¹ Ta halu ho hirro innia, atta Yesu eno otifor na hari nettok no Galilea, ne efurek hijio Hari no Tiberio. ² Ejufuta ifa iluluŋ no hiyyo inyia nyo egonyu ifa isia iduariti inno obolo hunna ehuma inyia to haŋuak. ³ Atta Yesu hirre a nobo doŋe atta hitole dia iko heyiyenak illohonye. ⁴ Iyyania eliaha ifa hiyyom na laŋan nettok no hiyyo illo Yudea. ⁵ Ofiala ifa Yesu atta egonyu hiyyo arria illa afanu to honyie atta inyia hijio to Filipo, "Enyiaŋu iso iyyohoi imuniaha tai anyar hiyyo hullo adaha?" ⁶ Ero Yesu iyyania haciamari Filipo, nyo oyyen ifa inyia nyo nia owu inyia higiem. ⁷ Etiraŋ Filipo inyia hijio, "Ara da hido arobiyaha inno obore iyya nyo, obe oremik to hiyyo hullo bi daŋ, ebubun ida hido hiyyo kai kai." ⁸ Atta lobo heyiyenani lohonye lara fure Anerea ilasi Simone Peturu hijio, ⁹ "Lobo hiito ille owuon iko imuniaha miyet ojo ham arik, horemik iso ati innia jai te iluluŋ no hiyyo illia?" ¹⁰ Atta Yesu hijio, "Ilimak hiyyo hetolojo, obolo miyaŋ ta mai nia. Atta hiyyo hitole ta fau, ara ifa iluluŋ no hiyyo nia alif miyet. ¹¹ Atta Yesu adumu imuniaha, atta hisio humo, atta hisio to liyya illafa etole. Atta inyia aharak ham iyya awak isia. ¹² Nafa afoŋi isia, atta Yesu elimak heyiyenak illohonyie, "Itusuduhak ofitok ino ofitini tara hosie hotobiaŋa isia omuria." ¹³ Atta isia asuduhak man enyiak etufutak ofitok lur to gufasien tomon harik tara liyya ebusak to daha nohose. ¹⁴ Nafa egonyu isia duaran nettok nafa ehum Yesu, Ojio hiyyo lia hijio, "Dede ara tuŋani ille hekilan lafa eyyani sayye lafa ojio ottu iso afau." ¹⁵ Nafa egonyu Yesu hijio afanu iso isia eniefu inyia to golon hatara inyia a habu, atta inyia hilunya adoŋe hame to wan nohonyie. ¹⁶ Nafa era iŋalio atta heyiyenak illohonye efie ahari nettok. ¹⁷ Teyya atta isia arrek togoli, atta laŋan a hari a Kapenam. (Era ifa iŋalio, ati holobe ifa Yesu awoŋ do hosie.) ¹⁸ Etiara ifa oyyami ne efiriwa, man efoliahita ifa hari no orru. ¹⁹ Nafa egurori isia alamarai to hiji ha hari, egonyu ifa isia Yesu olot to hide hifioŋ lottu to hosie, abaŋi ifa isia binno. ²⁰ Attati inyia hijio hijio to hosie, "Hebaŋ! Nayya lia." ²¹ Atta isia ehutu to honyie to togoli hotorrek he isia. kwak, atta togoli hiba to otifor na hari no ofuyere isia. ²² Ifa motie nohonyie, egonyu iluluŋ no hiyyo illafa arrasa to otifor na hari toolo togoli nobotie no owueta dia nafa ho Yesu, atta isia hiyyen hijio holobe hada Yesu eno iko heyiyanak illohonye, ati heyiyenak hafa hame ofwo ade ta wati illohosie. ²³ Afanu innak togolisien to Tiberia aŋati ta mai nafa adahari isia imune ta halu ho hisio na Habu humo to Hollum. ²⁴ Nafa egonyu iluluŋ no hiyo hijio obe Yesu iko heyiyenak ilohonye tara, atta isia arrek