¹ Iyannia oŋwai ifa lobo tuŋani lefurek hiyyo Lasaru. Ara ifa inyia lo Betani doŋe nafa ba Maria iko hanasi honyie Marta. ² Inyia Maria nafa eyol Habu Yesu to hiyali atta hifufus hejek innohonyie to hofir, ilasi honyie ifa Lasaru lafa oŋwai. ³ Efahak ifa hanasira honyie to Yesu hiram atta hijo, "Habu torriŋe, lia lafa emuno iyye lia oŋwai." ⁴ Etiru Yesu hiram nia atta hijo, "Obe iso ŋwai nia oremik attohoi inyia, ati etihabwo iso Lonyi Hollum te inya." ⁵ Iyyania omuno ifa Yesu Marta iko hanasi honyie ojo Lasaro. ⁶ Tanafa etirini inyia hijo oŋwai Lasaro atta inyia rassa ta mai nafa oŋwari Lasaro holoŋitek arik. ⁷ Ta halu atta inyia elimak to heyiyenak illohonyie hijo, ''efie aciahari a Yudea." ⁸ Atta heyiyenak honyie hijo do honyie, "Hetiyenani, hetek Yudea hiwak hatohoi iye, hidofe eijo iyye ewak aciahari ade?" ⁹ Ati etiraŋ Yesu to hosie hijo, "Obe sahien inno far ara tomon harik? Ati lolot lobo tihoni ta far obe iso oremik hekosok heju, nyo egonyu isia cialai na fau ta far. ¹⁰ Ati lolot lobo ta tari ekosori iso inyia, nyo obe cialai to honyie." ¹¹ Ojo Yesu hirro hunna da halu, atta inyia to hosie, "Afire mote hohoi Lasaro, ati hawu naŋ eticieŋu inyia a hide." ¹² Etiraŋ heyiyenak to honyie hijo, "Habu, lajotori inyia, ocieŋu iso hame." ¹³ Iyyania ero ifa Yesu to ye to nohonyie ati egigilo ifa isia hijo ero mahu inya hiram no jote no oyiri tuŋani bi. ¹⁴ Niya elimak ifa Yesu to hosie dede hijo, "Oye Lasaro. ¹⁵ Ojo hidofe to hiram ta nahatai, amuno naŋ hijo abe naŋ awuon he itai dia hijo anyar eruk itai. Ifanu efi to honyie. ¹⁶ Teya odioto Tomaso lafa efurek isia hijo Didimo, atta inyia hiro to heyiyenak, "efie anyar efi ye daŋ ho Yesu." ¹⁷ Nafa eba Yesu, orrumek inyia Lasaro to hotwai heilume holoŋitek aŋwan. ¹⁸ Eliaha ifa Betania ho Yerusalem. ¹⁹ Teyya afanu hiyyo arria to Yudea to twari ta Maria to ye ne ilasi hosie. ²⁰ Nafa etiru Marta hijo awoŋ Yesu, eno inyia heboŋori he inyia, ati arasa ifa Maria hitole ta haji. ²¹ Atta Marta hijo to Yesu, "Habu, lewuon iŋole iyye inni, nobe ifa halasi hanaŋ oye. ²² Ati iyyania, ayyen naŋ hijo, lefi iyye tara Hollum nobo sihin, oremik inyia hisio iyye." ²³ Ati ojo Yesu to honyie hijo, "Ebuhu iso halasi hoi." ²⁴ Ati etiraŋ Marta to honyie, "Ayyen naŋ hijo ebuhu iso inyia to holoŋ hucuŋi nafa fau nebuhuni hiyyo daŋ. Ojo Yesu to honyie, ²⁵ "Ara naŋ hebuhu iko wuaran; Tuŋani leruk ta hanaŋ, oye ida hido inyia owuar iso inyia, ²⁶ hidofe lowuar ojo hidofe eruk ta hanaŋ, obe iso inyia oye. Eruk iyye inna?" ²⁷ Atta Marta hijo do honyie, dede Habu, eruk ifa naŋ hijo ara iyye Kristo Lonyi Hollum, illo ottu afau. ²⁸ Nafa attohu inyia hiro, atta inyia eno heliloŋini hanasi honyie Maria atta elimak to honyie hijo eba hetiyenani ati eliloŋo inyia iyye. ²⁹ Teyya nafa etiru Maria, odioto inyia kwak atta eno to honyie ³⁰ Nyo holobe Yesu eba to hotwai na haŋ, halarasa inyia ta mai nafa eboŋohini inyie ha Marta. ³¹ Ati odioto Yudea illa ara owuon to twari kwak nafa ewolo isia inyia odiotori, ojo hidofe isia atta ejufari inyia. Egigilo ifa isia hijo owu inyia elume oyyori. ³² Nafa ebarari Maria ta mai