¹ Holobe ifa hiyom no Laŋan. Eyyen ifa Yesu hijo eliaha saa nohonyie hebusari fau inna anyar awu inya to Monye. Tomune to nohonye hehejufutak ilohonyie ilafa owuon ta fau, omuno ifa inyia isia man to hucuŋi. ² Iyyania ehumak ifa Sitan ta taji no Yuda Iskariote, lonyi Simone, anyar etinyiaŋai Yesu. ³ Oyyen inyia hijo esio ifa Monye honyie to honyie hirro ta has honyie nyo ottu ifa inyia tara Hollum ojio hidofe enyiak aciahari to Hollum. ⁴ Odioto inyia ta mai ho ŋiria atta ahou boŋo nohonyie. Atta inyia adumu hipotit atta elurok ta wan honyie. ⁵ Atta inyia ejuhok hifioŋ to hilai atta hitiara hillilla hejek inno heyiyanak atta hidofe hifufus isia to hifufusi nara elurok inyia to wan honyie. ⁶ Atta inyia awoŋ to Simone Peturu, atta Peturu hijo to honyie, ''Habu, hewu iso iyye hillilla hejek innanaŋ?'' ⁷ Etiraŋ Yesu to honyie hijo, "Hiro ino egiama nayya iyyania, ebe iyye eyyen, ati eyyen iso iyye ta halu.'' ⁸ Atta Peturu hijo to honyie, "Obe eremik hillilla hejek innanaŋ.'' Atta Yesu hitiraŋ inyia hijo, '' La abe naŋ ellilla iyye, obe iyye ewuon ettuba ikanaŋ.'' ⁹ Atta Simone Peturu hijo to honyie, ''Habu, baŋa ati ellilla hejek innanaŋ hame, ati illilla hass innanaŋ iko hoo nanaŋ.'' ¹⁰ Atta Yesu hijo to honye, ''Obe tuŋani lo okuo enyiak wahan, ati awak inyia hillilla hejek innohonyie, ati olibe inyia; alibe iyye ati hebuha illak.'' ¹¹ (Oyyen ifa Yesu tuŋani lo ohu etinyiaŋai inyia; inyia nia ojio inyia, ''Ebe itai ta mai daŋ elibo.'') ¹² Nafa ellilla Yesu hejek innohosie atta eyari boŋojin innohonyie atta ahunyie ta fau, atta inyia hijo to hosie, ''Heyyen iyye hijo nyo nia egiem nayya ta hatai? ¹³ Ellilloŋ itai nayya 'hetiyanani' iko 'Habu,' ejio hidofe itai ero ille ebis, to nia ara nayya. ¹⁴ Le era nayya, Habu iko Hetiyanani, atta hillilla hejek innahatai, illilla hidofe hejek inno lobo. ¹⁵ Etuhutek nayya itai hitimijani anyar egiem itai iyya inna egiamari naŋ ta hatai. ¹⁶ Dede, dede elimak naŋ ta hatai, obe hegiamani agalik ettok lohonyie; obe hidofe lefahati agalik tuŋani le efahak inyia. ¹⁷ Le eyyen itai hirro inia, errumu iso itai jaha le egiama itai isia. Abe naŋ ero te itai daŋ; ¹⁸ Ayyen nayya hiyyo illa anyimu nayya, egiem nayya ania hijo anyar otten hiram no Hollum: 'Tuŋani la ahaf imune nohonyie ahaf inyia heju nohonyie ta hanaŋ. ¹⁹ Elimak nayya itai iyyania holobe hirro innia hijo anyar eyyen itai holobe isia eba, hijo anyar eruk itai Nayya. ²⁰ Dede elimak nayya itai, le efotu lobo tuŋani ille efahu nayya, efotu inyia nayya, ojio tuŋani le efotu nayya, efotu tuŋani le efahu nayya.'' ²¹ Nafa attohu Yesu hiro hirro inia, atta oyiri nohonyie hitigiama. Ero inyia ta wan nohonyie hijo, ''Dede elimak naŋ itai hijo etinyiaŋak iso lobo nayya.'' ²² Oriŋa heyiyanak to wati illohosie, ilia ekuyya hijo hero mahu ta ŋai. ²³ Ofer ifa lobo heyiyanani lafa omuno Yesu aŋai to oger ho terefeja aŋati ho Yesu. ²⁴ Oŋuŋusia ifa Simone Peturu atta elimak to lobo heyiyanani hefia hijo, ''Ifia inyia ŋai lia ero inyie.'' ²⁵ Atta inyia hinyiak aciek wan nohonyie to Yesu atta hijo to honyie, ''Habu, ŋai lia?" ²⁶ Atta Yesu hitiraŋ, ''Inyia tuŋani le edutok ikanaŋ imune atta naŋ hisio to honyie.'' Nafa edutok inyia imune atta inyia hisio to Yuda lonyi Simone Iskariote. ²⁷ Ta halu ho daha nohosie atta Sitan ajiŋak to honyie, atta Yesu hijo to honyie, ''Hehuma iyye nyo, torruk hirro innohoi kwak.'' ²⁸ Iyyania, obe lobo tuŋani tara llafa ocio ta fau iko to terefeja oyyen hirro ino ero inyia to honyie. ²⁹ Ogilo ifa illak hijo oyita ifa Yuda kullo na arobia, atta Yesu hijo to honyie, ''Inyiaŋu hirro ino ewak iyyohoi to holoŋ no hiyyom,'' Kuyya hidofe e esio ida inyia nobo sihin to lociaŋak. ³⁰ Nafa efotu Yuda imune, atta inyia arruhari kokwak adde tara hosie. Ara ifa harie. ³¹ Nafa eno Yuda, atta Yesu hijo, ''Iyyania etahuo Lonyi Tuŋani, ojio hidof Hollum etahuo to honyie. ³² 32Etahuo iso Hollum inyia to wan nohonyie, ojio iso inyia etahuwo inyia kwak. ³³ Durre illo hitiŋi, hawuon naŋ ikatai to saa lo odico. Esiaha iso itai nayya, iyya nafa ajitari nayya to Yudei, 'Ta mai na awuye nayya, ibe itai eremik hafanu.' Iyyania enyiak iso naŋ elimak ta hatai. ³⁴ Esio nayya ta hatai hifahi ŋejuk, hijo anyar emuno itai wati innahatai; iyya nia amunori nayya itai, itumune daŋ illak. ³⁵ To nia oyyen iso hiyyo hijo era itai heyiyanak illallaŋ, le ewuon itai ho mune to wati innahatai.'' ³⁶ Atta Simone Peturu hijo to honyie, ''Habu, ewu iyye aji?'' Etiraŋ Yesu atta hijo, ''Obe iyye eremik ejufari nayya iyyania, ati ejufun iso ta halu.'' ³⁷ Atta Peturu hijo to honyie, "Habu, nyo ati abe nayya aremik ejufari iyye iyyania? Esio iso nayya manya nanaŋ te iyye.'' ³⁸ Atta Yesu hitiraŋ, ''Esio iso iyye manya nohoi ta nayya? Dede ajo nayya to hoi, erisa iso iyye nayya hinyiahita hunik holobe hohoro ellok.''