to togolisien atta asiahari Yesu A Kapenum. ²⁵ Nafa orrumuni isia inyia aŋati hari nettok tololo, atta isia hijio to honye, "Hetiyenani, anu iso ettu iyye eni?" ²⁶ Atta Yesu hitirraŋ isia hijio, "Elimak naŋ itai hijio, esiaha itai nayya dede, obe ara hijio egonyu ifa itai iduariti, ati esiaha itai idahiti iyya innafa enya itai atta itai efoŋi. ²⁷ Ibaŋa egiama to daha no oremik murai ati igiamai ŋiria ne esio Lonyi Tuŋani nafa itai, nyo esihok Hollum Monye wuaran to honyie." ²⁸ Atta isia to honyie hijio, "Hegiem iso iyyohoi nyo anyar egiama iyyohoi igiemita inno Hollum?" ²⁹ Etirraŋ Yesu to hosie hijio, "Ara igem no Hollum tiji: iruho to lia lafa efahu inyia." ³⁰ Ati ejio isia to honyie, "Nari iduarit iso nia egiem iyye ne eremik iyyohoi egonyu ejio iyyohoi atta hiruk iyye? Hegiem iso iyye nyo? ³¹ Adaha ifa hohonyiok hohoi ŋiria nafa ottu te ido to waha iyya egioro ifa hijio, "Esio ifa do hosie imune te ido hatadahai."' ³² Atta Yesu hitirraŋ to hosie hijo, "Dede, obe ifa ara Musa esio ta hatai imune te ido, ati Monye hanaŋ esio ta hatai imune inna dede te ido. ³³ Nyo ara imune no Hollum nottu afau te ido, atta hisio wuaran nohonye ta fau." ³⁴ Niyya, atta isia hijio to honyie, "Habu, todule hisiara iyyohoi imune nia holoŋitek." ³⁵ Atta Yesu hijio to hosie, "Nayya imune lo wuaran, ati lawoŋ lobo tuŋani ta hanaŋ, obe iso inyia enyiak wode, ojio hidofe, leruk lobo da hanaŋ obe iso inyia enyiak hiboto." ³⁶ Ati iyyania elimak naŋ itai, egonyu itai nayya ejio itai ebe eruk. ³⁷ Hiyyo daŋ ille esio Monye hanaŋ ta hanaŋ, afanu iso ta hanaŋ ojio hidofe lottu ta hanaŋ abe iso naŋ efuhai inyia adde. ³⁸ Abe naŋ attu te ido afau egiamari wahan nanaŋ ati attu naŋ egiamari igem no lia lefahu naŋ. ³⁹ Wahan no tuŋai le efahu nayya inna, hijio hotobiaŋa naŋ etilitek illia ille esio inyia da hanaŋ, ati anyar etubuhu naŋ isia to holoŋ ne esidori fau. ⁴⁰ Wahan no Monye hanaŋ inna; illia illo oriŋa to Lonyi ojo hidofe eruk to honye, owuon iso isia iko manya no owuon mak, ajio hidofe naŋ atta etubuhu isia to holoŋ ne edisori fau. ⁴¹ Nia atta Yudei hitiara hiŋuŋunita to hiram ne ero inyia, nyo ojo inyia hijio, "Ara naŋ imune nottu te ido." ⁴² Atta isia hijio, "Obe ara Yesu ille lonyi Yosefu? Ile leyyen iyyohoi monye iko hotonye honyie? No nyo ojio inyia hijio "Attu inya te ido'?''' ⁴³ Atta Yesu hitirraŋ to hosie hijio, "Ibusak hiŋuŋunita nia hatai. ⁴⁴ Obe lobo tuŋani oremik awoŋ ta hanaŋ aracie Monye lia le efahu naŋ iso oremik arihini inyia, ajio iso naŋ etubuhu inyia te icuŋi no holoŋ. ⁴⁵ Nyo egiorok ifa hekilak hijio, 'Etiyena iso Hollum isia. 