¹ Atta inyia hirro to hitiriamita to hosie to hiram no mojo, hijo hotobiaŋa isia oŋuŋusia, ² atta inyia hijo, "Owuon ifa lobo haŋotoni to bore gala nobo lo obe eruk to Hollum ojio hidofe obe abaŋ hiyyo ³ Owuon ifa nobo ihidak no ŋorwo to bore gala nyia, no odule lotton to honyie, ‘Helwak nayya tara tuŋani lo orosok nayya hipalita.‘ ⁴ Obe ifa inyia awak hilwak inyia, ati ta halu, atta inyia hijo to wan to nohonyie, 'Abe ida hido nayya eruk to Hollum abe hidofe abaŋ hiyyo, ⁵ ati odule ihidak inna hitigiama nayya binno, aluak iso naŋ inyia to okiko bolioŋ, hijo hotobiaŋa inyia etigem nayya to loton nohonyie ta hanaŋ holoŋitek daŋ.''' ⁶ Atta Habu hijo, "Itira to haŋotoni lo orru. ⁷ Obe iso Hollum eyyani ŋoto to lonyimot illohonyie ille oyio to honyie ta far iko ta harie? Odule iso mahu inyia hiliŋa to hosie? ⁸ Ajo naŋ ta hatai hijo eyyani iso inyia ŋoto no obis to hosie kokwak. Ati lojo Lonyi Tuŋani lottu, hottu iso inyia arrumu huruk ta fau?“ ⁹ Atta inyia hinyiak hiro hitiriami inna te illak ille etahuo wati hijo ebis isia ojo hidofe omini illak hiyyo, ¹⁰ “Efie ifa liawa lohorik lomojori a ikelesia, ara ifa lobotie la Farisei ojo lobotie ara heduduhani ho mosuru. ¹¹ Odioto la Farisei atta mojo to hirro inno wan nohonyie, ‘Hollum, ajo naŋ to hoi humo hijo abe naŋ lara iyya illak hiyyo illa ara hahalak, hiyyo illo obe obis, hasomok, iyya heduduhak ho musuru ilia. ¹² Eya naŋ hinyiahita arik te isabit daŋ. Esiara naŋ hisiorita daŋ inno hirro inna arrumu naŋ.‘ ¹³ Ati oweta heduduhani lomusuru ta alamarai lo obe awak hikaf honyiehite inno honyie ido atta hillum suhe nohonyie hijo, ‘Hollum, tomehini ta hanaŋ heyyani.‘ ¹⁴ Ajo naŋ to hoi, eno hallaŋ lia ahaŋ honyie lo olibo hiram no honyie agalik lafa lobotie, nyo tuŋani la ahafita wan nohonyie enyiaha iso, ojo tuŋani le enyiak wan nohonyie ahafa iso inyia.“ ¹⁵ Eyyani ifa hiyyo to honyie iŋeyyaha, hijo anyar honyie otir inyia isia, ati ifa ewolo hetiyenak isia, atta hiriŋ isia. ¹⁶ Atta Yesu ellilloŋu isia to honyie, hijo, “Ibusak durre hafanu ta hanaŋ, hotobiaŋa itai eyyimo isia. Nyo ara lobie no Hollum nohosie. ¹⁷ Dede ajo naŋ ta hatai, hijo lobe lobo efwotu lobie no Hollum iyya hiito obe iso ojiŋak ade.” ¹⁸ Efi lobo ettok inyia, hijo, “Hetiyanani lo obis, nyo iso egiem naŋ anyar arrumu nayya wuaran no lodule?