¹ Ifa eyyen Yesu hijio etiru Farisei hijio obolo iluluŋ nohonyie ojio hidofe Yesu ebatiso heyiyanak arria agalik illo Yoani, ² (obe ifa Yesu ebatiso nobo, ati heyiyanak illohonyie ifa ehuma), ³ atta inyia ebusari Yudea atta eno Galilea. ⁴ Iyyania ara ifa nia luŋa hijio anyar owu inyia a Samaria. ⁵ Teyya awoŋ inyia abore gala no Samaria, ne ellilloŋo hijio Sikar, eliaha ho bur no Yakobo nafa esio inyia to onyi honye Yosefu. ⁶ Owuon ifa Yokobo dia nalanyar. Ettaban ifa Yesu holoton atta ahunye aŋati ha hari. Ara ifa holoŋ iŋalio. ⁷ Ottu ifa hiito noŋoruo no Samaria owohori hifioŋ, atta Yesu hijo to honyie, "Isiara nayya ilak hifioŋ amat." ⁸ Nyo efi heyiyanak illeti ade abore gala enyiaŋari lobo ŋiria. ⁹ Atta hiito noŋorwo Samaritanani hitirraŋ hijio to honyie, "No nyo emojo iyye hifioŋ amatat ta hanaŋ, iyye Yudetani ajo naŋ ara a Samaritani?" Nyo oliwa Yudea iko hiyyo illo Samaria. ¹⁰ Atta Yesu hitirraŋ hijio, "Leyyen ida iyye hisiori no Hollum, ŋai lia lojo tohoi hijio, 'Isiara naya amatat.' nefi ida iyye inyia atta ida inyia hidofe hisio iyye hifioŋ inno owuar." ¹¹ Atta hiito noŋorwo nia hijio, "Ettok obe nobo iwohit to hoi, ojo hidofe hirri nia owudo binno. Errumek iso iyye hifioŋ inno owuar aji? ¹² Ebe iyye egalik hohonyi hohoi Yokobo, lafa esio dohooi hirri inna, ojo hidofe amata inni ta wan nohonyie daŋ iko onyirok honyie ojo hanyahanya innohonyie?" ¹³ Atta Yesu hitirraŋ to honyie hijio, "Tuŋani lamata hifioŋ hunna, enyiak iso hiboto agalik, ¹⁴ Ati lemat lobo hifioŋ innia esioŋ naŋ to honyie, obe iso inyia hidas hiboto. Nyo, odule iso hifioŋ ino esio naŋ inyia iyya otilik nobe otte neyyani to honyie wuaran no osio fur." ¹⁵ Atta hiito noŋorwo nia hijio to honyie, "Ettok, isiara nayya hifioŋ innia anyar naŋ abe hinyiak hiboto, ojo hidofe abe enyiak loton inni owohori." ¹⁶ Atta Yesu hijio to honyie, "Ino, illilloŋo oliawa hoi, iticiohini eni." ¹⁷ Etirraŋ hiito noŋorwo nia hijio, "Obe nayya oliawa." Ojio Yesu atta hijio tohonyie, "Ebis iyye to hijio tonohoi hijio obe iyye lobo hiito oliawa,' ¹⁸ nyo ewuon ifa iyye iko liawa miet, oliawa lowuon iko hoi iyyania, obe ara nobo oliawa hoi. Ara hiro nara ero iyye dede!" ¹⁹ Atta hiito noŋorwo hijio, "Ettok, ewolo nayya hijo era iyye a hekilani. ²⁰ Etihabuwo ifa hohonyiok hohoi to doŋe inna, ati ejo itai hiyyo illo Yudea hijio, etihabwo itai to Yerusalem, doŋe netihabwori hiyyo daŋ Hollum." ²¹ Atta Yesu hitirraŋ to honyie hijio, "Hanasi hanaŋ, iruho nayya, nyo ottu iso holoŋ nebiaŋari iyye eremik hitihabuwo Monye to doŋe inna, kuyya hidofe to Yerusalem. ²² Itai hiyyo inno Samaria, etihabuwo itai sihin nebe itai eyyen. Etihabuwo iyyohoi sihin neyyen iyyohoi, nyo ottu etilohini to Yudea. ²³ Ottu iso saa, ati iyyania eba inni, nofwo hetihabwok hitihabwuo Monye to oyiri iko to bisan, nyo osiaha Monye hiyyo iyya hullo hatara hetihabwok illohonyie. ²⁴ Ara Hollum Oyiri, ojio hiyyo ille etihabuwo inyia, hetihabwoi inyia to oyiri iko to bisan." ²⁵ Ojio hito noŋorwo tohonyie, "Ayyen naŋ hijio ottu iso Onyimoti lia leliloŋo Kristo. Lawoŋ inyia elimak iso inyia iyyohoi hirro daŋ." ²⁶ Atta Yesu hijio to honyie, "Nayya lia ero tohoi, nayya lia." ²⁷ Halarasa inyia hiro ho tuŋani nia, afanu heyiyanak illohonyie, atta hilliliha hijio no nyo ero inyia iko hiito noŋorwo nia, ati obe