¹ Dede, ajo nayya ta hatai, lia lo obe ojiŋai tekat ahotwai bore, atta eno tokoi nobo, ara iso tuŋani lia lohoho ojo hidofe ara hepihoni. ² Ojo lia lo ojiŋai tekat ara iso heribitani lo kioro. ³ Aŋa iso heririani le ikati to honyie ikat. Etiru iso kioro hiro nohonyi, ojo iso inyia atta hililoŋ kioro innohonyie to fureta atta hitidik isia ade. ⁴ Ifa le eyyani inyia ade innohonyie, owu iso inya holobe isia, ojo kioro ejufak inya, nyo oyyen isia hiro nohonyie. ⁵ Obe iso oremik ejufak olufa ati egier iso isia nyo obe isia oyyen hiro no olufa." ⁶ Ero Yesu hitimiyahita inia to hosie, ati obe isia oremik hiyyen hijo hara hiro inia ŋarinyo innafa inia ojo inyia. ⁷ Teyya edas Yesu hijo tohosie, ''Dede, dede, ajo nayya tahatai, 'Ara nayya ikat no kioro. ⁸ Ilafa ilia afanu to hosiere hanaŋ, ara isia hahalak iko harujok, ati obe iso kioro etira to hosie. ⁹ Ara nayya ikat. Kuya lowuon lobo lo jiŋu ahotwai tara naya, etilohini iso inya; owu iso inyia ahotwai iko abali atta arumu miyaŋ. ¹⁰ Ottu lohoho ahahalari, ottohori, iko eturuori. Attu nayya hijo anyar mahati lowuon isia iko wuaran no obolo. ¹¹ Ara nayya heribitani ille alibo. Esio heribitani manya nohonyie to kioro innohonyie. ¹² Hegiamani lo ojuruni ta arobiyaha obe ara heribitani, obe oluŋu kioro, legonyu huwaru ottu ebusak kioro innohonyie atta hirwata. Ojo huwaru atta eyari isia ade. Ojo isia atta esarai. ¹³ Erwat inyia ade nyo ara inyia hegiamani ille ojuruni hiyyo ta arobiyaha nyo obe inyia eriria kioro inia nalanyar. ¹⁴ Ara nayya heyyohoni la alibo, ajo nayya ayyen inanaŋ, ojo inanaŋ oyyen nayya. ¹⁵ Oyyen Monye nayya, ajo nayya ayyen Monye hanaŋ, ajo nayya esio wan nanaŋ to kioro inanaŋ. ¹⁶ Awuon naŋ iko inamuk kioro hunna obe ara inno bore innanaŋ. Aremik nayya eyyani isia, hijo anyar hidofe isia oremik etiru hiro nanaŋ anyar owuon kioro inia nobotie iko heyyohoni lobotie. ¹⁷ Inyia nia omuno Monye hanaŋ nayya: Esio nayya wuaran nanaŋ inna aremik nayya hinyiak eyari. ¹⁸ Obe lobo lobotie oremik eyari tara nayya, ati esio nayya wuaran nanaŋ ta fau. Awuon naŋ ho golon hesiarari manya nanaŋ, ajo hidofe nayya awuon iko golon hinyak eyari. Amoju nayya hifahi inna tara Monye hanaŋ." ¹⁹ Enyak ofe bwanya hidoŋ to hiji ho Yudei to hirorita inia. ²⁰ Obore illohosie illo ojo, "Oyita inyia miniaŋa ojo hidofe esita. No nyo etira itai tohonyie?" ²¹ Ojo ilamuk atta hijo,"Obe hirorita inia ara illo lobo ile owuon iko miniaŋa. Oremik tuŋani lo miniaŋa hiŋa honyehite inno loŋodo?" ²² Teyya awoŋ holoŋ no hiyyom no dioŋo to Yerusalem. ²³ Ara ifa hameyu, ojo Yesu olot to hotwai etiyanari ta haji ho Solomone. ²⁴ Teyya eba Yudei atta elurok inyia atta hijo tohonyie, ''Man anu edule iso iye toŋita iyyohoi tiji ania? Kuya lera iyye Kristo, ilimak iyyohoi nalanyar." ²⁵ Ojo Yesu atta hitiraŋ isia, "Elimak nayya itai, ati ebe itai eruk. Higiemita hunna egiama nayya to fure no Monye hanaŋ, ero inna hetihutek to nayya. ²⁶ Ati ebe itai eruk nyo ebe itai era kioro inanaŋ. ²⁷ Etiru kioro inanaŋ hiro nanaŋ; ayyen nayya isia, ojo isia ejufak nayya. ²⁸ Esio nayya to hosie wuaran no osio fur; obe iso isia oremik ye, ojo hidofe lobo obe oremik akwaru isia ade tahani hanaŋ. ²⁹ Monye hanaŋ, le esio isia tahanaŋ, obolo inyia tara ilia ilamuk, obe lobo oremik akwaru isia ade ta hani ho Monye hanaŋ. ³⁰ Nayya iko Monye hanaŋ era iyyohoi nobotie." ³¹ Teyya adumu Yudei moru atta hipuda inyia. ³² Etiraŋ Yesu isia, ''Etuhutek nayya ta hatai higiemita ariai hunna olibo tara Monye. Nari igiem nia honyie ewak itai epudari nayya?" ³³ Atta Yudei hitiraŋ to honyie hijo, "Ebe iyyohoi epuda iyye te igiem nobo nolibo, ati to biaŋan nohoi baŋi, nyo iyye, tuŋani, ehumak wan nohoi Hollum." ³⁴ Etiraŋ Yesu isia, "Hobe mahati egioro to hifahi nahatai, 'Ajo nayya, era itai johin'''? ³⁵ Ile eliloŋ inya isia ajohin, to tuŋani ottuni hiram no Hollum (ojo to higierita huna obe oremik wuro), ³⁶ hejo itai hijo inyia lia lafa odumu Monye atta efahak afau, 'Era iyye heturuoni, 'nyo ajo nayya hijo, Ara nayya Lonyi Hollum'? ³⁷ Labe nayya egiama higiemita inno Monye hanaŋ, ibaŋa eruk nayya. ³⁸ Tonia, kuya legiama nayya isia, ara ida hido hijo ebe itai eruk nayya, iruho te igiem anyar mahati eyyen itai hijo anyar eremik hetiru hijo awuon Monye ta hanaŋ ajo hidofe nayya owuon to Monye." ³⁹ Enyiak ifa isia hikol Yesu, ati enno ifa inyia ade tahas innohosie. ⁴⁰ Enyiak Yesu eno ade alamarai ho Yordano amai nafa ebatisori Yoani to hitieri, atta inya hitole dia. ⁴¹ Obore hiyo hulo afanu to Yesu. Odule ifa isia hijo, "Obe Yoani dede egiem nobo hituhuti, ati ara hiro inafa ero inya to tuŋani ile dede." ⁴² Obore ifa hiyyo illo eruk to Yesu dia.