilahari hiyyo illo olita.“
11
Ifa etiru isia hirro hunna odule inyia hiroita atta elimu hitiriami nyo eliaha ifa inyia ho Yerusalem, atta isia higigillo hijo eliaha iso lobie no Hollum hijo alieu kokwak.
12
Atta inyia hijo, Ohu ifa lobo tuŋani anobo doŋe na alama hijo ahu inyia efotu to honyie obie atta ŋaciohini.
13
Atta inyia hillilloŋ hegiemak illo honyie tomon atta hisio arobia tomon atta hijo to hose "Itinyiaŋai man aciohini nayya.
14
Ati eyyalai ifa hiyyo illo doŋe honyie inyia atta isia efahak illak lefahat ta halu honyie hijo 'Obe iyyohoi ewak tuŋani lia ahabu lohoi.‘
15
Nia ifa efwotu inyia obie teyya atta awoŋ ellilloŋu hegiamak illo honyie illafa esio inyia arobia afanu to honyie hijo ayyenari hijo hera mahu arobia jai inne etinyiaŋu isia.
16
Atta hitieri awoŋ atta hijo, ‘Habu etinyiaŋu naŋ arobiyaha tomon te illafa esio iyye ta hanaŋ.‘
17
Atta inyia hijo to honyie "Anyar binno. 'Ira iyye hegiamani lo olibo no' iyya eniefita ifa iyye hirro illo oduhucio ena lanyar ehumak iso naŋ iyye le ettok loboŋito inno obore gala tomon.‘
18
Atta hegiamani hitarihi awoŋ atta hijo, 'letok, etinyiaŋu naŋ arobiyaha miet te illafa esio iyye ta hanaŋ.
19
Atta inyia hijo to honyie, 'Etoŋita iso iyye botin inna gala miyet.‘
20
Atta lobo awoŋ atta hijo, ‘Leitok, ibe arobiya lafa hoi. Abubunak ifa naŋ ta manir atta naŋ ŋatunak inyia ana lanyar.
21
Nyo abaŋ ifa naŋ hiro nohoi nyo ara iyye tuŋani lo lorrute. Edumu iyye hirro inno lobe ara innohoi ojo hidofe edieŋitta hirro hunna libe eyek.‘
22
Attati habu hijo to honyie, 'To hiro to nohoi aŋot iso nayya iyye, iyye hegiamani le ebwot. Eyyen ifa iyye hijo ara nayya tuŋani la arru binno, adumuta innak inno obe ara innanaŋ, ajo hidofe adieŋu inno abe naŋ ayek.
23
No nyo ebe iyye emak arobiyaha innanaŋ to ottunari, hijo la awoŋ nayya atta nayya ida arrumu he innak ifoniti innohosie?'
24
Attati ettok hijo, to hosie, 'Itiwetai dia, itidumu arobiya lia ade tara honyie, isiara to lia lowuon ha arobiaha tomon!
25
Ejio isia to honyie, ‘Habu, oyita inyia ha arobiaha tomon.‘
26
Ajo naŋ da hatai, hijo lowuon lobo hasaŋ iluluŋ ofonihini iso to honyie ariai ojo to lia lobe hirro tara honyie, eyari iso ade tara honyie nyia lo owuon to honyie.
27
Ojo miorok ilia hanaŋ, illo lobe lawak naŋ hatara naŋ ettok lohosie, iyyani isia inni atta itai attohe isia to hosiere hanaŋ.'''
28
Ifa attohu inyia hiro hirro inne, atta inyia eno tohosiere, oboto man Yerusalem.
29
Ifa eliaha inyia aŋati ho Besfaje ho Betani, to doŋe nafa ellilloŋo hiyyo hijo Olifeto, atta inyia efahak heyiyanak arik,
30
Atta hijo, “Ifeti adoŋe nyie. Lejiŋak itai, efwo iso itai arrumu nobo sigira inna holobe hiyyo etirrek saŋ to hide. Itihek atta itai eyyani ta hanaŋ.
31
Lefi lobo itai, ‘No nyo eho itai inyia?’ 'itijo, ‘Awak Habu inyia.’”
32
Efie illafa lefahak hiyyo atta arrumu Sigira iyya nafa elimahahini isia.
33
Oho ifa isia sigira atta monye ho Sigira arrumu isia atta hijo to hosie, “No nyo eho itai sigira?”
34
Atta isia hijo, “Awak Habu inyia.”
35
Atta isia eyyani inyia to Yesu, atta ebirok boŋojin innohosie atta etuhunyiek Yesu to hide.
36
Atta isia daŋ afiatak boŋojin innohosie te ikoi nafa ohuye Yesu.
37
Ifa leliaha inyia aŋati te illut no doŋe no Olifeto, atta iluluŋ no heyiyanak hitiara mune ojo hidofe etihabwo Hollum, eyyorro wuoŋ wuoŋ te igem ne ettok daŋ lewolo isia atta hijo,
38
“Hotowuana jaha ta Habu lia lo ottu to fure ta na Habu Hollum! Himwara te ido ojo mune iko lohwo hotowuana to Hollum!''
39
Ejio illak illo Farisei to hiji he iluluŋ to honyie, “Hetiyanani, iriŋa heyiyanak illohoi,”
40
Etiraŋ Yesu atta hijo, “Elimak naŋ itai hijo loremik ida hulloŋ aduehini atta moru yio ade.”
41
Nafa awoŋ Yesu aŋati ho bore ha gala, atta inyia yio to Yerusalem.
42
Hijo, “Iyya ne eyyen ida itai far inna hame, kuyya, hirro inne oremik ta hatai himwara! Ati iyyania eŋofohini isia to honyiehite innahatai.
43
Ati afanu iso holoŋitek ta hatai, na ofu miorok illahatai oduhok iwudoho aŋati hatai, ati atta amirini ahotwai to oko kal arria.
44
Ogoŋok iso isia itai ta fau ojo durre innahatai daŋ hatai. Obe iso ebusak moru to hide ho nobo, nyo obe ifa isia ogilu hijo awak Hollum hiciem hijo etilohu itai.”
45
Niya ajiŋak inyia ikelesia atta hitiara hifuhuta hiyyo illafa etinyiaŋa dia.
46
Atta hijo to hosie, “Egiorohini, Hijo ara iso haji hanaŋ Haji Imojit,‘ ati ehumak itai inyia a haji no hahalak.”
47
Niya etiyana ifa Yesu motie motie ta Haji Imojit nettok letaha illo fadirihien ojo hegiorok ojo hetidihitak illo hiyyo atta isia hiwak attohe inyia,
48
ati obe isia lorrumu nobo hikoi no oremik etisiahari inyia, nyo etira ifa hiyyo bi daŋ to honyie dede.