ifa lobo oremik hijio, "Ewak iyye nyo?" kuyya hidofe lobo lojio, "No nyo ero iyye he inyia?" ²⁸ Niya, atta hiito noŋoruo nia ŋebusak moti no hifioŋ, atta aciahari ahaŋ man owu hiro to hiyyo, hijio, ²⁹ "Ifanu, itiwolo tuŋani lelimak nayya hirro daŋ innafa ehuma nayya beren. Obe ille luŋa ara Kristo, hara mahu inyia Kristo lafa?" ³⁰ Odioto isia atta ebusari bore gala atta afanu oriŋari inyia. ³¹ Hafanu isia ta haŋ kwak, atta heyiyanak hijio tohonyie, "Hetiyenani, woŋ adaha do ŋiria." ³² Ati ojio inyia to hosie, "Owuon ŋiria hanaŋ, nebe itai eyyen." ³³ Atta heyiyanak hiro to wati innohosie hijio, "Holobe lobo tuŋani eyyani to honyie nobo daha, eyyani ati mahu hiyyo?" ³⁴ Atta Yesu hijio to hosie, "Ara daha nanaŋ hihuma wahan no lia lafa efahu naŋ hegiamari igem nohonyie. ³⁵ Obe itai ero hijio, 'Ebuhari yafajin aŋwan atta mana iso libe to dioŋo'? Elimak naŋ itai, itiwolo mana, nyo odon atta hidofe aremik to dioŋo! ³⁶ Omojuta hadioŋoni idumuti inno haŋer atta hidofe ettutubu wuaran, hijio anyar omuno hadioŋoni iko hayani lo hinyomo daŋ nobotie. ³⁷ To hiram nia, obis hiram nojio dede, 'Oyek lobo, ojio lobo odieŋu.' ³⁸ Efahak naŋ itai odioŋori mana nobe itai egiama. Egiemu hilak, ejio itai ta wati te innahatai ejiŋak te igem nohosie." ³⁹ Eruk hiyyo arria illo Samaria to honyie to bore gala nyia nyo elimak ifa hiito noŋorwo isia hirro bi daŋ, "Elimak inyia nayya hirro innafa egiem naŋ daŋ ifa beren." ⁴⁰ Nafa afanu Farisei to honyie, awak ifa isia Yesu hetolojo he isia holoŋitek hunik. ⁴¹ Tonia enyiak hiyyo arria hiruk hiram nohonyie. ⁴² Ojio ifa isia to hiito noŋorwo, "Eruk iyyohoi, obe ojio ara hiram nohoi hame, ati etiru iyyohoi to wati te innohoi, eyyen hidofe iyyohoi dede ara inyia hetilahani lo huwo daŋ ta fau." ⁴³ Ta halu ho holoŋitek arik, owu Yesu teyya a Galilea. ⁴⁴ Nyo Ero Yesu to wan to nohonyie hijio obe hekilani orrumek nobo baŋi to doŋe hosie. ⁴⁵ Nafa eba inyia ta Galilea, omuno ifa hiyyo illo Galilea atta amoju inyia. Nyo egonyu ifa isia hirro innafa egiem Yesu daŋ to Yerusalem ta far nafa eyyomori hiyyo, nyo ofu ifa isia amai eyomori dia. ⁴⁶ Tonia enyiak inyia awoŋ adoŋe Kana na Galilea, mai nafa eloitori inyie hifioŋ inna ajalaŋi inne eruatiŋo. Owuon ifa lobo dafit loŋwai onyi honye ta Kapernum. ⁴⁷ Etiru ifa inyia hijio, lia Yesu ebusari Yudea, enyiak acahari a Galilea, owu inyia to Yesu efiari hijio anyar owu hitilibo onyi honye, nyo eliaha ifa inyia ye. ⁴⁸ Ojio Yesu to honyie, lobe itai egonyu hituhutita iko iduwariti, ebe itai eruk." ⁴⁹ Atta dafit lia hijio to honyie, Habu, woŋ, efie kokwak holobe hiito nanaŋ oye." ⁵⁰ Ati ojio Yesu to honyie hijio, "Ino, owuar lonyi hoi." Niyya, eruk tuŋani lia hirro daŋ inne ero Yesu to honyie, atta inyia eno hikoi nohonyie. ⁵¹ Nafa holot inyia to hiikoi, atta inyia eboŋohini ho hegiamak illohonyie, ille elimak inyia hijio, howuar onyi hoi. ⁵² Atta tuŋani lia hifia isia hitieri no holoŋ na anyarruni inyia. Atta isia hitirraŋ do honyie hijio, "Ebusak nohon na wan nia inyia saa hattarik iŋole ŋole te iŋalio." ⁵³ To nia, atta monye agilu hijio, saa nyia nia noŋole erarari Yesu to honyie hijio, "Owuar onyi hoi." Atta inyia hiruk ta wan nohonyie daŋ iko woyyo nohonyie daŋ. ⁵⁴ Hitarrihi no hituhuti no Yesu nia ne egiem inyia nafa ottuni inyia ade tara Yudea no Galilea.