¹ ''Hotobiaŋa tajia innahatai odiaha. Iruho to Hollum; iruho hidofe daŋ ta hanaŋ. ² To hotwai haji ho Monye hanaŋ obore massik inne emanyari, nobe ifa ara ania, nia elimak ida naŋ ta hatai, ati ahu naŋ atiorok mai ta hatai. ³ Leno naŋ atiorok mai da hatai, enyiak iso naŋ aciohini atta naŋ awoŋ eyari itai ta hanaŋ hijo ta mai na awuanari naŋ ewuon iso itai daŋ. ⁴ Eyyen itai ikoi ne lawuye naŋ." ⁵ Ejo Tomaso to Yesu, "Habu, ebe iyyohoi eyyen hijo aji ehu iyye; jai iso eyyen iyyohoi ikoi?" ⁶ Ejo Yesu to honyie, "Ara naŋ hikoi, ho bisan, ojo wuaran, obe lobo lo lotu to Monye aracie ta nayya. ⁷ Ati leyyen itai naŋ, eyyen iso hido fe itai Monye hanaŋ daŋ; iyyania man ahosiere eyyen itai inyia ejo hido fe egonyu inyia." ⁸ Ejio Fillipo to Yesu, "Habu, ituhutek iyyohoi Monye, atta iso nia aremik toohoi." ⁹ Ojo Yesu to honyie, "Obolo wuana nanaŋ ikatai inni, ejo iyye holobe eyyen naŋ, Fillipo? Iyye ille egonyu nayya, egonyu Monye; jai ejio iyye, 'Ituhutek te iyyohoi Monye'? ¹⁰ Holobe iyye eruk hijo awuon naŋ to Monye, ojo Monye owuon ta hanaŋ? Hirro inia ero naŋ to hoi; ero naŋ obe ara to wahan hanaŋ; ati, inyia Monye lia lamanya ta hanaŋ egiama igem nohonyie. ¹¹ Iruho naŋ, hijo awuon naŋ to Monye, ojo hidofe Monye tahanaŋ; kuya hidofe iruho nayya to higemita inia egiem naŋ. ¹² Dede, dede, ajo naŋ ta hatai, lia le leruk ta hanaŋ, egiama iso inyia higemita hunna egiama nayya; ojo iso inyia hidofe egem higiemita hunna agalik nyo eno naŋ to Monye. ¹³ Le efia itai to fure hanaŋ, egiem iso naŋ, anyar okwat iso Monye To Lonyi. ¹⁴ Lefi itai illak hirro to fure nanaŋ, egiem iso naŋ. ¹⁵ Lemuno itai naŋ, eniefita iso itai hifahita innanaŋ, ¹⁶ Ajo iso naŋ amojo to Monye, ojo iso inyia esio itai lobo hesiŋani anyar iso lodule daŋ he itai tulaŋ, ¹⁷ Loyiri no bisan. Obe iso fau efotu inyia nyo obe egonyu obe hidofe oyyen inyia. Ati, eyyen itai inyia, nyo ettole inyia he itai ojo hidofe odule iso wuana ta hatai. ¹⁸ Abe naŋ ledek itai hame; acohini iso naŋ ta hatai. ¹⁹ Ati iso kai, obe iso fau egonyu naŋ inyak, ati egonyu iso itai. Nyo amanya naŋ, emanya iso hidofe itai. ²⁰ To holoŋ nyia eyyen iso itai hijo awuon naŋ to monye hanaŋ ojo itai ta hanaŋ, ajo hidofe awuon naŋ tahati. ²¹ Tuŋani lo owuon ho hifahita innanaŋ atta hitoŋ isia, inyia lia lo omuno nayya; ojo lia lomuno nayya omuno iso Monye hanaŋ inyia, ajo iso naŋ amuno inyia ajo iso nayya etuhutek wan nanaŋ to honyie." ²² Yudas (obe lara Iskariote) ojo to Yesu, "Habu, nyo nia iso etuhutek iyye wan nohoi te iyyohoi obe ara ta fau daŋ?" ²³ Etiraŋ Yesu atta hijo to honyie, "Lomuno lobo nayya, otoŋ iso inyia hiro nanaŋ. Omuno iso Monye hanaŋ inyia, atta iso iyyohoi afanu to honyie ojo iso iyyohoi atta emak haŋ ne emanyari iyyohoi he inyia. ²⁴ Tuŋani lobe omuno nayya obe eniefita hiro nanaŋ. Hiro nia etiru itai obe ara tara hanaŋ ati ottu tara Monye lia efahu nayya. ²⁵ Ero ifa naŋ hirro hunna ta hatai, nafa halamanya naŋ to hiji hatai. ²⁶ Ati, hetilihani, Loyiri ille olibo, lia lohu Monye iso efahu to fure hanaŋ, etiyen iso itai hirro daŋ atta iso eyyani to higigilo nahatai daŋ hunna ajo naŋ tahatai. ²⁷ Himwara ediahari naŋ ta hatai; esio naŋ himuara nanaŋ ta hatai. Abe naŋ esio inyia iyya esio fau. Ibaŋa ebusak tajia innahatai hotodiahai, ibaŋa labaŋ. ²⁸ Etiru itai hijo ajo naŋ ta hatai, 'Eno naŋ adde, ajio iso naŋ aciohini tahatai.' Lemuno ifa itai naŋ, ewuon iso itai iko mune nyo eno naŋ to Monye, nyo agalik Monye nayya. ²⁹ Iyyania elimak ifa naŋ itai holobe isia eduoŋ anyar, leduoŋ inya, eremik itai hiruk. ³⁰ Abe iso nayya adule hiro ikatai binno, nyo awoŋ hekumoni la fau inna, obe inyia owuon ho golon agalik nayya, ³¹ anyar oyyen fau hijo amuno naŋ Monye, ehuma nayya iyya elimak Monye hanaŋ nayya. Hetidiote efie tenni ade.''