¹ To holoŋ nafa hitieri ne isabit, ifa to motie, ottu Maria Madalina elume; egonyu inyia moru abuluŋari ade to ilume. ² Anyieru inyia atta eno to Simone Peturu iko ilak heyiyanak hullo omuno Yesu, atta inyia hijo to hosie, "Eyari isia Habu ade te ilume, obe iyyohoi eyyen hijo onuhak isia inyia aji." ³ Atta Peturu iko ilak heyiyanak efie ade, ojo ofu eilume. ⁴ Enyior isia bi daŋ arabotie; atta efahat lia erwuatik Peturu atta hiba te ilume to hosiere. ⁵ Oweta inyia atta hiwolo ilume, atta inyia egonyu boŋojin ibubuniti arasia dia, ati holobe inyia eno ahotuei. ⁶ Nafa eba Simone Peturu ta halu honyie atta eno ahotuai ilume. ⁷ Atta inyia egonyu ibubuniti inno boŋojin owuon dia. Ojo boŋo nafa owuon tohoo. Obe ifa owuon iko hunna to wan atta abubunari ahide to wan nohonyie. ⁸ Nafa efie ilak heyiyanak ahotuai hidofe, lafa eba hitieri te ilume; egonyu inyia atta eruk. ⁹ Iyya ta nafa inyia halarasa isia biaŋan oyyen Bibia hijo ebuhu Yesu inyiak to ye. ¹⁰ Aciahari heyiyanak ade hinyiak ahaŋitek hosie. ¹¹ Ati, oweta ifa Maria aŋati he ilume atta yio; iyya nafa oyiori inyia, atta inyia diote atta hiwolo ahotwe ilume. ¹² Egonyu inyia anjilohien ohorik ille eciefita boŋonjin boŋi etole, lobotie te iko hoo, ojo lobotie te iko hejek, tamai nafa onuhari Yesu. ¹³ Ojo isia atta hijio to honyie, "Tuŋani innaŋ, eyyo iyye nyo?" Ejio inyia to hosie, "Nyo eyari isia Habu hanaŋ ade, ati obe nayya ayyen hijo efiyak isia aji." ¹⁴ Nafa ejio inyia ania, atta inyia yite ahalu atta egonyu Yesu oweta dia, ati obe inyia oyyen hijo Yesu lia. ¹⁵ Ejio Yesu te inyia, "Tuŋani innaŋ, eyyo iyye nyo? ŋai lia esiaha iyye? egigilo inyia hijo ara inyia ifa haramoni, ati ejio inyia to honyie, "Ettok, eyari iyye inyia ade, ilimak ta hanaŋ mai ne enuhahini itai inyia, ajo iso naŋ ahu eyari inyia ade." ¹⁶ Ejio Yesu to honyie, "Maria." Atta inyia yite, atta hijio tohonyie ta Aramaik, "Rabboni," iyya ejio iyye, "Hetiyanani." ¹⁷ Ejio Yesu to honyie, "Baŋa otir nayya, holobe nayya hirre to Monye hanaŋ; ati inno ta halasirak hanaŋ ino ilimak isia hijo ohu naŋ hirre to Monye hanaŋ iko to Monyie hatai, ojo Hollum hanaŋ iko Hollum lahatai." ¹⁸ Awoŋ Maria Madalina atta elimak to heyiyanak, "Egonyu nayya Habu," Teyya ojo inyia hirro hunna to honyie. ¹⁹ Nafa era iŋalio, no holoŋ nyia, to holoŋ no hitieri ne isabit, iyya nafa esionori ikatin nafa owuanari heyiyanak iko baŋi to Yudei, awoŋ Yesu weta to hiji hosie atta hijo to hosie, "Isiara himwara hotowuana ikatai. ²⁰ Nafa ejio inyia ania, atta inyia etihutek isia has innohonyie iko mari innohonyie. Ati nafa egonyu heyiyanak Habu, atta isia mune. ²¹ Enyiak Yesu hijo to hosie, "Owuon iso himwara ikatai. Iyyania efahini Monye hanaŋ nayya, efahak iyya efahak naŋ itai." ²² Nafa ejio Yesu daŋ ania, atta inyia eyyiek to hosie atta hijo to hosie, "Itirumu Oyiri no Olibo. ²³ Iyya leyyau lobo hirro innohoi ibusak, ibusak isia te isia; iyya leyyau lobo hiro innohoi oŋwai ade, atta isia afitini tara hiyyata." ²⁴ Tomaso, lafa hitatomoni ha arik, lafa ara Didimo, obe owuon iko isia nafa awoŋ Yesu. ²⁵ Ejio ilak heyiyanak ta halu honyie,"Egonyu iyyohoi Hobu." Ejio inyia to hosie, "Man egonyini nayya ituliti inno gusumari ta has honyie, ajio nayya aciamak hafialai lalaŋ te ituliti inno gosumari, ajio naŋ emak hani nanaŋ ta mari honyie, obe nayya eruk." ²⁶ Tahalu ho holoŋitek hotohunik, owuon ifa heyiyanak illohonyie to hotwe, ojo Tomaso owuon iko isia. Awoŋ Yesu ojo ikatin esiono, atta weta to hiji hosie, ata hijo, "Hotowuana himwuara ikatai." ²⁷ Atta inyia hijo to Tomaso, "Ibara inni to hafialai lohoi, ejo ewolo has innanaŋ; ibara inni to hani nohoi, ejio iyye ehumak hani nohoi ta mari hanaŋ; hotobiaŋa hiruk nohoi olita, ati iruho." ²⁸ Etiraŋ Tomaso atta hijio to honyie, "Habu lalaŋ iko Hollum lalaŋ." ²⁹ Ejio Yesu to honyie, "Iyya egonyu iyye inyia, iruho. Ajaha iso lia obe egonyu, ati eruk isia." ³⁰ Iyyania nia egiem Yesu hitihutita ariai to hosiere ho heyiyanak illohonyie, obe hituhututa nia egiorohini to hotwe ho Bibia; ³¹ Ati egiorok hunna olibo anyar eruk itai to Yesu Kristo, hiito lo Hollum, ati iyyania eruk iyye, ewuon iso iyye ho manya to fur nohonyie.