¹ Naya yani ojo Monye hanaŋ ara ahedulani ha yani. ² Esisalu inyia sana inanaŋ inno obe eŋarak haŋer ojo inya esisala sana daŋ inne eŋara hijio anyar enyiak eŋarak haŋer arria. ³ Iyyania alibe itai to hiro ne le ero naŋ ta hatai. ⁴ Itigololik ta hanaŋ ajo naŋ agolik ta hatai. Iya obe sana ino yani oremik eŋarak haŋer inno honyie hame ojo ta ajalaŋi obe lobo lahatai oremik eŋarak man egolihini itai ta hanaŋ. ⁵ Ara nayya ajalaŋi ejo itai ara sana. Lo ogolik ta hanaŋ ajo naŋ to honyie eŋara inyia haŋer arria. Nyo elama itai tara hanaŋ ebe itai eremik hihum nobo sihin. ⁶ Obe lobo ogolik ta hanaŋ, eruwoŋori inyia adde iyya sanai hijio hototoyo. Sana inia agaranyu inyia atta ebirok to hima hijo hotosuwahari. ⁷ Lagolik itai ta hanaŋ ojo hiro nanaŋ ogolik ta hatai, ifia hiro ino ewak itai ati efu iso itai arrumu. ⁸ Okwat fure no Monye hanaŋ, le eŋarak itai haŋer ariai atta hidofe etuhutek dede hijo era itai heyiyanak illallaŋ. ⁹ Iyya omuno Monye hanaŋ nayya, amune hidofe nayya itai. Itudule to mune hanaŋ. ¹⁰ Lagolik itai hinefita hifahita innanaŋ egolik iso itai to mune nanaŋ iyya nia agocie naŋ hifahita inno Monye hanaŋ iyya omuno Monye hanaŋ itai ajo naŋ amuno itai, itigolik to mune nanaŋ. ¹¹ Elimak naŋ itai hirro hunna hijo anyar arasa mune nanaŋ ta hatai hidofe anyar efut nahatai. ¹² Hifahi nanaŋ innaŋ, itumune halasira hatai iyya inna amunori nayya itai. ¹³ Obe lobo tuŋani owuon ho mune agalik inna, hijo esio inyia wan nohonyie to motiarak illohonyie. ¹⁴ Era itai motiarak hanaŋ lehuma itai igem ne elimak naŋ itai. ¹⁵ Abe iso naŋ ellilloŋo itai apiti, nyo obe pit oyyen hijio nyo nia ehuma ettok lohonyie, ati ellilloŋo naŋ itai halasira nyo anyar etihutek naŋ ta hatai hirro daŋ innafa eyiyenu naŋ tara ho Monye hanaŋ, etuhutek nayya ta hatai. ¹⁶ Obe ifa ara itai enyimu nayya, ati nayya anyimu itai atta efahak hijo anyar efu itai eŋarak haŋer ojio hidofe anyar arasa haŋer to hiro daŋ inne efia itai tara Monye hanaŋ to fure nanaŋ, esio iso inyia ta hatai. ¹⁷ Hifahai nanaŋ inna ta hatai, hijo anyar emuno itai wati inna hatai. ¹⁸ Laliwari ilamuk hiyyo itai, itigilu hijo oliwari isia nayya to bere tara hatai. ¹⁹ ŋera ida itai ahiyyo hullo ha fau inna, nomuno ida hiyyo hullo itai iyya halasira hosie, ati obe itai ara ahiyyo hullo ha fau inna nyo anyimu nayya itai ta fau inna, inyia nia oliwari ilamuk hiyyo itai. ²⁰ Ihuma hinief hirro inne elimak naŋ ta hatai, obe pit agalik lettok honyie. Letigiama isia nayya, etigiama iso hidofe isia itai. Kuyya lehum isia hinief hiro nanaŋ ehum iso hidofe isia hinef hiro nahatai. ²¹ Ehuma iso isia hirro innia daŋ ta hatai to fure nanaŋ nyo obe isia oyyen lia lafa efahu nayya. ²² ŋabe ifa nayya attu hidofe hiro to hosie, hobe isia ida owuon iko hiyyatta innohosie; ati iyyania obe innak ilieti inno hiyyatta innohosie. ²³ Lia oliwari nayya oliwari hidofe inyia Monye hanaŋ. ²⁴ ŋabe ifa nayya ehuma higiemita hunna holobeŋ lobo tuŋani hihum to hiji hosie, nobe ifa isia owuon iko hiyyata innohosie, ati iyyania egonyu isia daŋ ojo hidofe oliwari nayya daŋ iko Monye hanaŋ. ²⁵ Iyyania, etisiru hiro nafa egiorok nayya to hifahita innohosie, hijo, oliwari isia nayya asai.' ²⁶ Lawoŋ hesiŋani, le efahu naŋ ta hatai tara Monye hanaŋ, inyia lia, Oyiri lo bisan, lo ohu tara Monye hanaŋ, ottu iso inyia hiro ta nayya. ²⁷ Ero hidofe itai nyo ewuon ifa itai ikanaŋ man to hitieri.