¹ Ta halu ho hirro innia owuon ifa hiyyom no Yudea ojio Yesu ohu man Yerusalem. ² Ati to nobo tafar to Yerusalem ne eliaha te ikat ho hine. Efurek Eberei inyia Beteseda Owuon inyia iko massik inne elik miet. ³ Ta massik hunna eftifioro isia hiyyo haŋuak inno emonya, haŋodok, haŋurak, iko illo eyyokie hetilari hifoliahita no hifioŋ. ⁴ Nyo olocita ifa anjilo la Habu to nobo holoŋ atafar hetifoliahari hifioŋ. Ta halu ho hifoliahita no hifioŋ lia lesurok to hotwai ho hifioŋ ahosiere atta nyarru tara ŋuai to nohonyie. ⁵ Ati owuon ifa lobo tuŋani dia lo oŋuai ŋasi tomwana hunik hohottohunik. ⁶ Nafa egonyu Yesu inyia ofer dia ojio inyia oyyen hijio owuon inyia dia beren, ojio to honyie, "Hewak iyye nyarru?" ⁷ Atta tuŋani lia hitirraŋ to honyie hijio, "Habu, obe tuŋani la akafak nayya ahotuai ho hifioŋ lefoliahita. Lajio naŋ esurok to hifioŋ atta lobo esurok to hosiere hanaŋ." ⁸ Ojio Yesu to honyie, "Te'tte, akafu ijotit nohoi, ino." ⁹ Kokwak atta tuŋani lia nyarru atta inyia akafu ijotit nohonyie atta eino. Ara ifa holoŋ nyia holoŋ na Sabato. ¹⁰ To nia ojio Yudei to tuŋani le etinyar Yesu hijio, "Ara ena holoŋ no Sabato, to nia odua tohoi ha akafini ijotit nohoi. ¹¹ Atta inyia hitiraŋ hijio, "Tuŋani le etinyar nayya le elimak nayya hijio, "Takafu ijotit nohoi ino." ¹² Efia isia inyia hijio, "ŋai tuŋani lia lojio tohoi hijio, 'Takafu ijotit nohoi, ino?" ¹³ Ati obe tuŋani lara etinyar Yesu oyyen hijio ŋai lia nyo eno Yesu ade nyo owuon iluluŋ no hiyyo ta mai nya. ¹⁴ Ta halu orrumek Yesu inyia ta haji imojit inna hittok atta hiro to honyie hijio, "Torriŋai, anyarruu iyye baŋa lenyak eyyau nyo iso nobo sihin nolorru agalik ottu tohoi. ¹⁵ Ohu tuŋani le elimak Yudea hiji, Yesu hara lara etinyar nayya. ¹⁶ Tonia, atta Yudea hittiara hitigiama Yesu nyo ehuma inyeja hirro hunna to Sabato. ¹⁷ Ati elimak Yesu to hosie hijio, "Holodule Monye hanaŋ higiama man iko ena ojio hidofe naŋ adule higiama." ¹⁸ To hiram inna osiaha Yudea binno hattohori inyia nyo obe ara to huturuo nohonyie Sabato hamai, ati hidofe nyo ellilloŋo inyia Hollum Monye honyie heticalari wan nohonyie iko Hollum ¹⁹ Atta Yesu hitirraŋ too hosie hijio, "Dede, elimak naŋ itai hijio, obe Lonyi oremik hihuma nobo sihin to wan to nohonyie ara legonyu inyia sihin ne ehuma Monye. Nyo hirro ta hunna ehuma Monye, ehuma iso hidofe Lonyi honyi. ²⁰ Nyo to munoi no Monye Lonyi , etuhutek inyia hirro daŋ hunna ehuma inyia to wan nohonyie. Hidofe etuhutek iso Monye hirro hunna obolo agalik hunna hijio anyar elliliha itai. ²¹ Nyo iyya etubuhu Monye hayok atta hinyiak hisio wuaran, atta hidofe hisio Lonyi wuaran te illo onyimu inyia. ²² Obe Monye oŋot nobo no lobo tuŋani