¹ Arasa ifa holoŋitek ile inno laŋan, atta Yesu hiba to Betania to doŋe nafa etubuhuni inyia Lasaru to ye. ² Atta isia hisio to honye daha nafa efo Marta, atta Lasaru daha daŋ he isia to terefeja ho Yesu. ³ Teyya atta Maria adumu hiyali inna ogol to hinyiaŋa bino inna ociama hiyo ikohoi nobotie. Atta inyia ejuhok to hejek innohonyie atta hifufus to hofir innohonyie. Oŋwo ifa haji girigir binno. ⁴ Ati Yuda Iskariote, hetiyanani ille ottu iso ŋetinyaŋai Yesu ojio, ⁵ ''Nyo ibe itai itinyaŋai ria inna ta arobia hisihai hunik atta itai aluahari lociaŋak? ⁶ Obe dede inyia egigilo to lociaŋak to hiro nohonyie ati ara inyia lohoho: ojio hidofe inyia ara ahatunani ha arobiyaha ati esio hiyo to honye ata inya eyari ilamuk ille esio hiyyo to honye. ⁷ Atta Yesu hijio, "Ibusak inyia, ejuhok inyia nara ehuhumari inyia ta far no onuhari hanaŋ. ⁸ Ewuon iso itai ho lociaŋak holoŋitek daŋ, ati abe iso naŋ ettole daŋ hatai fur.'' ⁹ Atta iluluŋ no Yudea hiyen hijio owuon Yesu dia, atta isia afanu, obe ara to Yesu hamai ati afanu hidofe isia hiwolo Lasaru lafa etibuhu Yesu to ye. ¹⁰ Ati ewaha ifa etaha hijio, efi hidofe isia iso atohoi Lasaru; ¹¹ to nyo, hiram nohonyie ne ebuarari Yudei ariai iyyohoi ojio atta eruk Yesu. ¹² Ifa motie etiru ariai ne iluluŋ inafa afanu wati to hiyyom no laŋan hijio ottu Yesu a Yerusalem, ¹³ Ata isia yafa sana ino yani atta efie hiboŋ iko Yesu, ewuwuoŋita isia hijo, ''Hosana! Hotomune lia lo ottu to fure na Habu, Habu lo Isaraile.'' ¹⁴ Atta Yesu ŋarumu sigira atta ŋahunyai to hide honyie iyya nafa egiorohini hiyyo, ¹⁵ ''Hebaŋ ŋani Sion; towolo Habu lohoi awoŋ etole to horwuoŋ ho sigira,'' ¹⁶ Obe ifa hetiyanak illohonyie etiru hirro inne to hosiere ati nafa etihabuo hiyo Yesu atta isia agilu hijio egiorohini hafa iso hirro inne te inya, ojio hidofe isia ehuma iyya egiorohini ifa te inya. ¹⁷ Ojio hidofe iluluŋ no hiyyo innafa owuon ho Yesu to holoŋ nafa ellilloŋori inyia Lasaru te ilume atta etubuhu inyia to ye atta elimak te innafa innak hijio egonyu isi ifa dede. ¹⁸ Hiram ne emak hiyyo ariai hatara inyia to nyo etiru isia hituhuti nafa ehuma Yesu. ¹⁹ Atta Farisei hijio to wati innohosie, itiriŋai ebe iyyohoi eremik hihuma nobo sihin; ituwolo, ejufuta hiyyo daŋ tahalu honyie.'' ²⁰ Owuon ifa illak illo Grik dia hullo afanu omojori hiyyo na laŋan. ²¹ Afanu ifa liyya to Filipo to Betseda doŋe no Galilea, hijio anyar efi isia inyia hijio, ''Eitok ewak iyyohoi hiwolo Yesu. ²² eno Filipo atta elimak Anerea atta isia efi elimak Yesu. ²³ Atta Yesu hitiraŋ hijio, ''Awoŋ holoŋ inna etukuatari hiyyo Lonyi tuŋani. ²⁴ Elimak naŋ ta hatai dede hijio lobe ŋamari odou afau atta ye, arasa iso inyia ta wan nohonye hamai; ati lo oye inyia, esiu iso haŋer inohonyie arria. ²⁵ Lo omuno lobo manya nohonyie, owu iso inyia ŋetilitek; ojio lia lobe wan egigilo to manya to na fau inna ottunak iso nohonyie ta manya inna osio fur. ²⁶ Lawak lobo tuŋani higiama ta nayya anyar odule inyia hijufita nayya ojio ta mai na awuanari nayya anyar owuon hegiamani lalaŋ dia. Legiama lobo tuŋani ta nayya, etukuat iso Monye inyia ²⁷ Iyania odiaha taji nanaŋ: Ajo iso naŋ nyo? 