“ ¹⁹ Ejo Yesu to honyie, “Hijo jiai lellilloŋ iyye nayya hijo lo olibo? Obe lobo tuŋai lo obis, ati Hollum hame. ²⁰ Eyyen iyye hifahita - baŋa ara ahasomoni, baŋa ottohe, baŋa lahahala, baŋa ara loteller, ta baŋa monyohoi iko hotonyohoi.” ²¹ Ejio ettok lia, “Hirro inne bidaŋ eruk naŋ man halara naŋ la nyarhalu” ²² Ifa etiru Yesu daŋ ania, atta inyia to honyie, "Owuon nobo sihin ne ebuha to hoi. Itinyiaŋak ibariti innohoi daŋ atta iyye aharak to lociaŋak, anyar honyie errumu iyye ibariti te ido, attati iyye awoŋ hujufuta nayya.'' ²³ Ifa etiru hasamani hirro inia atta inyia hijoria binno, nyo asam ifa inyia binno. ²⁴ Ifa ewolo Yesu inyia ejoria binno atta hijo to honyie, "Ogol iso to hiyyo illa asam hajiŋahini to obie no Hollum! ²⁵ Ati eyyak iso to konikoni hajiŋari te itulit ne irifit, agalik tuŋani la asam hajiŋari obie no Hollum.'' ²⁶ Atta illafa etira hijo, “Ŋai ati oremik etilohini?” ²⁷ Etiraŋ Yesu hijo, “Hirro inno logol to hiyyo obe ogol to Hollum.” ²⁸ Ejio Peturu, “Anyar, ebusak iyyohoi hirro daŋ inno lowuon tohoi atta iyyohoi ejufuni iyye.” ²⁹ Ejio Yesu to hosie, “Dede, ajo naŋ ta hatai hijo obe lobo ebusak haji iko noŋorwo kuya hilasira kuya hilahaŋ kuya durre, to hiram to no obie no Hollum, ³⁰ Ŋai iso lobe efwotu arriai ta fau inna, ojo ta fau nyia ottu, wuaran nolodule fur.” ³¹ Tahalu ho hattubak nohonyie heyiyanak illohonyie to honyie, atta inyia hijo to hosie, "Itiwolo, efii iyyania a Yerusalem, anyar ofwo hirro innafa egiorohini to Lonyi Tuŋani tubai. ³² Esiarahini iso inyia to halufak, ociama iso hiyyo inyia, no orru to irri, atta amitak to honyie hamilak. ³³ Tahalu ho baha nohosie inyia, ottohe iso isia inyia, ojo to holoŋ hitahunihi, enyiak iso ebuhu.'' ³⁴ Obe isia oyyen hirro inia, nyo eŋofo ifa hirro inne tara hosie, atta isia enyiei oyyen hirro innafa lero inyia. ³⁵ Iyya ta nafa awoŋ Yesu aŋati ho Yeriko, ettole ifa lobo tuŋani loloŋodo aŋati he ikoi lelemimojo. ³⁶ Atta inyia etiru iluluŋ no hiyyo lofwo aŋati honyie. Atta inyia hifi nyo lowuon. ³⁷ Atta isia elimak inyia hijo Yesu lo Nasarit lia olot. ³⁸ Atta tuŋani loloŋodo lia yio binno hijo, “Yesu, lonyi Davide, tomehini ta hanaŋ.” ³⁹ Atta illafa lofwo to hosiere hiriŋ loŋodo lia, atta elimak inyia hotodwai. Atta inyia yio binno, “Lonyi Davide, tomehini ta hanaŋ.” ⁴⁰ Arrasa Yesu weta ta mai lia atta elimak hijo iyyani halaŋ lia to honyie. Ifa eliaha loŋodo lia, atta Yesu hifi inyia, ⁴¹ “Hewak iyye hijo hegiama naŋ nyo to hoi?” Ejio inyia, “Habu, awak naŋ riŋai.” ⁴² Atta Yesu hijo to honyie, “Toriŋai, etilibo huruk nohoi iyye.” ⁴³ Kokwak atta inyia riŋai, atta ŋejufari inyia ojo hidofe etihabwo Hollum. Ifa legonyu iluluŋ no hiyyo hirro inne ledwoŋ, atta isia daŋ hisio humo to Hollum.