'Tuŋai letiru tara hanaŋ ojio hidofe etiyenu tara Monye Hanaŋ, ottu iso tahanaŋ. ⁴⁶ Obe lobo tuŋai oremik egonyu Monye, aracie lia lo ottu tara Hollum, egonyu inyia Monye. ⁴⁷ Dede, dede, lia le eruk, owuon iso ho manya no odule mak. ⁴⁸ Ara naŋ imune no wuaran. ⁴⁹ Adaha ifa monyie hatai ŋiria ta waha, atta ye. ⁵⁰ 50Oremik hiyyo daha imune inna, ati obe iso isia oye. Imune inna ottu a fau te ido. ⁵¹ Nayya imune no wuaran nottu te idou afau. Lenya lobo imune inna, owuar iso inyia mak, nyo ara wan nanaŋ imune ne esio naŋ to wuaran no hiyyo illa fau." ⁵² Attati Yudei hitiara hijoria to wati innohosie atta rija hijio, "Jai iso oremik tuŋani ille hisio wan nohonye hatadahai hiyyo?" ⁵³ Atta Yesu hijio to hosie, "Dede, dede, man enya itai wan no Onyi Tuŋani ejio hidofe emat hoto nohonyie, obe iso itai errumek ho wuaran to wati innahatai. ⁵⁴ Lenya lobo wan nanaŋ ojio hidofe amat hoto nanaŋ, orrumek iso inyia wuaran no odule mak, ajio iso hidofe naŋ etubuhu inyia to hucuŋi no holoŋ. ⁵⁵ Nyo ara wan nanaŋ ŋiria inna dede, ojio hoto nanaŋ ara amatat dede. ⁵⁶ Lenya lobo wan nanaŋ ojio hidofe amat hoto nanaŋ, odule iso ta hanaŋ, ajio naŋ iso do honyie. ⁵⁷ Iyya efahu Monye lo owuar nayya, iyya amanya hidofe naŋ to Monye, lia la anya nayya, amanya iso inyia to nayya. ⁵⁸ Ara naŋ imune nottu te ido afau, nafa adaha monyie atta ye. Tuŋani la anyar imune inna, amanya iso mak." ⁵⁹ Ero ifa Yesu hirro inne ta haji imojit ta nafa etiyena inyia ta Kapernaum ⁶⁰ Nafa etiru heyiyenak illo Yesu ania, atta isia hijio, "Ogolo hitiyena inna; ŋai iso oremik hiruk. ⁶¹ Nafa etiru Yesu to wan nohonyie hijio eŋuŋunuta heyiyenak illohonyie to hirro inne, atta inyia hijio to hosie, "Hodiaha sihin nia ta tajia hatai? ⁶² ŋa le egonyu itai Onyi Tuŋani orre amai honye nafa ottuni inya ifa beren? ⁶³ Esio Oyiri wuaran. Ojo wan atta hira assai. Ara rori inne ero naŋ ta hatai oyiri, ojo hidofe ara wuaran. ⁶⁴ Ati, holobe illak illahatai eruk." Nyo oyyen ifa Yesu man beren to hitieri hijio ŋai lia lobe eruk man owu etinyiaŋai inyia. ⁶⁵ Atta inyia hijio, "Inyia nia ajio ida naŋ ta hatai hijio obe lobo tuŋani ottu ta hanaŋ lobe Monye hanaŋ ebusak inyia." ⁶⁶ Ifa ta halu, atta heyiyenak illohonyie arria aciahari ahalu tara honyie, ojio hidofe atta hibo loton he inyia. ⁶⁷ Atta Yesu hiro hullo tomon ho lohorik, "Obe itai ewak aciahari daŋ, ewak itai?" ⁶⁸ Atta Simone Peturu hitirraŋ inyia, "Habu, efi iso mahu iyyohoi ta ŋai? ⁶⁹ Ewuon iyyohoi iko hiro no wuaran no osio mak, afanu iyyohoi hiruk ejio hidofe eyyen hijio, era iyye Lonyi Hollum lo Odua." ⁷⁰ Atta Yesu hijio to hosie, "Abe ifa naŋ anyimu itai tomon ha arik? Atta lobotie tara hatai hira hetisiahani?" ⁷¹ Iyania ero ifa inyia to Yuda onyi Simone Iskariote, nyo ara Yuda lobo tara hullo tomon ha arik lottu etinyiaŋai Yesu.