'Monye, itulwahu nayya to holoŋ tena' Ati to hiram nia atunieri nayya to holoŋ inna. ²⁸ Monye, isiara fure nohoi hoto kwata.'' Teyya atta hiro awoŋ te ido no ojio, Etukuat ifa nayya ati tahalu enyiak iso nayya hutukuat inyia.'' ²⁹ Teyya atta iluluŋ no hiyyo nafa owuon de ŋetiru atta hijio, emedek hide nia, ojio illak hijio ''Ero anjilo to honyie.'' ³⁰ Atta Yesu hitiraŋ hijio, ''Obe hiro nia ottu ta nayya, ati ottu to hiram to nahatai. ³¹ Iyyania era ŋoto no fau inna ati ebirori iso habu la fau inna adde. ³² Ojio le ehaf hiyyo nayya ta fau inna, arihu iso naŋ hiyyo daŋ ta hanaŋ'' ³³ Ojio inyia ania hijio anyar etihutek hijio jai ahu iso inyia ye. ³⁴ Atta iluluŋ no hiyyo hitiraŋ hijio, etiru iyyohoi to hifahita hijio amanya iso Yesu Kristo tulaŋ. Nyo nia ejio iyye hijio akafari iso hiyyo Lonyi tuŋani ahide'? ŋai Lonyi Tuŋani le?'' ³⁵ Atta Yesu hijio to hosie, halarasa calai to hiji hatai. Itiloto helewuon itai to cialai anyar abe idumele etihok itai. Lia lolot te idumele obe oye hijio aja ahu inya. ³⁶ Helewuon itai to calai, anyar iruk itai cialai hijio anyar ira itai onyirok ha cialai.'' Tahalu ho hikienita hunna atta Yesu eno ade tara hosie oŋofori. ³⁷ Hegiem ida hido Yesu hitihutita ariai to homomite hosie arasa isia biaŋan hiruk to honyie ³⁸ anyar etisiru hiro nafa ho hekilani ho Isaya inna ojio: ''Habu ŋai eruhok hiro nohoi? Ojio ta ŋai lia etihutek dwaran na Habu?'' ³⁹ To hiram nia obe isia eruhok nyo ojio ifa Isaya atta hinyiak hidas' ⁴⁰ ''Etiŋodo Hollum honyiehite innohosie, ojo etigol tajia inohosie; Anyar lobe egonyu to honyiehite innohosie, obe hidofe etiru to yohe innohosie, atta aciohini ta hanaŋ ajio naŋ atta hitilibo isia.'' ⁴¹ Ero Isaya hirro innia nyo egonyu inyia lohwo no Yesu atta inyia hiro te inyia. ⁴² Ati to hirro nia eruk ettaha ariai to Yesu, ati obe isia elimak to lobo tuŋani nyo abaŋ isia Farisei hijio hotobiaŋa efuhai isia tahaji imojit ade. ⁴³ Nyo omuno isia hitahuo no ottu tara hiyyo agalik hitahuo no ottu tara Hollum. ⁴⁴ Atta Yesu yio binno no okwat atta hijio, ''Le eruk lobo ta hanaŋ, obe inyia eruk ta hanaŋ hame, ati eruk to lia efahu wan nayya. ⁴⁵ Ojio le egonyu nayya, egonyu hidofe inyia lia le efahu nayya. ⁴⁶ Attu nayya afau iyya cialai hijio le eruk ta hanaŋ obe iso arasa te idumele. ⁴⁷ Ojio le etiru hikienita innanaŋ obe ejufuta isia, abe nayya aŋot inyia. To nyo abe nayya attu oŋotori hiyyo ati attu naŋ etilohini fau. ⁴⁸ Le ebo wan nayya atta hidofe hibo amoju hikienita innanaŋ owuon inyia ha haŋotoni lohonyie, hiro ne ero nayya ena ottu iso hiŋot inyia to hisidi ha fau. ⁴⁹ Ati abe naŋ ero to wahan nanaŋ ati Monye hanaŋ to wan to lohonyie lia efahu nayya, esio ta hanaŋ hifahi arik ho hikienita inne erarari naŋ. ⁵⁰ Ayyen naŋ hijio hikienita innohonyie ara wuaran no osio fur. Ati ero nayya, ero nayya iyya elimak Monye hanaŋ, ero nayya.''