nafa owuanari Yesu atta inya egonyu Yesu atta ahuyek to hejek inno atta hijo do Yesu, "Habu, lewuon iŋole iyye inni nobe ifa halasi hanaŋ oye." ³³ Nafa egonyu Yesu Maria oyyo ojo hidofe Yudea illafa enyamini inyia daŋ oyyo, atta taji nohonyie diahai binno ojo hidofe daŋ omehini; atta inyia hijo, ³⁴ "Aji enuhak itai inyia." Etiraŋ isia atta hijo, Habu woŋ towolo." ³⁵ Atta Yesu Yio. ³⁶ Atta hiyyo illo Yudea hijo, "Itiwolo, omuno hada Yesu inyia binno. ³⁷ Ati atta hilak ilohosie hijo, "Esio ifa tuŋani ileŋ riŋa to oŋodo." Iyyania, obe iso inyia oremik etihu Lasaro to ye. ³⁸ Niya eniyak hidofe daŋ taji no Yesu diahai binno atta eno e ilume na ara hinom no ottuho to moru. ³⁹ Atta Yesu hijo, "Itudumu moru ade." Atta Marta hanasi hayoni hijo to Yesu, "Habu, iyyania omurai nyo era holoŋi innohonyie aŋwan iyyania te ilume." ⁴⁰ Ojo Yesu do honyie, "Abe ida naŋ elimak iyye hijo, le'ruk iyye egonyu iso iyye lohwo no Hollum?" ⁴¹ Teyya atta isia etubuluŋai morwo nafa ade, ojo Yesu atta hibono to honyehite te innohonyie ahide atta hijo, "Monye, ajo naŋ to hoi humo nyo etira iyye tahanaŋ. ⁴² Nyo ayyen naŋ hijo etira iyye ta hanaŋ holoŋitek daŋ. Ati to hiram ne iluluŋ no hiyyo no oweta inni, ero naŋ iyyania hijo anyar eruk isia hijo efahu ifa iyye nayya." ⁴³ Tahalu no hiro nohonyie hirro hunna, oyio inyia wuoŋ, wuoŋ, nojo, "Lasaro, woŋ ade!" ⁴⁴ Atta hayoni awoŋ lo obubuna has, hejek, homom ojo wan nohonyie daŋ to boŋo. Atta Yesu hijo, "Itiho inyia ⁴⁵ Eruk Yudea illa ara afanu daŋ ho Maria legonyu isia hiram ne egiem Yesu. ⁴⁶ Atta hilak efie ta Farisei elimahini to hosie hirro daŋ innara egiem Yesu. ⁴⁷ Otuba ifa ettaha iko Farisei ojo haŋotok ho hiro, eijo isia, " Efi iso iyyohoi higiem nyo? Egiama tuŋani le idwariti arria. ⁴⁸ Lebusak iyyohoi inyia hamai ania, ofwu iso hiyyo daŋ huruk to honyie; man afanu iso hiyyo illo Roma eyari massik innohoi ojo doŋe nohooi." ⁴⁹ Attati lobo lohosie la ara fure Kaifas ettok lafa to hiŋa to nyia, ojo to hosie hijo, "Ebe itai eyyen inak hirro tuŋ hada. ⁵⁰ Ebe itai eyyen egigilo hijo olibo ye no tuŋani lobotie tara to hiyyo arria agalik hitaturo no hiyyo daŋ to doŋe? ⁵¹ Obe ati inyia ero rori inne to hoo to nohonyie hame." Nyo ara inyia hehuma lobolo binno to hiŋa inna, omoju inyia rori inne tara Hollum hijo, oye iso Yesu to hiyo ilo Yudea bi daŋ. ⁵² Obe ara to hiyyo ile hame ati anyar ottubak inya iluluŋ ino dure ilo Hollum ile esio. ⁵³ Teya to holoŋ to nya ewuaha isia hijo jai iso eremik isia inyia. ⁵⁴ Tonia obe Yesu enyiak loton loliew to hiji a Yudea ati eno teyya adde man eliaha to mur to nobo doŋe nefurek hijo Efraim atta rasa dia iko hejufutak ilo honye. ⁵⁵ Niya eliaha ifa hiyyom no Yudea nefurek hijo laŋan na Anjilo. Ofwo ifa hiyyo arria to misihi inno Yerusalem to hosiere ho hiyyom nyie hehuhumari wati innohosie. ⁵⁶ Odule ifa isia siaha Yesu ojo hidofe ero to wati innohosie ojo isia hetole ta haji imojit nettok atta hijo, obe iso inyia ottu ta mai no hiyyom? ⁵⁷ Iyyania efahak ifa Farisei iko ettaha hiram hijo, loyyen lobo owuon inyia aji anyar elimak tohoi hijo anyar eremik iyyohoi eniefu inyia.