ati esio inyia ŋoto no hirro daŋ to Lonyi honyie, ²³ hijio anyar etihabuo hiyyo daŋ Lonyi honye iyya etihabuo isia Monye. Lia lo obe etihabuo Lonyi honye, obe inyia etihabuo Monye le efahu Lonyi. ²⁴ Dede, elimak naŋ itai hijio letiru hirorita innanaŋ ojio hidofe eruk do lia le efahu naŋ, owuon iso iko wuaran no odule fur. Obe iso Hollum oŋotok ye to honyie tuŋ ati aluai inyia to ye to wuaran. ²⁵ Elimak naŋ ta hatai dede hijio, ottu holoŋ, eba hara holoŋ ne etiruni hayok hirorita inno Lonyi Hollum ojio liya ille etiru owuar iso. ²⁶ Iyya owuon Monye iko wuaran to wan honyie to nia esio inyia Lonyi wuaran hotowuana to wan nohonyie, ²⁷ Ojio Monye atta hisio Lonyi duaran haŋotori hirro nyo ara inyia Lonyi Tuŋani. ²⁸ Ibaŋa ellilliha to hirro inia nyo ottu iso holoŋ ne letirarari illo te ilumioho hiro nohonyie, attati afanu ade te ilumioho. ²⁹ Liya ille ehuma no olibo, afanu to hebuhuni no wuaran, ojio hidofe lia ehuma holoŋi daŋ no lorru afanu iso to hebuhu no ŋoto ho hirro. ³⁰ Abe naŋ aremik hihuma nobo sihin to wan nanaŋ. Aŋot naŋ iyya etiru naŋ hidofe obis ŋoto nanaŋ. ³¹ Nyo abe naŋ asiaha wahan nanaŋ ati wahan no lia lafa efahu nayya. Lelimak naŋ ta wan to nanaŋ, obe iso eruk hijio ara dede. ³² Ati owuon lobo lo ero to fure nanaŋ ajio naŋ ayyen hijio nyo lero inyia ara dede. ³³ Efahak ifa itai hilak hiyyo to Yoani ojio inyia elimak inyie hilosut inna ara dede. ³⁴ Ati abe naŋ eruk hilosut no lobo tuŋani. Ero naŋ iyyania hijio anyar etilohini itai. ³⁵ Ara ifa Yoani iyya lomo ne etuwulek atta wule, nyo emuno ifa itai hettolojori to cialai honye. ³⁶ Ati awuon naŋ iko hilosut no obolo agalik no Yoani, nyo ara igiem ne esio Monye hanaŋ asut hijio efahu Monye nayya. ³⁷ Ojio Monye le efahu nayya ara asut to wan nohonyie ta nayya. Holobe lobo lahatai etiru hirorita innohonyie man ifa beren. ³⁸ Obe hirorita innohonyie to hotuaijin hatai nyo ebe itai eruk lia le efahu inyia. ³⁹ Ehiana itai higierita nyo egigilo itai hijio errumek iso itai wuaran no losio fure. ⁴⁰ Ati ibe itai efanu ta hanaŋ harrumuni wuaran. ⁴¹ Abe naŋ eruk hitahuo no hiyyo, ⁴² ati ayyen naŋ itai hijio obe itai emuno Hollum ta tajia te innahatai. ⁴³ Attu nayya to fure no Monye hanaŋ. Ibe itai erriehu nayya kuyya ottu lobo to fure nohonye ejio itai atta arriehu lia. ⁴⁴ Jiai eremik itai hiruk le esiaha itai hitahuo no hiyyo, ejio itai ibe esiaha hitahuo no lottu tara Hollum? ⁴⁵ Ibaŋa egigilo hijio etisiahak iso nayya itai to Monye. Mose inyia hetisiahani lahatai eijo itai eyyik to honyie. ⁴⁶ Nyo leruk itai Mose dede attati itai iso hiruk nayya egioro ifa inyia ta nayya. ⁴⁷ Ati le ebe itai eruk higierita innohonyie, jiai iso eruk itai hirorita innanaŋ?"